ონლაინ მაღაზიებსა და კომპანიებში მომხმარებლების მოტყუების ფაქტები მატულობს. მიუხედავად იმისა, რომ ქვეყანამ  მომხმარებლის უფლებების დამცავი კანონი მიიღო, ამან, ფაქტობრივად, ვერანაირი შედეგი გამოიღო. მიუხედავად იმისა, რომ კონკურენციის სააგენტოს საკმაოდ ბევრი დაზარალებული მიმართავს, პარალელურად დანაშაულებრივმა სქემებმა იმდანად ტოტალური სახე მიიღო, რომ ფაქტების დიდი ნაწილი უფლებადამცველებამდე ვერ აღწევს. გარდა ამისა, მოხმარებელთა უმეტესობას საკუთარი უფლებების შესახებ წარმოდგენაც არ აქვს და ჩუმადაა.

საქართველოში კადრების პრობლემა ისევ მწვავეა. პრობლემის დაძლევა, რომელიც საკმაოდ მასშტაბურია, ჯერჯერობით ვერ ხერხდება, ამიტომ კერძო სექტორს კვალიფიციური თუ არაკვალიფიციური მუშახელის პრობლემა უდგას. ამ ფონზე ქვეყანაში პროფესიულ განათლებას ნაკლები ყურადღება ექცევა და ახალგაზრდების უმეტესობა საკუთარ არჩევანს უმაღლეს სასწავლებლებზე აკეთებს, არადა ბიზნესს, ძირითადად, ისეთი კადრები სჭირდება, რომელთა მომზადება პროფესიულ კოლეჯებშია შესაძლებელი.

საერთაშორისო ბაზარზე ნავთობის ფასი იზრდება. ერთი ბარელის ღირებულებამ თითქმის 90 დოლარს მიაღწია. ეს ერთ თვეში ღირებულების დაახლოებით 16-17%-იან მატებას ნიშნავს. მსოფლიოში დაძაბული პოლიტიკური გარემო, პირველ რიგში, სწორედ შავი ოქროს ფასზე ახდენს გავლენას, ამიტომ ახლო მომავალში დამაიმედებელი არაფერი იკვეთება. საინტერესოა, გლობალურ ტენდენციას ექნება თუ არა გავლენა საქართველოზე მით უმეტეს მაშინ, როდესაც ქვეყანას, რუსეთის გადაწყვეტილების გამო, ბენზინის ექსპორტი შეეზღუდა.

სამედიცინო დაწესებულებებში დიდი კორუფციაა. ფაქტობრივად, ყველა რგოლში სერიოზული დარღვევებია, რაც სახელმწიფოს მხრიდან უმკაცრესი ზომების გატარებას მოითხოვს. არის არაერთი დარღვევა, რაც პირდაპირ უკავშირდება პაციენტების ჯანმრთელობას და მატერიალურ ყოფას, ვინაიდან უკვე ფართომასშტაბიანი სახე მიიღო. გარდაცვლილი პაციენტები პირდაპირ ადანაშაულებენ მედპეროსნალს ფატალური შედეგების გამო, რაც დადასტურდა კიდეც, მაგრამ გამოსწორების პერსპექტივა ჯერჯერობით არ ჩანს.

განახლებადი ელექტროენერგიის განვითარების კუთხით საქართველო მნიშვნელოვან ნაბიჯებს დგამს. სპეციალისტების შეფასებით, ხელშესახები შედეგი საქართველოს ენერგეტიკულ სისტემაში უახლოეს 2-3 წელიწადში ექნება, თუმცა მდგომარეობის არსებით გაუმჯობესებას გაცილებით ხანგრძლივი პერიოდი სჭირდება, მით უმეტეს, რომ მსხვილი ენერგეტიკული პროექტების განხორციელება მხოლოდ გრძელვადიან პერსპექტივაშია ნავარაუდევი.

საქართველოს ფეხბურთის ეროვნული ნაკრების ისტორიული გამარჯვების შემდეგ, გერმანიის მიმართულებით ავიაბილეთები და ტურისტული პაკეტები სწრაფად ძვირდება. პარალელურად მატულობს მატჩზე დასასწრები ბილეთების ღირებულებაც.

მთავრობა სტუდენტებს სახელმწიფო სექტორში ანაზღაურებად სტაჟირებას სთავაზობს. პარალელურად მიმდინარეობს მოლაპარაკება კერძო სექტორთან. სტუდენტთა შერჩევის კრიტერიუმები უკვე ცნობილია და ახლა საინტერესოა, მათი მხრიდან რამდენად დიდი იქნება დაინტერესება. განათლების ექსპერტები ამბობენ, რომ სტუდენტები შეთავაზებას გამოიყენებენ, უბრალოდ, სტაჟირების პროგრამა ხელი არ უნდა შეუშალოს სწავლის შემდგომ საფეხურებს.

საქართველოში ექთნების დეფიციტი იმდენად მწვავეა, რომ  უკვე სამედიცინო პროცედურების ჩატარების პრობლემა დადგა კლინიკებში. მართალია, მათთვს მინიმალური სახელფასო განაკვეთი განსაზღვრა, მაგრამ პრობლემას ვერც ამან უშველა. როგორც სპეციალისტები აღნიშნავენ, ექთნების შრომის ანაზღაურება კვლავ დაბალია იმისათვის, რომ დასაქმების მოტივაცია გაჩნდეს. შესაბამისად, აშკარაა კადრების გადინება, ექთნები მიდიან უცხოეთში სამუშაოდ და მათი ჩამნაცვლებელი საქართველოში არავინაა.

სხვადასხვა საერთაშორისო საფინანსო ორგანიზაცია საქართველოსთან დაკავშირებით მოლოდინს აუმჯობესებს. მათი მხრიდან, არჩევნების წელს, იზრდება ეკონომიკური ზრდის პროგნოზი და ანალიტიკოსები ფიქრობენ, რომ ქვეყანაში რაიმე მიმართულებით მდგომარეობა არ გაუარესდება. ეს ნიშნავს, რომ მინიმუმ ისეთივე სტაბილური მოცემულობა იქნება, როგორიც საქართველოში ბოლო პერიოდშია.

ბიზნესის დიდი ნაწილი ლარის მეტად გაუფასურებას აღარ ელის. ასეთი მოლოდინია კერძო სექტორში, რასაც ეკონომისტებიც იზიარებენ და ამბობენ, რომ რეფინანსირების განაკვეთის ყველაზე მაღალი ბიჯის შემცირების შემდეგ ლარის გაუფასურება დროებითი ფაქტორია, ამიტომ კურსი სტაბილური იქნება.

ბიზნესი სხვადასხვა სექტორში 48-საათიანი სამუშაო კვირის დაბრუნებას ითხოვს. საუბარია ისეთ მიმართულებებზე, სადაც კადრების განსაკუთრებული დეფიტიცია. სწორედ სამუშაო ძალიან ნაკლებობისა და კვალიფიციური მუშახელის სიმცირით ხსნის კერძო სექტორი ამ მოთხოვნას, თუმცა ადამიანთა უფლებების დამცველები ამბობენ, რომ მსგვასი გადაწყვეტილება მხოლოდ და მხოლოდ დაამძიმებს დასაქმებულთა მდგომარეობას.

მოსავლიანობის კუთხით წელს, სავარაუდოდ, მნიშვნელოვანი ზრდა არის მოსალოდნელი.  ამის პირობას იძლევა  სოფლის მეურნეობის მხარდამჭერი პროგრამები და, თავის მხრივ, გააქტიურებული ფერმერული საქმიანობა. მთავარია, ამ ყველაფერს ბუნებამაც შეუწყო ხელი, სხვა წინააღმდეგობა რეგიონების მოსახლეობას, ფაქტობრივად, არ აქვს, რაზეც უკვე თამამად საუბრობენ და აცხადებენ, რომ საგაზაფხულო სამუშაოებისთვის თადარიგი უკვე დაიჭირეს.