პოლონეთის პრემიერი აცხადებს, რომ უკრაინას იარაღს აღარ მიაწვდის. მატეუშ მორავეცკის თქმით, სანაცვლოდ, პოლონეთი ყურადღებას საკუთარი ქვეყნის უფრო თანამედროვე იარაღით შეიარაღებაზე გაამახვილებს. ორ ქვეყანაშ შორის დაძაბულობა მას შემდეგ გამწვავდა, რაც უკრაინული მარცვლეულის აკრძალვის გამო ზელენსკიმ გაეროს გენერალურ ასამბლეაზე პოლონეთის შესახებ ირიბად აღნიშნა, რომ შესაძლოა „ზოგიერთი ქვეყანა ევროპაში რუსულ თამაშს თამაშობდეს".

ყარაბაღის თვითგამოცხადებულმა რესპუბლიკამ აზერბაიჯანის სამხედრო ზეწოლას ვერ გაუძლო და პრინციპში სრული - სამხედრო და პოლიტიკური კაპიტულაცია გამოაცხადა. სომხეთის საზოგადოების დიდი ნაწილი ამაში ყოფილ მოკავშირეს, რუსეთს ადანაშაულებს, რომელსაც ბრალს სდებენ ბაქოსა და ანკარასთან ფარულ გარიგებაში, პრო-პუტინისტური ძალები კი ხელს ფაშინიანისკენ იშვერენ, რომელმაც პროდასავლური ორიენტირი აირჩია. პარალელურად, დაიწყო აქციებიე ერევანში და არავის ეჭვი არ ეპარება, რომ რუსეთი ფაშინიანის მთავრობის დამხობას შეეცდება.

ფრონტის ხაზზე უკრაინელები კვლავ აქტიურად უტევენ და მათი წინსვლაც შესამჩნევია. ბახმუტის სამხრეთით მდებარე ანდრეევკასა და კლეშჩეევკაზე გამართული ბრძოლების შედეგად რუსეთის თავდაცვის ხაზი დაირღვა და 3 რუსული სამხედრო დანაყოფი დამარცხდა. რუსები ახორციელებენ  კონტრშეტევებს სხვადასხვა მიმართულებით, თუმცა წარუმატებლად ცდილობენ დაკარგული პოზიციების დაბრუნებას. გარდა ამისა, უკრაინელების თქმით, რუსებმა ბრძოლაში ყველა არსებული რეზერვი ჩართეს.   

ევროკავშირის უმაღლესი წარმომადგენელი საგარეო პოლიტიკისა და უსაფრთხოების პოლიტიკის საკითხებში, ჯოზეფ ბორელი ადასტურებს, რომ კიევში ევროკავშირის წევრი ქვეყნების საგარეო საქმეთა მინისტრების შეხვედრა გაიმართება - უკრაინული მედიის ინფორმაციით, ამის შესახებ მან ნიუ-იორკში გაეროს გენერალურ ასამბლეაში მონაწილეობის ფარგლებში გამართულ პრესკონფერენციაზე განაცხადა.

უკრაინამ ზაფხულის კონტრშეტევის დაწყებიდან 300 კვადრატული კილომეტრი ტერიტორია გაათავისუფლა. კიევი კონტრშეტევის ნელა განვითარების მიზეზად ჯარისკაცების სიცოცხლის გადარჩენას ასახელებს. თავდაცვის მინისტრის მოადგილე ანა მალიარი ამბობს, რომ უკრაინელებმა მიუხედავად იმისა, რომ რუსებს ბევრად მეტი ჯარი და იარაღი აქვს, კონტრშეტევა მაინც გარისკეს.    

დრონების მორიგი ვარდნა შავი ზღვის ნატოს ქვეყნების ტერიტორიაზე - რუმინეთის შემდეგ სამიზნე ბულგარეთი გახდა - სოფია კურორტ ტიულონოვოში აღმოჩენელი დრონის შესამოწმებლად სპეციალურ ჯგუფს აგზავნის. ბულგარეთის თავდაცვის სამინისრომ განაცხადა, რომ ასაფეთქებელი ნივთიერების გადამტანი დრონის შესამოწმებლად და დეაქტივაციისთვის სპეციალური დანაყოფი გაგზავნა.

ჩინეთის საგარეო საქმეთა მინისტრი ვან ი რუსეთში 4-დღიანი ვიზიტით იმყოფება, სადაც რუსეთის უშიშროების საბჭოს მდივანს ნიკოლაი პატრუშევს შეხვდება. ჩინეთის საგარეო საქმეთა სამინისტროს ინფორმაციით, გარდა ამისა ვან ი მოლაპარაკებას გამართავს რუსეთის საგარეო საქმეთა მინისტრთან, სერგეი ლავროვთან. როგორც ცნობილია, შეხვედრაზე განხილვის თემა უკრაინაში მიმდინარე ომი იქნება.

უკრაინელმა ჯარისკაცებმა დონეცკის ოლქის დასახლებული პუნქტი ანდრეევკა გაათავისუფლეს, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული. გენშტაბის ცნობით, ანდრეევკა კოორდინირებული თავდასხმის ოპერაციების შედეგად დაიბრუნეს.

ჯო ბაიდენი ვოლოდიმირ ზელენსკის ვაშინგტონში 21 სექტემბერს შეხვდება. ამის შესახებ აშშ-ის პრეზიდენტის მრჩეველმა ეროვნული უსაფრთხოების საკითხებში ჯეიკ სალივანმა ბრიფინგზე განაცხადა. „ნიუ-იორკიდან პრეზიდენტი ბაიდენი შემდეგ ვაშინგტონში დაბრუნდება, რათა ხუთშაბათს თეთრ სახლში პრეზიდენტი ზელენსკი მიიღოს. ეს მათი მესამე შეხვედრა იქნება. ის, რა თქმა უნდა, კრიტიკულ დროს შედგება, ვინაიდან უკრაინის წინააღმდეგ სასტიკი ომისთვის რუსეთი სასოწარკვეთილად ეძებს დახმარებას ისეთ ქვეყნებში, როგორიცაა ჩრდილოეთ კორეა",-განაცხადა სალივანმა.

ორ კვირაზე მეტია, რაც ჩინეთის თავდაცვის მინისტრი ლი შანფუ საჯარო სივრცეში არ გამოჩენილა. დასავლურ მედიას ეჭვი აქვს, რომ შანფუ, რომელიც 2018 წლიდან აშშ-ის სანქცირებულთა სიაშია რუსული კომპანია „როსობორონექსპორტისგან" იარაღის შეძენის გამო, თანამდებობიდან გადააყენეს და მის წინააღმდეგ კორუფციის ფაქტზე სისხლის სამართლის საქმე აღიძრა. თუმცა როგორც „რეზონანსთან" თავდაცვის სფეროს სეციალისტი ვახტანგ მაისაია ამბობს, მისი ინფორმაციით, ქვეყნის ხელმძღვანელობის ახალი გადაწყვეტილების შესაბამისად, თანამდებობის პირებმა და განსაკუთრებით ძალოვანი სტრუქტურების წარმომადგენლებმა ხშირი საჯარო გამოსვლებისგან თავი უნდა შეიკავონ.

ბახმუტის სამხრეთით და მელიტოპოლის მიმართულებაზე უკრაინელების წარმატებული კონტრშეტევა გრძელდება. უკრაინის შეიარაღებული ძალების გენერალური შტაბის ინფორმაციით, უკრაინის არმია წარმატებით ახორციელებს შეტევას ბახმუტის სამხრეთით, დონეცკის ოლქის კლიშჩიივკას, ანდრიივკასა და კურდიუმივკას რაიონებში. შეიარაღებული ძალები მნიშვნელოვან ზარალს აყენებს მტრის ცოცხალ ძალას და აღჭურვილობას.

სომხეთს აღარ შეუძლია რუსეთს, როგორც საკუთარი უსაფრთხოების გარანტს, დაეყრდნოს. ამის შესახებ სომხეთის პრემიერ-მინისტრმა ნიკოლ ფაშინიანმა გამოცემა Politico-სთან ინტერვიუში განაცხადა. ფაშინიანის თქმით, უკრაინაში რუსეთის კატასტროფული შეჭრის გამო სომხეთს აღარ შეუძლია მოსკოვს , როგორც საკუთარი უსაფრთხოების გარანტს, დაეყრდნოს, მიუხედავად იმისა, რომ აზერბაიჯანთან ღია კონფლიქტის დაბრუნების შიში იზრდება.