ოპოზიციაში კონტურები თანდათან იკვეთება, თუ რა კონფიგურაციით წარსდგებიან არჩევნებზე, ამის პარალელურად კი, მთავარი ოპოზიციური პარტიის სტატუსისთვის ბრძოლა მიდის. აქამდე გამოქვეყნებულ ყველა კვლევაში „ქართული ოცნების" მერე, რეიტინგით მეორე ადგილზე „ნაცმოძრაობაა", ანალიტიკოსების პროგნოზით კი მიუხედავად იმისა, რომ მთავარი ოპოზიციური ძალის სტატუსის მოპოვება გარკვეულ პარტიებს სურთ, მათ შორის ახლადშექმნილ ნიკა მელია-ნიკა გვარამიას „ახალს", ამ იმიჯით არჩევნებამდე რვა თვით ადრეც კვლავ „ნაცმოძრაობაა", რადგან გადამწყვეტი მაინც მესამე პრეზიდენტ მიხეილ სააკაშვილის ელექტორატია.

რას ცვლის პოლიტიკურ ველზე პარტია „ახალის“ გამოჩენა, რატომ არ შედგა ამ ეტაპზე მათი ალიანსი „ლელოსთან“ და ვის უფრო აქვს თავის გარშემო წვრილი პარტიების შემოკრების შანსი? ანალიტიკოსთა შეფასებით, მელია-გვარამიას პარტიასთან მამუკა ხაზარაძის ალიანსის ჩაშლაზე საუბარი ნაადრევია, რადგან ოპოზიციაში გადაჯგუფების პროცესი ისევ მიდის და ეს საბოლოო სახეს ალბათ აპრილის ბოლოს მიიღებს.

რუსეთის ხელისუფლებას გადაწყვეტილი აქვს ცხინვალის ე.წ. პარლამენტის სამ დეპუტატს რუსეთის მოქალაქეობა ჩამოართვას. ამის ოფიციალურ მიზეზად ისაა დასახელებული, რომ მათი საქმიანობა რუსეთის საზღვართან დაძაბულობას ზრდის. უფრო კონკრეტულად კი, როგორც ცხინვალში აცხადებენ, ეს დეპუტატები განსაკუთრებით აქტიურად ცდილობენ ახალი ე.წ. საკანონმდებლო ცვლილების მიღებას, რომელიც დე ფაქტო ხელისუფლებას საქართველოს მიერ კონტორილებადი ტერიტორიის სიღრმეში „საზღვრის" გადაწევის „სამართლებრივ საფუძველს" მისცემს.

საქართველოში სოციალურად დაუცველი ადამიანების დასაქმებას ჯანდაცვის ახალი მინისტრიც გააგძელებს. სამთავრობო პროგრამა საკამოდ წარმატებული აღმოჩნდა, თუმცა ექსპერტები ვარაუდობენ, რომ სამთავრობო დონეზე მათი დასაქმება უსასრულოდ ვერ გაგრძელდება.

უკრაინულები ცდილობენ საბრძოლო მოქმედებების რუსეთის ტერიტორიაზე გადატანას და 12 მარტის მოულოდნელი რეიდი კურსკისა და ბელგოროდის ოლქებში ამის გამოხატულებაა - ასე აფასებს „რეზონანსთან" საუბრისას გენშტაბის ყოფილი უფროსი, გენერალ-მაიორი ვახტანგ კაპანაძე სამშაბათის მოვლენებს. უკრაინული მხარის ცნობით, 12 მარტს მათ კურსკის ოლქში ერთი დაბა ბრძოლით აიღეს. რუსეთის ხელისუფლება ამას გადაჭრით უარყოფს.

თითქმის ორი კვირა გავიდა, მას შემდეგ რაც რუსეთმა ნათობპროდუქტის ექსპორტზე მორიგი შეზღუდვა დააწესა. პირველ მარტს ამოქმედებული განკარგულების შემდეგ საქართველოს საბითუმო ბაზარზე ბენზინი 20 თეთრით უკვე გაძვირდა. საინტერესოა, რა მოხდა იქამდე, სანამ ცვლილება ძალაში იქნება და რომელი ქვეყნით აპირებენ იმპორტიორები რუსეთის ბაზრის ჩანაცვლებას?

ლაგოდეხის მუნიციპალიტეტის ერთ-ერთ სოფელში ნათესავი ქალის გაუპატიურების მცდელობის ბრალდებით 30 წლამდე კაცი დააკავეს. საქმე 2023 წლის ოქტომბერში მომხდარ დანაშაულს ეხება. როგორც ადგილობრივები „რეზონანსთან“ ყვებიან, კაცს მაშინ ნათესავები თავად გაუსწორდნენ - ქალის ტანსაცმლის ჩაცმა აიძულეს და სოფელში ასე ჩამოატარეს. ამის გამო იგი პოლიციამ იგი დაზარალებულადაც სცნო და ამ საქმეზე 3 პირიც დააკავა. თუმცა მოგვიანებით დადგინდა, რომ 30 წლის მამაკაცმა ნათესავ ქალზე ძალადობა მართლაც სცადა და პოლიციამ შესაბამისი მუხლით ისიც დააკავა.

მოუწევს თუ არა პატიმრობაში მყოფ ექსპრეზიდენტ მიხეილ სააკაშვილს არჩევანის გაკეთება „ნაციონალურ მოძრაობასა" და მელია-გვარამიას ერთობლივი პარტია „ახალს" შორის? ანალიტიკოსების აზრით, სააკაშვილის პოზიციას, ელექტორალური თვალსაზრისით, შესაძლოა გადამწყვეტი მნიშვნელობა ჰქონდეს. „ახალის" მიმართ მისი დამოკიდებულება კი თავად ამ პარტიის შემდგომ ნაბიჯებზე, მათ რეიტინგსა და არჩევნების წინ შექმნილ სიტუაციაზე იქნება დამოკიდებული.

უკრაინისა და საქართველოს ხელისუფლებებს შორის ურთიერთობები კვლავ დაიძაბა, ეს კი საქართველოს ყოფილი გენპროკურორის ზურაბ ადეიშვილის ევროპაში ვიზიტს მოჰყვა, რომელიც უკრაინის ოფიციალურ დელეგაციაში იყო და მაღალ თანამდებობას იკავებს, საქართველოში კი ადეიშვილი რამდენიმე საქმეზე დამნაშავედ ცნეს. საქართველოს მთავრობა უკრაინას ურთიერთობების მოსაწესრიგებლად კონკრეტული ნაბიჯების გადადგმისკენ მოუწოდებს. მათი თქმით, მნიშვნელოვანია უკრაინამ საქართველოს გადასცეს „დამნაშავეები, რომლებიც დღეს უკრაინის ხელისუფლებაში მაღალ თანამდებობებს იკავებენ". ამ განცხადებას, უკრაინელი მაღალჩინოსანი, დავით არახამია გამოეხმაურა და საპასუხო მოთხოვნები წამოაყენა.

ნარკოტიკებთან ბრძოლას შინაგან საქმეთა სამინისტრო და სამართალდამცველები აგრძელებენ. კიდევ ერთი ხმაურიანი დაკავება თბილისში, დადიანის ქუჩაზე ნაქირავებ საცხოვრებელ სახლში მოხდა. სამართალდამცველებმა ახალგაზრდა ქალი და მამაკაცი დააკავეს. მეზობლები ადასტურებენ, რომ ამ მისამართზე პოლიცია ნამდვილად იყო მობილიზებული. გამოძიების ინფორმაციით, ადგილზე აღმოჩენილია დიდი ოდენობით სარეალიზაციოდ გამზადებული ნარკოტიკი. სამართალდამცველებმა ამოიღეს სპეციალური ხელსაწყოებიც, რითაც წყვილი ნარკოტიკულ საშუალებებს გასაყიდად ამზადებდა.

საქართველოში საინვესტიციო კლიმატი ცოტათი გაუარესდა. მართალია, ტენდენცია სახარბიელო არ არის, თუმცა განგაშის საფუძველს ჯერჯერობით არ იძლევა. მით უფრო, რომ სააქციო კაპიტალის ნაწილში გარკვეული ზრდა შეინიშნება. მიუხედავად ამისა, ფუნდამენტური ფაქტორების გავლენა ჯერ კიდევ დიდია, მათ შორის, რეგიონში მიმდინარე საომარი სიტუაცია და წინასაარჩევნო შიდა პოლიტიკური არასტაბილურობა, რაც ინვესტიციებზე, სავარაუდოდ, უარყოფით გავლენას მოახდენს.

უკრაინელებისთვის ფრონტის ხაზზე, სადაც სიტუაცია ყოველდღიურად სულ უფრო იძაბება, მნიშვნელოვანია დასავლეთიდან დროული დახმარების მიღება. დამატებითი დაფინანსების შესახებ კანონპროექტის დამტკიცების ერთთვიანი დაგვიანების ფონზე, რომელიც ასევე მოიცავს უკრაინის დახმარებას, შეერთებული შტატები იძულებულია რთულ გადაწყვეტილებებს მიმართოს. გამოცემა „ბლუმბერგი“ წერს, რომ აშშ-ის პრეზიდენტის ადმინისტრაცია ახლა მსჯელობს, შეუძლიათ თუ არა დაახლოებით 200 მილიონი დოლარის მოზიდვა აშშ-ის არმიის დაფინანსებიდან უკრაინას გადაუდებელი დახმარების უზრუნველსაყოფად.