„ნაციონალური მოძრაობის" პიარს წინასაარჩევნოდ კვლავ ამერიკელი პიარ-კონსულტანტი ჯერემი როზნერი გაუძღვება. ოპოზიციურმა პარტიამ გეგმის  ნაწილის შესრულება კახეთიდან დაიწყო - „დიდი პრობლემა“, „ქვეყანა იცლება, ეკონომიკა ჩიხშია“, გაზეთები და პოსტერები ამ გზავნილებით ოპოზიციური პარტიის წევრებმა თელავში დაარიგეს.  

რუსეთის მისამართით საფრანგეთის პრეზიდენტის პოზიციები თანდათან უფრო ხისტი ხდება - ემანუელ მაკრონმა ვრცელ ინტერვიუში გააფრთხილა დასავლეთის ქვეყნები, რომ არ გამოავლინონ სისუსტე მოსკოვის მიმართ. ის კვლავ იმ აზრზეა, რომ საფრანგეთი არასოდეს წამოიწყებს შეტევას რუსეთის წინააღმდეგ, თუმცა უკრაინაში დასავლათის ჯარების გაგზავნის შესაძლებლობა არ უნდა გამოირიცხოს. მას არ დაუკონკრეტებია თუ რა ფორმით შეიძლება მოხდეს უკრაინაში ჯარის განლაგება, თუმცა დაამატა, რომ დღეს ამის საჭიროება არაა.

„არჩევნები, რომელიც რუსეთში მიმდინარეობს, არის ფორმალობა. 94 000 საარჩევნო უბანზე დანიშნულია მილიონამდე ასეთივე კორუმპირებული, კარგად გაფრთხილებული და დატრენინგებული პუტინის მომხრე. ისინი ყველაფერს გააკეთებენ, რომ თუნდაც არ მივიდეს ხალხი არჩევნებზე, აიღებენ ხმებს და მაინც ჩაყრიან საარჩევნო ყუთში. „გამარჯვების" შემდგომ, პუტინმა შესაძლოა შემდეგ უფრო გააქტიუროს უკრაინაში საომარი მოქმედებები," - აცხადებს ანალიტიკოსი კახა გოგოლაშვილი „რეზონანსთან" რუსეთში არჩევნების სავარაუდო შედეგებზე საუბრისასა. მისი თქმით, კრემლი ყველანაირად ეცდება ყველანაირი პროტესტის ჩახშობას.

პრემიერ-მინისტრი ირაკლი კობახიძე ბრიუსელის შემდეგ, ვიზიტებს მეზობელ ქვეყნებში გეგმავს - შაბათს აზერბაიჯანს ეწვევა, ერთ კვირაში კი მოჰყვება ვიზიტი სომხეთში. როგორც პრემიერმა აღნიშნა, მეზობელ ქვეყნებში ვიზიტების ერთ-ერთი საკითხი რეგიონში მშვიდობის შენარჩუნება იქნება, რაშიც საქართველო ყოველთვის მნიშვნელოვან როლს ასრულებდა.

ავტომობილების რეექსპორტის მიმართულებით სიტუაცია შეიცვალა. როგორც ჩანს, ყირგიზმა და ყაზახმა დილერებმა ბაზარი კარგად შეისწავლეს და ქართველი კონკურენტების განზე გაწევაც მოახერხეს. სფეროს წარმომადგენლები ფიქრობენ, რომ თუ ასე გაგრძელდა, შესაძლოა, შუა აზიელებმა ჩვენი ბაზარის მონოპოლიზებასც მოახდინონ.

რეფინანსირების განაკვეთის 0.75%-ით დაწევის შემდეგ, ლარი 5 პუნქტით გაუფასურდა. თუკი ეროვნული ბანკის გადაწყვეტილების მიღებამდე "ბლუმბერგის” სავაჭრო პლატფორმაზე კურსი 2.65-ის ფარგლებში იყო, გუშინ დღის ბოლოს 2.70-ს მიაღწია. ეკონომისტებს გაუფასურების მიზეზზე საუბარი უჭირთ, რადგან ქვეყანაში არაფერი ხდება ისეთი, რაც კურსზე უარყოფითად იმოქმედებს. ამიტომ შესაძლოა, სწორედ სებ-ის მონეტარული პოლიტიკის არატრადიციული შერბილება იყოს მიზეზი. 

უახლოეს მომავალში საქართველოს ნატოს გენდივანი ეწვევა - ამის შესახებ იენს სტოლტენბერგმა პრესკონფერენციაზე თავად განაცხადა და დასძინა, რომ ვიზიტის მიზანია გაძლიერდეს პარტნიორობა. კავკასიის საერთაშორისო უნივერსიტეტის პროფესორი ვახტანგ მაისაია „რეზონანსთან" ამბობს, რომ დღევანდელი გლობალური გამოწვევების ფონზე სტოლტენბერგის გადაწყვეტილება „კარგი ჟესტია."

საქართველოში ყოველწლიურად ბუნებრივი აირის გაჟონვის გამო მძლავრი აფეთქება ხდება. გუშინდელ შემთხვევას, საბედნიეროდ, მსხვერპლით არ ჩაუვლია, მაგრამ ქვეყანას არა ერთი ტრაგედია ახსოვს გაზის აფეთქების გამო. სფეროს ექსპეტრები ამბობენ, რომ ასეთი ფაქტები დაუდევრობის გამო ხდება, რადგან ქვეყანაში არ არის შესაბამისი კონტროლი.

როგორ დალაგდება პოლიტიკური სპექტრი და როგორ გადანაწილდება ხმები არჩევნებში, ამ საკითხებზე „რეზონანსი" პოლიტოლოგ იგორ კვესელავას ესაუბრა, რომელიც ვარაუდობს, რომ უახლოეს მომავალში მელია, გვარამია და სააკაშვილი ერთად იქნებიან. იგი არც იმას გამორიცხავს, რომ პრეზიდენტმა სააკაშვილი შეიწყალოს.

ვინ ითხოვს სასამართლო სისტემის გაკონტროლებას? რა სახით შეიძლება გატარდეს საქართველოში ევროკომისიის მოთხოვნებში არსებული მართლმსაჯულების რეფორმა? ამ თემის ირგვლივ პოლიტიკური დაპირისპირება არ ცხრება. ის პოლიტიკურ საზღვრებს გასცდა და ამ პოლემიკაში როგორც მოსამართლეები, ასევე არასამთავრობო ორგანიზაციები ჩართვნენ. 

„ნაცმოძრაობა" ფასების კამპანიას აგრძელებს, ამჯერად აქცენტი საწვავზეა, მანამდე კი საკვები პროდუქტების ფასების შესადარებლად პარტიის თავმჯდომარე ლევან ხაბეიშვილი თურქეთში იყო გადასული, სადაც თქვა, რომ იქ პროდუქცია „ორჯერ უფრო იაფია, ვიდრე საქართველოში". „ოცნება" აცხადებს, რომ „ნაცმოძრაობამ" საზოგადოების დასარწმუნებლად სოციალურ ქსელებში რეკლამაში ასი ათასობით დოლარი დახარჯა და ეჭვობს, რომ ამით „ფსევდოლიბერალური პროპაგანდის" წინააღმდეგ კანონპროექტის გადაფარვას ცდილობს.

ევროპარლამენტმა სომხეთის ევროკავშირში შესაძლო გაწევრიანებას მხარი დაუჭირა - გამოდიან შეთავაზებით, ბლოკმა განიხილოს სომხეთის კანდიდატის სტატუსის მინიჭების შესაძლებლობა. როგორც თსუ-ს პროფესორი და ანალიტიკოსი კორნელი კაკაჩია „რეზონანსთან" აცხადებს, ეს მხოლოდ მოწოდებაა, თუმცა თუ სომხეთმა ევროკავშირში ინტეგრაციისკენ ნაბიჯები გადადგა, ეს საქართველოს ევროპერსპექტივისთვის დადებითი მომენტია, რადგან რეგონში ევროპული ამბიციების მქონე ორი ქვეყანა იქნება.