დიდხნიანი პაუზის შემდეგ ბაქო-თბილისის სამგზავრო მატარებლით მიმოსვლა განახლდება. ორ ქვეყანას შორის სარკინიგზო კავშირი მაისის მოხდება, რაც პანდემიის დაწყების შემდეგ შეზღუდული გაწყვეტილი იყო. საქართველო-აზერბაიჯანს შორის მიმოსვლის განახლებას ექსპეტრები დადებითად აფასებენ და თანაც ხაზს უსვამენ, რომ ეს გადაწყვეტილება სხვადასხვა პოზიტიურ ეკონომიკურ ძვრებს გამოიწვევს. 

მართვის მოწმობის ორეტაპიანი გამოცდის დაწესებამ მოქალაქეებს გამოცდების ჩაბარების პროცესი ძალიან გაურთულა. როგორც ავტოსკოლების წარმომადგენლები აცხადებენ, 100-დან 10 ადამიანიც ვერ აბარებს გამოცდას პირველივე ჯერზე, რაც ზოგადად გამოცდების პროცედურას უკავშირდება და სერიოზულ დაბრკოლებას ქმნის. მთავარი პრობლემა, რაზეც სპეციალისტები ყურადრებას ამახვილებენ, ერთიანი სტანდარტის არქონაა. სხვადასხვა ქალაქში განსხვავებული სირთულის გამოცდებია. 

საქართველოს კიდევ ხორბლის ერთი მომწოდებელი ქვეყანა შეემატება. როგორც ცნობილია, ყაზახეთი ხორბლის ექსპორტის სუბსიდირებას გეგმავს. ეს ნიშნავს, რომ ქვეყანაში ყაზახური ხორბლის იმპორტი უპრობლემოდ განხორციელდება, რაც აქამდე ტრანსპორტირების მაღალი ხარჯისა და ბიუროკრატიული შეზღუდვის გამო ვერ ხერხდებოდა. მიზეზი ამ ეტაპზე ყაზახეთში ჭარბი მოსავალია და ქვეყანა ცდილობს შეუფერხებლად შეძლოს მარცვლელულის რეალიზაცია, რაც საქართველოსთვის საუკეთესო შანსია, დამატებით ახალ ბაზარზე წვდომა გაიმარტივოს.

ევროპარლამენტის მიერ მიღებულ რეზოლუცია საქართველოს საფინანსო სექტორისა და ეკონომიკისთვის სერიოზულ რისკს შეიცავს. განსაკუთრებით ეროვნული ბანკის პრეზიდენტის ნათია თურნავას შეყვანა დასანქცირებულთა სიაში. სპეციალისტებისთვის უცნობია, რატომ მოხვდა ამ სიაში თურნავა, თუმცა აცხადებენ, რომ გადაწყვეტილება ცუდად იმოქმედებს ლარის კურსზე და შესაბამისად, მოსახლეობის კეთილდღეობაზეც ნეგატიურად აისახება, ვინაიდან მიზანმიმართულად ხდება შეტევა საქართველოს ეკონომიკასა და ეროვნულ ვალუტაზე.

ქვეყანაში შექმნილმა პოლიტიკურმა დაძაბულობამ უძრავი ქონების ბაზარზე უარყოფითი გავლენა მოახდინა. პროცესი განსაკუთრებით უარყოფითად ბინების რეალიზაციაზე აისახა. მართალია გაიაფება არ მომხდარა, მაგრამ ფაქტია, გაყიდვის პროცესი ბროკერებისთვის გართულდა და მყიდველთა მოზიდვა და მოძიება გაჭირდა. განსაკუთრებით პრობლემურია იმ კომპანიების მუშაობა, რომლებიც უცხოელ მომხმარებლებზე გადიოდნენ. ამ სეგმენტში დიდი ვარდნაა. 

ინფრასტრუქტურული პროექტების განხორციელებას საფრთხე არ ემუქრება. იქიდან გამომდინარე, რომ ყველა მასშტაბური პროექტის მიღმა მსხვილი ფინანსური ინსტიტუტები დგანან და ნაწილიც ბიუჯეტიდან ფინანსდება, ევროკავშირიდან გრანტების შეჩერების შემთხვევაშიც კი, ინფრასტრუქტურული პროექტები ჩვეულებრივ განხორციელდება. როგორც სპეციალისტები აცხადებენ, მათი შესაძლო შეჩერების შესახებ ინფორმაციის გავრცელება ცრუ ნარატივს ემსახურება და საფუძველს მოკლებულია.

პენსია და მასთან დაკავშირებული საკითხები საზოგადოებისთვის აქტუალური პრობლემაა. საქართველოში პენსიის მიმღებთა შორის 70.8 პროცენტი ქალია, ხოლო 29.2 პროცენტი - კაცი. სხვაობა საკმაოდ დიდია. გამომწვევი მიზეზები კი სხვადასხვა, მათ შორის ასაკობრივი ზღვარიც, რითაც ქალისა და მამაკაცის საპენსიო ასაკი განისაზღვრება. ამ კუთხით თანასწორობა დაცული არაა. თანაც, თუ სტატისტიკას დავეყრდნობით, მამაკაცების სიცოცხლის ხანგრძლივობა გაცილებით ნაკლებია, ვიდრე ქალების. 

პოლიტიკური დაძაბულობის მიუხედავად, ეკონომიკა აქტიურობას ინარჩუნებს და ლარის კურსიც სტაბილურია. ეკონომისტები ამის მიზეზად ბიზნესის განწყობას ასახელებენ და თვლიან, რომ სექტორი ქვეყანაში არსებულ სიტუაციას შეეგუა. შესაბამისად, სექტორი უფრო გამოცოცხლდა და სამეწარმეო საქმიანობასაც თამამად აგრძელებს. ყოველ შემთხვევაში, დაბრკოლება ნაკლებადაა, თუმცა გარკვეული გამოწვევაა იმ კუთხით, რომ ახალი პროექტების განხორციელებას და გაფართოებას კომპანიები ჯერჯერობით ვერ ახერხებენ. 

თბილისის ცენტრალურ უბნებში გაზის გათიშვა დიდი ალბათობით მაგისტრალური ქსელების პრობლემას უკავშირდებოდა. მართალია, კომპანიამ განცხადება გააკეთა და ,,მესამე პირის“ ბრალეულობაზე მიანიშნა, თუმცა არსებობს სხვა მყარი არგუმენტიც, რასაც სპეციალისტები ცენტრალური ქსელების სიძველით ხსნიან. რა თქმა უნდა  მოსალოდნელია მდგომარეობა კიდევ უფრო დამძიმება, რასაც გაზის ავარიული გათიშვის გახშირებაც მოჰყვება.

კერძო სკოლებზე გადასახადები ყოველწლიურად მზარდია. სასკოლო ინფრასტრუქტურა, შემეცნებითი წრეები, მოსწავლეთა მცირე კონტიგენტი და ბევრი სხვა რამ მშობლებისთვის მისაღებია. მიუხედავად კომფორტისა, საჯარო და კერძო სკოლები სწავლის დონით ერთმანეთისაგან არ განსხვავდებიან და მოსწავლეებს ეროვნულ გამოცდებზე ერთნაირი შედეგები აქვთ. საინტერესოა, რამდენად შეესაბამება კერძო სკოლებში არსებული გადასახადები სწავლის ხარისხს? ფაქტია, საქართველოში სწავლების დონე არ ამაღლებულა. კერძო სკოლის აბიტურიენტებსაც, საჯაროს მსგავსად, რეპეტიტორთან მომზადება სჭირდება. 

ტურიზმიდან მიღებული შემოსავლები გაიზარდა. ქვეყანაში არსებული პოლიტიკური დაძაბულობის მიუხედავად, სექტორი სტაბილურობას მეტ-ნაკლებად ინარჩუნებს. ამას მოწმობს საინვესტიციო ბანკ "გალტ ენდ თაგარტის" კვლევა, რომლის თანახმადაც, 2025 წლის იანვარში, საქართველომ ტურიზმიდან 290 მილიონი დოლარის შემოსავალი მიიღო, რაც 1.4%-ით გაზრდილი მაჩვენებელია. ტურიზმის სფეროს წარმომადგენლებს არაერთგვაროვანი მოსაზრებები აქვთ. ნაწილი სტატისტიკას დამაჯერებლად მიიჩნევს, ნაწილიც სკეპტიკურადაა განწყობილი.

"იუესაიდის" დახურვით საქართველოს ეკონომიკა არანაირად არ დაზარალდება, თუმცა არასასმთავრობო სექტორის საქმიანობაზე მკვეთრად უარყოფით გავლენას მოახდენს. როგორც ანალიტიკოსები აღნიშნავენ, ბიუჯეტში მთელი გრანტების მოცულობა 1%-ს არ აჭარბებს და დიდად დანაკარგიც არ იქნება. რაც შეეხება ეკონომიკურ და სოციალურ პროექტებს, მათი დაფინანსება თავისუფლად შეიძლება ბიუჯეტიდან მოხერხდეს.