ლაგოდეხის მუნიციპალიტეტის ერთ-ერთ სოფელში ნათესავი ქალის გაუპატიურების მცდელობის ბრალდებით 30 წლამდე კაცი დააკავეს. საქმე 2023 წლის ოქტომბერში მომხდარ დანაშაულს ეხება. როგორც ადგილობრივები „რეზონანსთან“ ყვებიან, კაცს მაშინ ნათესავები თავად გაუსწორდნენ - ქალის ტანსაცმლის ჩაცმა აიძულეს და სოფელში ასე ჩამოატარეს. ამის გამო იგი პოლიციამ იგი დაზარალებულადაც სცნო და ამ საქმეზე 3 პირიც დააკავა. თუმცა მოგვიანებით დადგინდა, რომ 30 წლის მამაკაცმა ნათესავ ქალზე ძალადობა მართლაც სცადა და პოლიციამ შესაბამისი მუხლით ისიც დააკავა.

მოუწევს თუ არა პატიმრობაში მყოფ ექსპრეზიდენტ მიხეილ სააკაშვილს არჩევანის გაკეთება „ნაციონალურ მოძრაობასა" და მელია-გვარამიას ერთობლივი პარტია „ახალს" შორის? ანალიტიკოსების აზრით, სააკაშვილის პოზიციას, ელექტორალური თვალსაზრისით, შესაძლოა გადამწყვეტი მნიშვნელობა ჰქონდეს. „ახალის" მიმართ მისი დამოკიდებულება კი თავად ამ პარტიის შემდგომ ნაბიჯებზე, მათ რეიტინგსა და არჩევნების წინ შექმნილ სიტუაციაზე იქნება დამოკიდებული.

უკრაინისა და საქართველოს ხელისუფლებებს შორის ურთიერთობები კვლავ დაიძაბა, ეს კი საქართველოს ყოფილი გენპროკურორის ზურაბ ადეიშვილის ევროპაში ვიზიტს მოჰყვა, რომელიც უკრაინის ოფიციალურ დელეგაციაში იყო და მაღალ თანამდებობას იკავებს, საქართველოში კი ადეიშვილი რამდენიმე საქმეზე დამნაშავედ ცნეს. საქართველოს მთავრობა უკრაინას ურთიერთობების მოსაწესრიგებლად კონკრეტული ნაბიჯების გადადგმისკენ მოუწოდებს. მათი თქმით, მნიშვნელოვანია უკრაინამ საქართველოს გადასცეს „დამნაშავეები, რომლებიც დღეს უკრაინის ხელისუფლებაში მაღალ თანამდებობებს იკავებენ". ამ განცხადებას, უკრაინელი მაღალჩინოსანი, დავით არახამია გამოეხმაურა და საპასუხო მოთხოვნები წამოაყენა.

ნარკოტიკებთან ბრძოლას შინაგან საქმეთა სამინისტრო და სამართალდამცველები აგრძელებენ. კიდევ ერთი ხმაურიანი დაკავება თბილისში, დადიანის ქუჩაზე ნაქირავებ საცხოვრებელ სახლში მოხდა. სამართალდამცველებმა ახალგაზრდა ქალი და მამაკაცი დააკავეს. მეზობლები ადასტურებენ, რომ ამ მისამართზე პოლიცია ნამდვილად იყო მობილიზებული. გამოძიების ინფორმაციით, ადგილზე აღმოჩენილია დიდი ოდენობით სარეალიზაციოდ გამზადებული ნარკოტიკი. სამართალდამცველებმა ამოიღეს სპეციალური ხელსაწყოებიც, რითაც წყვილი ნარკოტიკულ საშუალებებს გასაყიდად ამზადებდა.

საქართველოში საინვესტიციო კლიმატი ცოტათი გაუარესდა. მართალია, ტენდენცია სახარბიელო არ არის, თუმცა განგაშის საფუძველს ჯერჯერობით არ იძლევა. მით უფრო, რომ სააქციო კაპიტალის ნაწილში გარკვეული ზრდა შეინიშნება. მიუხედავად ამისა, ფუნდამენტური ფაქტორების გავლენა ჯერ კიდევ დიდია, მათ შორის, რეგიონში მიმდინარე საომარი სიტუაცია და წინასაარჩევნო შიდა პოლიტიკური არასტაბილურობა, რაც ინვესტიციებზე, სავარაუდოდ, უარყოფით გავლენას მოახდენს.

უკრაინელებისთვის ფრონტის ხაზზე, სადაც სიტუაცია ყოველდღიურად სულ უფრო იძაბება, მნიშვნელოვანია დასავლეთიდან დროული დახმარების მიღება. დამატებითი დაფინანსების შესახებ კანონპროექტის დამტკიცების ერთთვიანი დაგვიანების ფონზე, რომელიც ასევე მოიცავს უკრაინის დახმარებას, შეერთებული შტატები იძულებულია რთულ გადაწყვეტილებებს მიმართოს. გამოცემა „ბლუმბერგი“ წერს, რომ აშშ-ის პრეზიდენტის ადმინისტრაცია ახლა მსჯელობს, შეუძლიათ თუ არა დაახლოებით 200 მილიონი დოლარის მოზიდვა აშშ-ის არმიის დაფინანსებიდან უკრაინას გადაუდებელი დახმარების უზრუნველსაყოფად.

საქართველოს ყოველ მესამე მოქალაქეს აზარტული თამაშების ანგარიში აქვს გახსნილი. პრობლემა საკმაოდ მასშტაბურია. შემუშავებული რეგულაციებისა და დაწესებული აკრძალვის მიუხედავად, თამაშდამოკიდებულ მოქალაქეთა რიცხვი ქვეყანაში სულ უფრო მატულობს.

კლიმატურმა ცვლილებამ შესაძლოა, გლობალურად წყლის დიდი დეფიციტი  გამოიწვიოს. კრიზისი იმდენარ რეალურია, რომ სპეციალისტები უკვე საუბრობენ მესამე მსოფლიო ომის დაწყებაზე, რაც სავარაუდოდ, წყლის დეფიციტს დაუკავშირდება. საუბარი არ არის მხოლოდ სასმელ წყალზე, აგრარულ მეურნეობასა და მრეწველობაში წყლის მარაგის დიდი კლებაა მოსალოდნელი, რის წინაშეც განვითარებული ქვეყნებიც აღმოჩნდებიან. საქართველოს ეს საფრთხე უშუალოდ არ ემუქრება, თუმცა გლობალური პროცესების გავლენა აქაც აისახება. მთავარი პირობა, რაც რისკს აგვაცილებს, წყლის რესურსის რაციონალური მართვაა.

სამთვიანი კონსულტაციების შემდეგ, ენმ-ს ყოფილმა თავმჯდომარემ ნიკა მელიამ და ოპოზიციონერმა პოლიტიკოსმა ნიკა გვარამიამ პოლიტიკური თანამშრომლობის გადაწყვეტილება მიიღეს - საპარლამენტო არჩევნებში მონაწილოებას კიდევ ერთი პარტია „ახალი" მიიღებს მონაწილეობას. მელია-გვარამიას ერთობა „გამარჯვების სანაცვლოდ, დიდი გაერთიანების მომხრეა" და პირობას დებს, რომ არანაირ წარსულზე არ იქნება საუბარი და მომავლისკენ იქნება ორიენტირებული.

ჩეხეთის პრეზიდენტის პეტრ პაველის განცხადებით, თუ ნატო-ს ჯარები უკრაინას დახმარებას უშუალოდ მის ტერიტორიაზე გაუწევენ, ეს არცერთ საერთაშორისო ნორმას არ დაარღვევს. ექსპერტები ფიქრობენ, რომ ნატოს ჩართვა ომში გამორიცხულია, თუმცა, შესაძლოა შეიქმნას კოალიცია, სადაც დასავლეთის ქვეყნები უკრაინას ჯარით დაეხმარება.

პრემიერ-მინისტრ ირაკლი კობახიძის გადაწყვეტილებით, ქვეყანას ახალი ჯანდაცვის მინისტრი ჰყავს - ფართო კონსულტაციების შედეგად გადაწყდა, რომ ჯანდაცვის უწყებას პარლამენტის ადამიანის უფლებათა დაცვის უფლებათა და სამოქალაქო ინტეგრაციის კომიტეტის თავმჯდომარე მიხეილ სარჯველაძე უხელმძღვანელებს. სარჯველაძემ ამ პოსტზე ზურაბ აზარაშვილი შეცვალა.

რუსეთი, ირანი და ჩრდილოეთ კორეა „ანტიდასავლურ ღერძს" ქმნიან - დასავლური მედია ამაზე უკვე ღიად წერს. მეორეს მხრივ კი, საფრანგეთის ინიციატივაა ისეთი ქვეყნების ალიანსი შექმნა, რომლებიც მზად არიან უკრაინაში ჯარები განათავსონ. ანალიტიკოსები არ გამორიცხავენ, რომ შესაძლოა ეს მოვლენები გლობალური სამხედრო დაპირისპირების წინაპირობა აღმოჩნდეს.