ამერიკული ძალები მიერ ხუთი ირანული ნავთობტანკერის განადგურების საპასუხოდ ირანის ისლამური რევოლუციის გუშაგთა კორპუსმა იორდანიაში, აშშ-ის სამხედრო ბაზებს შეუტია. მსხვერპლის შესახებ ინფორმაცია არ ვრცელდება, თუმცა ამერიკული მედიის ცნობით,მუვაფაკ სალტის საჰაერო ბაზაზე რვა ფ-15 გამანადგურებელი მსუბუქად დაზიანდა, კიდევ ერთ თვითმფრინავს კი ფრთა მოწყდა. ამერიკულებს ირანული თავდასხმის მოსაგერიებლად 30-ზე მეტი „პატრიოტი" დასჭირდათ, რის გამოც აშშ-ის ოფიციალური პირები შეშფოთებას გამოთქვამენ ამ ანტისაჰაერო რაკეტებისა და სხვა ტიპის მაღალტექნოლოგიური საბრძოლო მასალის მარაგების სწრაფად შემცირების გამო.

აშშ-ის სამხედრო გემებზე თავდასხმების გაგრძელების შემთხვევაში, მეტ ირანულ ნავთობტანკერს დავარტყამთ, - ამის შესახებ აშშ-ის სახელმწიფო მდივანმა მარკო რუბიომ განაცხადა. „ირანი ამერიკულ სამხედრო გემებზე თავდასხმების გაგრძელებას ცდილობს და ყოველ ჯერზე, როცა ამას გააკეთებენ ან ამის გაკეთებას შეეცდებიან, ნავთობტანკერებს დაკარგავენ", - განაცხადა რუბიომ.

უკრაინის გენერალური პროკურორი რუსლან კრავჩენკო თანამდებობიდან გადადგა. გადაწყვეტილებას წინ უძღოდა მასშტაბური კორუფციული სკანდალი ოპერაცია „კართაგენის" ირგვლივ, რომლის ფარგლებშიც უწყების მაღალჩინოსანი სერგეი კროპივა („კანცლერი") და მისი პარტნიორი ელიზაბეტა ივახნენკო („მუზა") თაღლითური ქოლ-ცენტრების მფარველობასა და უკანონო შემოსავლების ლეგალიზაციაში მხილების გამო დააკავეს

გერმანიის კანცლერის, ფრიდრიხ მერცის განცხადებით, საქსონია-ანჰალტში ჩატარებულ საპარლამენტო არჩევნებში პარტიის - „ალტერნატივა გერმანიისთვის" გამარჯვებამ მისი პარტია, „ქრისტიან-დემოკრატიული კავშირი" საფუძვლიანად შეარყია და აჩვენა, რომ პარტიაში სერიოზული გადაფასების საჭიროება დადგა, - ინფორმაციას „გარდიანი" გერმანულ მედიაზე დაყრდნობით ავრცელებს.

„ეს ჩვენს პარტიას საფუძვლებამდე არყევს. ჩვენ უბრალოდ ძველებურად ვეღარ გავაგრძელებთ - ვერც მე და ვერც ფედერალური მთავრობა", - განაცხადა მერცმა.

ირანის პარლამენტის თავმჯდომარის, მოჰამედ ბაღერ ღალიბაფის განცხადებით, „სანამ ძალიან გვიან არ არის" აშშ-მა უნდა გაიგოს, რომ თამაშის წესები შეიცვალა. ინფორმაციას „როიტერსი" ავრცელებს. „ამიერიდან, ირანის ინტერესებისა და უსაფრთხოების წინააღმდეგ ნებისმიერ თავდასხმას უფრო სწრაფი, მძიმე და მტკივნეული პასუხი მოჰყვება", - განაცხადა ირანის პარლამენტის თავმჯდომარემ.

ახლო აღმოსავლეთში კონფლიქტის გამო დროებით „გვერდზე გადადებული" უკრაინის საკითხი კვლავ ბრუნდება დღის წესრიგში. აშშ-ის პრეზიდენტის სპეცწარმომადგენლებმა ამ შაბათ-კვირას ახალი სამშიდობო მისია დაიწყეს. არაოფიციალური წყაროებით, ვაშინგტონის ახალი სამშვიდობო ინიციატივა ფრონტის ხაზის დე ფაქტო გაყინვას, უკრაინის ნატო-ში გაწევრიანების პროცესის შეჩერებასა და სანაცვლოდ მისთვის უსაფრთხოების მრავალმხრივ გარანტიებს ითვალისწინებს.

ირანის სამხრეთით, საქორწინო ცერემონიაზე განხორციელებული სასიკვდილო დარტყმა, რასაც 4 ადამიანის სიცოცხლე ემსხვერპლა და 68 დაშავდა, სავარაუდოდ, ამერიკული საბრძოლო მასალის პირდაპირი მოხვედრის შედეგია - ამ დასკვნამდე სამხედრო ექსპერტები "როიტერსის" მიერ ვერიფიცირებული ვიზუალური მასალის ანალიზის საფუძველზე მივიდნენ.

კიევის ცენტრში უკრაინის უსაფრთხოების სამსახურსა და სამხედრო დაზვერვას შორის მომხდარ სროლასა და ოფიცრის სავარაუდო გატაცებას პირველი საკადრო წმენდა და მაღალჩინოსნის გათავისუფლება მოჰყვა - ვოლოდიმირ ზელენსკიმ ინციდენტს „აბსოლუტურად სამარცხვინო" უწოდა და მასშტაბური გამოძიება დააანონსა.

მოსკოვის აეროპორტებში ასობით რეისი გადაიდო და გაუქმდა, რასაც წინ ზელენსკის მიერ რუსეთის საჰაერო სივრცის უსაფრთხოების შესახებ გაკეთებული გაფრთხილება უძღოდა. შექმნილი რისკების გამო უცხოურმა ავიაკომპანიებმა ფრენების შეჩერება დაიწყეს. კიევმა საერთაშორისო საავიაციო ორგანიზაციას რუსეთის ცის ჩაკეტვისკენ მოუწოდა, რაც ანალიტიკოსების შეფასებით, კრემლზე წნეხის ახალი სტრატეგიაა.

რუსეთი სომხეთიდან, სადაც გიუმრიში რუსული ბაზაა განთავსებული, ხვალვე გავა, თუ ერევანი სამხედრო ბაზას არასაჭიროდ ჩათვლის, - ამის შესახებ რუსეთის პრეზიდენტმა ვლადიმერ პუტინმა განაცხადა. „თუ სომხეთი მიიჩნევს, რომ რუსული სამხედრო ბაზა სომხეთში საჭირო აღარაა, ჩვენ ხვალვე გავალთ. მაგრამ, სომხეთი მზად არის ამისთვის? ჩვენ არავის არაფერს ვახვევთ თავს", - განუცხადა პუტინმა ჟურნალისტებს.

გერმანიაში მომხდარი ინციდენტისა და რუსული ჰიბრიდული საფრთხეების ფონზე, ევროკავშირი მოსკოვზე ზეწოლას ამკაცრებს. ირლანდიაში შეკრებილი დიპლომატები ახალ სანქციებს, უკრაინის ცის ჩაკეტვასა და რუსეთის გაყინული აქტივების გამოყენებას განიხილავენ.

ახლო აღმოსავლეთში მზარდი დაძაბულობისა და უკრაინაში მიმდინარე ომის ფონზე, ჩინეთისა და რუსეთის ლიდერები სტრატეგიული ალიანსის გაღრმავებაზე კიდევ ერთხელ შეთანხმდნენ. ბიშკეკში, შანხაის თანამშრომლობის ორგანიზაციის სამიტზე, სი ძინპინმა და ვლადიმერ პუტინმა ყურადღება ეკონომიკურ პარტნიორობასა და „ციმბირის ძალა-2"-ის პროექტზე ყურადღება გაამახვილეს.