უმაღლესი თანამდებობის პირებისთვის ხელფასების მასობრივი ზრდა დაიწყო. ანაზღაურებაში სხვაობა, რომელიც საქართველოს პარლამენტმა სასწრაფო წესით უკვე დაამტიკა, საკმაოდ დიდია. ცვლილება ძალაში მომავალი წლიდან შევა და ამ გზით მთავრობის წარმომადგენლები საკუთარ შემოსავალს მკვეთრად გაიზრდიან, რაც ექსპერტების შეფასებით, არაკეთილსინდისიერია, მით უმეტეს იმ ფონზე, როცა მოსახლეობაში სოციალური და ეკონომიკური პრობლემები არსებობს.

უმრავლესობაში არასამთავრობო ორგანიზაციების თემა კვლავ გააქტიურდა - მმართველი პარტია მოითხოვს, დონორებმა იმ არასამთავრობო ორგანიზაციების დაფინასება შეწყვიტონ, რომელთა სახსრები „პარტიულ ჯიბეებში მიდის". ამ თემის წამოწევას წინ უძღვოდა ამერიკის დემოკრატიის ეროვნული ფონდის (NED) ხელმძღვანელის კენ ვოლაკის განცხადება, სადაც ამბობს, რომ თუ სამოქალაქო საზოგადოების ჯგუფები პოლიტიკური პარტიის წევრები არიან, ან პოლიტიკური ძალაუფლებისთვის იბრძვიან, „ეს უკვე სამოქალაქო საზოგადოების ორგანიზაციები არ არის".

6 მარტს, პრეზიდენტი სალომე ზურაბიშვილი ორბელიანების სასახლეში მედიის წარმომადგენლებს შეხვდა და მათ კითხვებს უპასუხა. ზურაბიშვილმა „რეზონანსის" კითხვაზე, საპრეზიდენტო ვადის ამოწურვის შემდეგ ქვეყნის პოლიტიკურ ცხოვრებაში მონაწილეობის გაგრძელებას აპირებს თუ არა, უპასუხა, რომ ამას საჭიროებისამებრ გადაწყვეტს, რაც შეეხება სააკაშვილს, მის შეწყალებას კატეგორიულად გამორიცხავს.

კვლევების მიუხედავად, „გამარჯვების პლატფორმაში" აცხადებენ, რომ ეს ცენტრი 2024 წლის საპარლამენტო არჩევნებში 40% აიღებს, არგუმენტად 2018 წლის საპრეზიდენტო არჩევნები მოჰყავთ, ნიკა მელიას პლატფორმას კი 10%-ს უწინასწარმეტყველებენ. ანალიტიკოსი ვახტანგ ძაბირაძე „რეზონანსთან" აცხადებს, დღეს რომ საპარლამენტო არჩევნები იყოს, ენმ-„სტრატეგია აღმაშენებელი" 15%-ს აიღებდა, ესეც იმ პირობებში, როცა დიდია ალბათობა, მელიამ „ნაცმოძრაობის" ელექტორატის ნაწილი გაიყოლოს. მას 5%-იანი ბარიერის გადალახვა არ გაუჭირდება, მაგრამ ახლა იმაზე ძნელია საუბარი, აიღებს თუ არა მელიას პლატფორმა 10%-ს.

ავტოსადგურების სერტიფიცირების საკითხის მოგვარებით  ე.წ. ,,ხიშნიკებთან" დაკავშირებული პრობლემაც საბოლოოდ გადაიჭრება. სექტორში აცხადებენ, რომ სეისტემაში თანდათან წესრიგი დამყარდება და ჯანსაღი კონკურენციის პირობებში მოუწევთ საქმიანობა, რაც უსაფრთხოების კუთხითაც დიდი წინგადადგმული ნაბიჯია. როგორც აღმოჩნდა, რეგულაცია ჯერჯერობით ავტოსადგურებს შეეხება და არა ტურისტების გადამყვან სატრანსპორტო საშუალებებს, რომლებსაც სერტიფიცირებისა და ნებართვების ვალდებულება ჯერჯერობით არ აქვთ.

წელიწად-ნახევარია საქართველოში ინფლაცია მცირდება და უკვე რამდენიმე თვეა, რაც მაჩვენებელი ნულთან ახლოსაა. მიუხედავად ამისა, ქვეყანაში მაღალი ფასები დარჩა და მოსახლეობისთვის ნაწილისთვის სტატისტიკა მხოლოდ ციფრებია, რადგან მათ ჯიბეზე ეკონომიკური ზრდა და ინფლაციის კლება უმნიშვნელოდ აისახა. დღემდე გამოწვევაა მსყიდველუნარიონობა და ცხოვრების დონზეც.

პრეზიდენტ სალომე ზურაბიშვილსა და „ქართულ ოცნებას" შორის დაპირისპირება წინასაარჩევნო პერიოდში უფრო გამწვავდა, სიტუაცია განსაკუთრებით მას შემდეგ დაიძაბა, რაც პრეზიდენტმა პარლამენტის მიერ საარჩევნო კოდექსში მიღებულ ცვლილებებს ვეტო დაადო, რომლითაც იცვლება ცესკოს თავმჯდომარის და წევრების არჩევის წესი და კვორუმი. რასაც „ოცნება" საპარლამენტო არჩევნებზე თავდასხმად აფასებს და აცხადებს, რომ ესაა ნიადაგის მომზადება, რომ ოპოზიციის გარკვეულმა ნაწილმა არჩევნები არ აღიაროს.

აჭარის განათლებისა და მეცნიერების მინისტრის მოადგილის შვილის დაკავების შესახებ ახალი დეტალები ხდება ცნობილი. თამარ გუდავამ , რომლის 20 წლის შვილსაც გამოძიება ნარკოტიკული საშუალების რეალიზაციას ედავება, თანამდებობა 5 მარტს დატოვა. გამოძიების ინფორმაციით კი, ამოღებულია აკრძალული ნივთიერებების განსაკუთრებით დიდი რაოდენობა. პროკურატურის ინფორმაციით, ბრალდებულმა მეგობართან ერთად ნარკოტიკები თერჯოლის ერთ-ერთ სოფელში ე.წ. ლოკაციაზე დადო, ფოტოები მყიდველს გადაუგზავნა, რის შემდეგაც მოვლენები დრამატულად განვითარდა.

კვლავ მძიმეა ვითარება უკრაინის ფრონტის მთელ ხაზზე - უკრაინის გენშტაბის ინფორმაციით, უკანასკნელი 24 საათის განმავლობაში, 70-მდე მძიმე შეტაკება დაფიქსირდა. ბახმუტის მიმართულებით მდებარე სოფელ ივან-ივსკესთან სასტიკი ბრძოლების შესახებ იტყობინება უკრაინის აღმოსავლეთ ძალების წარმომადგენლობა. ოფიციალური ინფორმაციით, ოკუპანტები ჩასივ-იარის დასახლების ხელში ჩაგდებას ცდილობენ, თუმცა, ჯერჯერობით, უშედეგოდ.

საფრანგეთის პრეზიდენტის ემანუელ მაკრონის განაცხადებას, რომ შესაძლებელია მომავალში უკრაინის დასახმარებლად დასავლეთის სახმელეთო ჯარები გაიგზავნოს, რუსეთის დაზვერვის სამსახურის დირექტორმა სერგეი ნარიშკინმა უპასუხა და დაემუქრა, რომ მსგავსი ნაბიჯი ბირთვული ომის ზღვარზე მიიყვანს ვითარებას.

უკრაინა რუსეთის შავი ზღვის ფლოტს შავი ზღვის აუზში თანდათან ხელ-ფეხს უკრავს, ანალიტიკოსთა ცნობით, უკვე მწყობრიდანაა გამოსული ორ ათეულზე მეტი სხვადასხვა სახეობის ხომალდი, რაც ფლოტის დაახლოებით ერთი მესამედია, ეს კი თავად რუსეთის სამხედრო წესდებებითაც უკვე ნიშნავს, რომ ფლოტი უკვე არაბრძოლისუნარიანია. ბოლოს უკრაინული კამიკაძე-დრონების სამიზნე რუსეთის საპატრულო ხომალდი "სერგეი კოტოვი" გახდა, რომელიც ფლოტს 2022 წელს გადაეცა.

„ევროპის მიწაზე ომი დაბრუნდა" - საფრანგეთის პრეზიდენტის მიერ სამშაბათს გაკეთებული ეს განცხადება სიტუაციის ესკალაციის საფრთხეს კიდევ უფრო ამძაფრებს. ამის პარალელურად, რუსეთის თავდაცვის სამინისტრომ გამოაქვეყნა რუსეთზე დასავლეთის ქვეყნების თვდასხმის სავარაუდო სცენარი, სადაც საუბარია, რომ დასავლეთი ერთობლივ სამხედრო ფორმირებებს ამზადებს. ანალიტიკოსთა შეფასებით, ეს ყველაფერი მზარდ ესკალაციაზე მიუთითებს.