„უცხო ქვეყნის" სასარგებლოდ ჯაშუშობის ბრალდებით სუს-მა ერთი ადამიანი დააკავა და კიდევ ორზე ძებნა გამოაცხადა. ოფიციალურ განცხადებაში ნახსენები არ არის, თუ რომელი ქვეყნის სასარგებლოდ ჯაშუშობდნენ ისინი, თუმცა, „რუსთავი 2" საკუთარ წყაროებზე დაყრდნობით იუწყება, რომ საუბარია რუსეთზე და ამ ინფორმაციის გავრცელებას სუს-ის ოფიციალური უარყოფა არ მოჰყოლია. ანალიტიკოსთა შეფასებით, ეს შესაძლოა „ოცნების" საგარეო პოლიტიკაში გარკვეულ ცვლილებებზე მიანიშნებდეს.

ევროკავშირის ელჩს საქართველოში, პაველ ჰერჩინსკის, ბრიუსელში გაკეთებული განცხადების გამო, სავარაუდოდ, საგარეო საქმეთა სამინისტროში დაიბარებენ. ხელისუფლება მიიჩნევს, რომ მის განცხადებაში ღია მუქარა იყო საქართველოს სახელმწიფოს მიმართ. ამ შეფასებას ოპოზიციის ნაწილიც იზიარებს. მეორე ნაწილი კი საქართველოში ირანის ელჩის ცნობილ განცხადებასთან ავლებს პარალელს, სადაც, მათი შეფასებით, საქართველოს მიმართ მუქარა აშკარა იყო, თუმცა ამის მიმართ „ქართულ ოცნებაში" პროტესტი არ გასჩენიათ.

თბილისის საქალაქო სასამართლოში დღეს ორი რეზონანსული საქმის განხილვა გაიმართა. მოსამართლემ არ დააკმაყოფილა ალეკო ელისაშვილის დაცვის მხარის შუამდგომლობა გირაოს თაობაზე და ის პატიმრობაში დატოვა, ხოლო სუს-ის ყოფილი უფროსის, გრიგოლ ლილუაშვილის საქმეზე, მტკიცებულებების დასაშვებობაზე მსჯელობა დახურულ კარს მიღმა გაგრძელდა.

საყოველთაო კარდაკარისა და 26 მაისის აქციის დაანონსების ფონზე, ოპოზიციურ ალიანსში დაპირისპირებაა, მიზეზი მიხეილ სააკაშვილის საჯარო პოსტებია, რასაც ალიანსის წარმომადგენლები სხვადასხვა პლატფორმიდან ეხმიანებიან და მიაჩნიათ, რომ პატიმრობაში მყოფმა მესამე პრეზიდენტმა ალიანსის შეთანხმება დაარღვია. ამის ფონზე, ანალიტიკოსების ნაწილი მიიჩნევს, რომ შეიძლება ოპოზიციური სპექტრი ერთიანობის შენარჩუნების მხრივ გამოწვევის წინაშე დადგეს, მით უმეტეს, თუ ალიანსის პრიორიტეტი არჩევნებში მონაწილეობა არაა.

პოლიტოლოგმა იგორ კვესელავამ მმართველ პარტიაში მიმდინარე დიდი საკადრო ცვლილებები პოლიტიკაში ახალი სახეების გამოჩენას დაუკავშირა. მისი ვარაუდით, დღეს არსებული ვითარება აჩვენებს, რომ „ქართული ოცნების" საპატიო თავმჯდომარე, ბიძინა ივანიშვილი მის შვილს, ცოტნეს პოლიტიკური მომავლისთვის ამზადებს. სხვა თემებზე საუბრისას აღნიშნავს, რომ შესაძლოა ახალი პატრიარქის არჩევას დაპირისპირება ახლდეს თან.

22-24 აპრილს ასტანაში გაერო-ს პარტნიორობიოთ რეგიონული ეკოლოგიური სამიტი იმართება, სადაც სხვადასხვა სახელმწიფოს ლიდერები კლიმატის ცვლილებით გამოწვეულ სირთულეებზე და შექმნილ გამოწვევებთან გასამკლავებლად კოორდინირებულ ძალისხმევაზე მსჯელობენ. საქართველოდან სამიტში პრეზიდენტი მიხეილ ყაველაშვილი მონაწილეობს. სამიტში ცენტრალური აზიისა და სამხრეთ კავკასიის ყველა ქვეყანაა წარმოდგენილი.

აღმასრულებელ ხელისუფლებაში მასშტაბური საკადრო გადაადგილებებია - მამუკა მდინარაძეს სუს-ის უფროსის თანამდებობაზე გეკა გელაძე ცვლის, ხოლო შს მინისტრად გელაძის ნაცვლად გადადის აჭარის მთავრობის ყოფილი თავმჯდომარე სულხან თამაზაშვილი. მთავრობის სტრუქტურას დაემატება სამართალდამცავი ორგანოების კოორდინაციის საკითხებში სახელმწიფო მინისტრის თანამდებობა, რომელსაც უახლოეს პერიოდში მამუკა მდინარაძე დაიკავებს.

წმინდა სინოდის სხდომის თარიღი ცნობილია - საპატრიარქოს საზოგადოებასთან ურთიერთობის სამსახურის ინფორმაციით, სხდომა 28 აპრილს, 12:00 საათზე დაიწყება და მასზე გამორჩეული იქნება პატრიარქობის სამი კანდიდატი. მიტროპოლიტები არჩევნების მშვიდად ჩატარების აუცილებლობაზე საუბრობენ, ანალიტიკოსები კი გარედან ზეწოლას არ გამორიცხავენ.

უკრაინამ უპილოტო საფრენი აპარატების სფეროში თანამშრომლობა რამდენიმე ქვეყანასთან უკვე გააფორმა, პრეზიდენტ ვოლოდიმირ ზელენსკის თქმით, არის მოთხოვნა ახლო აღმოსავლეთისა და სპარსეთის ყურის ქვეყნებიდან და დამატებით „აკვირდებიან კავკასიასაც". შეთანხმების ფარგლებში კი გათვალისწინებულია, როგორც დრონების ერთობლივი წარმოება, ისე საწარმო ხაზის მშენებლობა უკრაინასა და ხელშეკრულების მხარე სახელმწიფოებში.

ექსპეზიდენტი მიხეილ სააკაშილი ოპოზიციურ ალიანსს დაუპირისპირდა და უმოქმედობისთვის მწვავედ გააკრიტიკა. ზოგიერთი ოპოზიციონერი ლიდერი იმაშიც დაადანაშაულა, რომ მისი „დაგმობის ხარჯზე რეგიონებში დადიოდნენ, მაგრამ ვერაფერს მიაღწიეს". ოპოზიციურმა ალიანსმა ეს კონკრეტულად „კოალიცია ცვლილებებისათვის" ერთ-ერთი ლიდერის, ნიკა გვარამიას კრიტიკად აღიქმა.

„ქართული ოცნება" ბრიტანული საზოგადოებრივი მაუწყებლის წინააღმდეგ მესამე საჩივარს ამზადებს, რომელიც, პროცედურის თანახმად, კვლავ ბი-ბი-სი-ში შებრუნდება. მმართველი პარტია გაერთიანებული სამეფოს სამართლებრივ სისტემას მწვავედ აკრიტიკებს, ტელეკომპანიაში ამ პროცესს აფასებს, როგორც ფორმალობას და თუ საჭირო გახდა, ამ ბობენ, რომ სტრასბურგამდეც მივლენ.

მმართველი პარტია საკონსტიტუციო სასამართლოდან ძველი სარჩელის გამოთხოვას და ახლის შეტანას აანონსებს, რომელშიც უკვე პარტიათა სია იზრდება - „ლელოს", „კოალიცია ცვლილებებისთვის" და ენმ-ს „ფედერალისტები" ემატება. ამასთან, პარლამენტის თავმჯდომარე შალვა პაპუაშვილი მინიშნებს იმაზე, რომ ოპოზიციურ ალიანსში „არიან სხვა პარტიებიც". სარჩელს პარლამენტის 89 წევრი აწერს ხელს.