შუა დერეფნის საშუალებით, საქართველოს საზღვაო პორტებში დამატებითი ტვირთი თურქმენეთიდან და

ცენტრალური აზიის სხვა ქვეყნებიდან შემოვა. შედეგად, საქართველოსა და თურქმენეთს შორის სატრანზიტო-ლოგისტიკური მიმართულებით თანამშრომლობა გაღრმავდება. რაც მთავარია, საქართველო ხელს შეუწყობს თურქმენული გაზის ტრანსპორტირება ჩვენი ქვეყნის ტერიტორიის გავლით. ესაა ის მნიშვნელოვანი ეკონომიკური გადაწყვეტილებები, რაც საქართველოს პრემიერ-მინისტრის, ირაკლი კობახიძის თურქმენეთში ოფიციალურ ვიზიტს მოჰყვება. ეკონომისტების  განცხადებით, ყველა ეს პროექტი რეალურია, რადგან აღმოსავლეთსა და დასავლეთს შორის, საქართველოს ბუნებრივი და მნიშვნელოვანი გზაჯვარედინის ფუნქცია აქვს. 

საქართველოს მთავრობის გადაწყვეტილებით, არსენალის მთაზე სამთავრობო ქალაქის მშენებლობა იგეგმება, სადაც განთავსდება როგორც სამინისტროები, ასევე მერია, მთავრობის ადმინისტრაცია და საქართველოს პარლამენტი. სპეციალისტები მთავრობის ამ გადაწყვეტილებას პოზიტიურად აფასებენ, რადგან სამთავრობო ქალაქის მოწყობით, დედაქალაქი განიტვირთება, თუმცა იმავდროულად რისკებზეც ამახვილებენ ყურადღებას. ურბანისტების განცხადებით, სამთავრობო ქალაქის მოწყობა, თავისი გამართული ინფრასტრუქტურით, საკმაოდ ძვირადღირებული პროექტია, შესაბამისად, ეჭვობენ, ღირს თუ არა ამ პროექტის განხორციელება? 

დაურეგისტრირებელი მიწების საკითხი საბოლოოდ ვერ მოგვარდა, ჯერ კიდევ  გაურკვეველია, ასეთ მიწებს რა ელის და დაიკანონებს თუ არა სახელმწიფო. მთავრობამ მაქსიმალურად შეუწყო ხელი მოქალაქეებს, რათა  მიწები დაეკანონებანათ, მაგრამ პროგრამით ბევრმა მაინც ვერ და არ ისარგებლა. ამ ეტაპზე მთავრობას გადაწყვეტილი არ აქვს, რა ქმედითი ნაბიჯი გადაიდგმება დაურეგისტრირებელ მიწებთან დაკავშირებით. 

მესამე კვარტალში კვარტალში საქართველოში ორჯერ მეტი პირდაპირი უცხოური ინვესტიცია შემოვიდა, გასული წლის ანალოგიურ პერიოდთან შედარებით. არადა, შარშან - საპარლამენტო, წელს კი - ადგილობრივი თვითმმართველობის არჩევნები ჩატარდა. პარალელურად, ქვეყნის მთავარ გამზირზე ზუსტად ერთი წელია, ე.წ. უწყვეტი საპროტესტო აქცია მიმდინარეობს. ხელოვნურად შექმნილი დაძაბულობის მიუხედავად, ფაქტია, ქვეყნის ეკონომიკა სტაბილურად ვითარდება და როგორც ეკონომისტები აცხადებენ, სწორედ ამ ფაქტორმა განაპირობა უცხოური ინვესტიციების ზრდა. ყველაზე მნიშვნელოვანი კი ქვეყნის ხელისუფლების გაცხადებული პოლიტიკაა -  ომის ნაცვლად მშვიდობა - რასაც ინვესტიციების მოცულობის მკვეთრი ზრდა მოჰყვა. 

ამორტიზირებული სატრანსპორტო საშუალებებისგან საპარკინგე ტერიტორიების გაწმენდა დაიწყო. საწყის ეტაპზე პროგრამა რეგიონში, კერძოდ, ბათუმში ამოქმედდა. პრობლემა საქართველოს ყველა ქალაქს თანაბრად აწუხებს. სატრანსპორტო სფეროს სპეციალისტები აღნიშნულ ფაქტს მიესალმებიან და აცხადებენ, რომ ეს ნაბიჯი ცოტათი მაინც განტვირთავს საგზაო მოძრაობას, თუმცა, მთავარია, აღსრულება, მოსახლეობისთვის უმტკივნეულოდ მოხდეს.

კომუნალური გადასახადების გაძვირება გადაწყვეტილია. არჩევნები დასრულდა და ტარიფების გაზრდის საკითხი გააქტიურდა. რას ეფუძნება მოსალოდნელი ცვლილება, ენერგეტიკოსები ჯერჯერობით ვერ აკონკრეტებენ, მაგრამ თამამად ამბობენ, რომ დაახლოებით 2 წლის წინ ელექტროენერგიის გადასახადის 3 თეთრით შემცირებით შეცდომა დაუშვეს და ახლა დენის ტარიფი, სავარაუდოდ, იმავე  მაჩვენებლით მოიმატებს. ასევე გაიზრდება გაზის გადასახადიც, რაც რამდენიმე დღის წინ სემეკშიც დაადასტურეს.

საქართველო-ისრაელს შორის სოფლის მეურნეობის სფეროში თანამშრომლობის ახალი ეტაპი დაიწყო. გარემოს დაცვისა და სოფლის მეურნეობის მინისტრის დავით სონღულაშვილის ისრაელში ვიზიტისას სწორედ ქვეყნებს შორის პარტნიორობასა და სავაჭრო-ეკონომიკური ურთიერთობების გაღრმავებაზე გამახვილდა ყურადღება. წლებია საქართველო და ისრაელი აგრარულ სფეროში საკმაოდ მჭიდროდ თანამშრომლობენ. ექსპორტის გაზრდა, სავაჭრო-ეკონომიკური ურთიერთობების გაღრმავება,  ინვესტიციები, კლიმატის ცვლილება, გლობალური გამოწვევების დაძლევა - ეს ორი ქვეყნის მაღალი თანამდებობის პირთა შეხვედრის მთავარი საკითხები იყო. 

კონკურენციისა და მომხმარებლის დაცვის სააგენტომ სამშენებლო ზედამხედველობაზე გამოცხადებულ ტენდერებში მონაწილე 11 კომპანიის მიმართ მოკვლევა დაიწყო. უწყების ინფორმაციით, საქმე ეხება 2022-2025 წლებში გამოცხადებულ ტენდერებში სავარაუდო შეთანხმებული ქმედებების ფაქტებს. ირკვევა, რომ ირაკლი ლექვინაძის უწყებამ მოკვლევა რეგიონული განვითარების სამინისტროს მიმართვის საფუძველზე დაიწყო. დარგის სპეციალისტები აღნიშნავენ, რომ კახაბერ გულედანს კონკურენციის სააგენტოსთვის კი არა, შეეძლო, პირდაპირ პროკურატურისთვის მიემართა. 

1-ლი დეკემბრიდან, საქართველოს მოქალაქეებისთვის პოლონეთში გამარტივებული გზით სამუშაო ვიზის მიღების შესაძლებლობა გაუქმდა. ხელისუფლების მოწინააღმდეგეებმა ეს მაშინვე საქართველოს ხელისუფლების „ანტიევროპულ“ ნაბიჯებს დაუკავშირეს, არადა სინამდვილეში პოლონეთი, როგორც ევროკავშირის წევრი ქვეყანა, ვალდებულია, ევროპარლამენტის მიღებულ კანონებს დაემორჩილოს. სიმართლე უნდა ითქვას, რომ ჩვენი თანამემამულეების დიდი ნაწილი პოლონეთის მთავრობას ბევრ პრობლემას უქმნიდა.

ინფლაციამ პიკი გაიარა. ზედიზედ 6 თვის განმავლობაში ტრენდი მზარდი იყო, თუმცა ნოემბერში გეზი კლებისკენ იცვალა.  სპეციალისტები აზრით, არსებული სტატისტიკა მანიშნებელია, რომ ინფლაცია  გარკვეულ დროში ნორმალიზდება. თუმცა, ისიც უნდა ითქვას, რომ პირველად მოხმარების საქონელი ძვირდება, ასევე მედიკამენტები და კლინიკების მომსახურება, რაც ვითარებას ამძიმებს.

მომავალი წლიდან სოციალურად დაუცველების დასაქმების სახელმწიფო პროგრამა აღარ გაგრძელდება. შეწყვეტის ერთ-ერთი მიზეზი ისაა, რომ პროექტი ოთხწლიანი იყო, და ვადა ეწურება. მთავრობის განმარტებით, ამას თან ერთვის ის გარემოებაც, რომ პანდემიის შემდეგ ბიზნესი გააქტიურდა, მუშახელის ძიებაშია. ეკონომისტები აღნიშნული პროგრამის გაუქმებას მიესალმებიან, რადგან მიიჩნევენ, რომ პროექტმა ვერ გაამართლა. 

აზერბაიჯანიდან, წლიურ 500 მილიონ კუბურ მეტრ ბუნებრივ აირს 2026 წლის ბოლომდე მივიღებთ. ხელშეკრულების ვადა, სწორედ 2026 წლის ბოლოს იწურება, თუმცა განახლებულ პირობებზე მთავრობა მოლაპარაკებებს უკვე მართავს. ენერგეტიკოსების განცხადებით, საქართველოსა და აზერბაიჯანის მთავრობათა შორის, საკმაოდ ინტენსიურია კომუნიკაცია და რადგანაც აზერბაიჯანი საქართველოს სტრატეგიული პარტნიორია, ამიტომ გაზის გატარებაც და შესყიდვაც ამ ჭრილში განიხილება.