მთავრობის სხდომაზე ირაკლი კობახიძემ რამდენიმე საკითხზე ისაუბრა, მან უკანონო ხე-ტყის ჭრაზე ახალი სანქციები გამოაცხადა. ასევე თქვა, რომ სახელმწიფო განახორციელებს ფინანსურ ინტერვენციას და 20 ათასზე მეტ მევენახეს მოსავლის რეალიზაციის საშუალება მიეცემა. ისიც დაანონსა, რომ 2-დან 8 აგვისტოს ჩათვლით ანაზღაურებად სტაჟირებაზე კონკურსი ცხადდება.

სოფლის მეურნეობაში მუშახელის დეფიციტი  2024 წელსაც დიდ პრობლემას შექმნის. აგრარულ სფეროში, განსაკუთრებით სეზონურ სამუშაოებზე, რეგიონებში კადრებთან დაკავშირებით სერიოზული პრობლემაა. ანალოგიური ვითარებაა სამეწარმეო ბიზნესშიც, რაც მაღალი რგოლიდან დაწყებული, ქვედა საფეხურამდე, ნებისმიერი კვალიფიკაციის კადრს ეხება.

ვლადიმერ პუტინმა უკრაინაში ბრძოლის მსურველი მოხალისეებისთვის წინასწარი გადასახადი გააორმაგა, - რუსეთის პრეზიდენტის განკარგულება იურიდიულ საინფორმაციო პორტალზე გამოქვეყნდა. ვლადიმერ პუტინის განკარგულებით, რუსეთის ყველა მოქალაქე, რომელიც აგვისტოდან 2024 წლის ბოლომდე შეიარაღებულ ძალებთან კონტრაქტს გააფორმებს, წინასწარი გადასახადის სახით 400 000 რუბლს მიიღებს.

2024 წლის პირველი ნახევარი 9%-იანი ეკონომიკური ზრდით ჩაიხურა. მიმდინარე წლის 6 თვეში საქართველოს ეკონომიკა ორჯერ იმაზე სწრაფად განვითარდა, ვიდრე წლის დასაწყისში იყო ნავარაუდევი როგორც საერთაშორისო, ისე ადგილობრივი ინსტიტუტების მიერ. ითქვა, რომ მშპ-ს ზრდა დარჩენილ თვეებშიც გაგრძელება. ეკონომისტთა ერთი ნაწილი არც იმას გამორიცხავს, რომ 2024 წლის ბოლოს ორნიშნა ან მასთან მიახლოებული მაჩვენებელი ჰქონდეს ქვეყანას. 

საარჩევნო ტექნოლოგიების საყოველთაო დემონსტრირება 28 ივლისს დასრულდა, რომლის მიზანი იყო ახალი ტექნოლოგიების დანერგვის შესახებ ამომრჩეველთა ინფორმირება და ხმის მიცემის პროცედურების პრაქტიკული უნარ-ჩვევების გამომუშავება. 26 ოქტომბერს ამომრჩეველთა თითქმის 90% ხმას სწორედ ამ ელექტრონული აპარატების გამოყენებით მისცემს. მმართველი პარტია აცხადებს, რომ ახალი ტექნოლოგიები გაყალბებას გამორიცხავს, თუმცა, ოპოზიციას კითხვები აქვს.

სენატის საგარეო ურთიერთობათა კომიტეტზე საქართველოს საკითხზე იმსჯელეს, ამერიკელი კანონმდებლები საქართველოს ხელისუფლებისგან სამ მთავარ საკითხზე ელიან ნაბიჯების გადადგმას, თუმცა, როგორც საქართველოს პრემიერ მინისტრი ირაკლი კობახიძე აცხადებს, ის ვაშინგტონისგან აქეთ ელის „შემხვედრ" ნაბიჯებს და მისი თქმით, „მაშინვე მოხდება ქართულ-ამერიკული ურთიერთობების გადახედვა".

„ჰამასის" ლიდერი, ისმაილ ჰანიე თეირანში ირანის პრეზიდენტის მასუდ ფეზეშქიანის ინაუგურაციას დაესწრო, რის შემდეგაც ის ომის ვეტერანთა რეზიდენციაში იმყოფებოდა, რა დროსაც განახორციელეს საჰაერო თავდასხმა, რასაც ჰანიე ემსხვერპლა. მისი სიკვდილი „ჰამასმაც" დაადასტურა და იგი მკვლელობაში ისრაელს ადანაშაულებს. „ჰამასის" განცხადებით, ჰანიე თეირანში, მის რეზიდენციაზე განხორციელებული „სიონისტური თავდასხმის" შედეგად დაიღუპა.

საქართველოს უძრავი ქონების ბაზარზე სტაბილიზაცია მიმდინარე წელსაც შენარჩუნებულია და ამ ეტაპზე არანაირი გარემოება არ იკვეთება, რაც სიტუაციას შეაბრუნებს. მართალია, საცხოვრებელი უძრავი ქონების ფასების ინდექსი მცირედით გაიზარდა, თუმცა ამას საბაზრო დინამიკაზე არსებითი გავლენა არ მოუხდენია. მოთხოვნა შემცირებულია, საპარლამენტო არჩევნების დაძაბულ ფონს ქმნის. ასე რომ, სამომავლოდ ბაზარზრ სტაბილურობის შენარჩუნებაც გაძნელდება.

ამერიკის საპრეზიდენტო არჩევნებამდე ას დღეზე ნაკლები რჩება, პაუზა, რომელიც მოქმედი პრეზიდენტის ჯო ბაიდენის კენჭისყრაზე უარი თქმას მოჰყვა, ერთ კვირაც არ გაგრძელდა და წინასაარჩევნო კამანია ოფიციალურად უკვე განახლებულია. დონალდ ტრამპს მეტოქეობას კამალა ჰარისი გაუწევს, დემოკრატები საპრეზიდენტო კანდიდატად ოფიციალურად 7 აგვისტოს წარადგენენ, თუმცა სხვადასხვა კვლევაში ჩანს, რომ როგორც ჯერჯერობით დე ფაქტო კანდიდატი ბაიდენის რეიტინგს აუმჯობესებს, მაღალი რეიტინგი აქვს ტრამპსაც. როგორც ანალიტიკოსები ამბობენ, ბრძოლა თანაბარია და ცალსახად ახლა იმის პროგნოზირება ძნელია, თუ ვინ გაიმარჯვებს.

1 აგვისტოდან „გავლენების კანონით" გათვალისწინებულ ბაზაში რეგისტრაცია იწყება, 3 სექტემბრიდან კი ძალაში შევა. იუსტიციის მინისტრი ამბობს, რომ დაუმორჩილებლობის შემთხვევაში შესაბამისი ზომები იქნება მიღებული. არასამთავრობოების ნაწილი აცხადებს, რომ არ აპირებენ რეგისტრაციის გავლას. რა პროცესებია მოსალოდნელი და რა ზომები იქნება მიღებული?

საარბიტრაჟო სასამართლომ „ანაკლიის კონსორციუმს“ საქართველოს მთავრობის სასარგებლოდ 650 ათასი დოლარის გადახდის ვალდებულება დააკისრა. შესაბამის სარჩელზე განხილვა უკვე დასრულდა და დაადგინა, რომ მთავრობამ საინვესტიციო ხელშეკრულება კანონიერად შეწყვიტა. საუბარია, 2016 წელს გაფორმებული საინვესტიციო ხელშეკრულებაზე და იმ პერიოდზე, როდესაც ანაკლიის პორტის აშენების უფლება მამუკა ხაზარაძეს და ბადრი ჯაფარიძეს მიენიჭა, თუმცა ინვესტორის მიერ საინვესტიციო ვალდებულებების მრავალჯერადი დარღვევის გამო, მთავრობა იძულებული გახდა საინვესტიციო ხელშეკრულება შეეწყვიტა. 

პრემიერ-მინისტრი უკვე მეორედ იძლევა გარანტიას, რომ არჩევნებში ოპოზიციის გამარჯვების შემთხვევაში, ერთ კვირაში მეორე ფრონტი გაიხსნება. „თეორიულად რომ დავუშვათ „ნაცმოძრაობის" დაბრუნება, საერთოდ უკან მოგვრჩება ევროინტეგრაციაც და ყველაფერიც. გარანტიას ვიძლევი იმისა, რომ თუ ასეთი თეორიული სცენარი შეიძლება წარმოვიდგინოთ, ერთი კვირა არ დასჭირდებათ იმისთვის, რომ აქ გახსნან მეორე ფრონტი" - თქვა კობახიძემ „იმედის" ეთერში.