აშშ-სა და ისრაელის მიერ ირანის ბირთვული ობიქტების დაბომბვის შედეგები გაეროს ატომური უწყების ინსპექტორებისთვის კვლავ გამოცანად რჩება - გამდიდრებული ურანის მარაგი, რომლის ნაწილიც თითქმის მზად იყო იარაღის წარმოებისთვის იმ მიწისქვეშა ობიექტებში ინახებოდა, რომლებზეც იერიში მიიტანეს თუ მანამდე მისი გადამალვა მოასწრეს. ეჭვს, რომ ირანი პროგრამაზე ისევ მუშაობს ისიც ამძაფრებს, რომ ირანი ატომური ენერგიის საერთაშორისო სააგენტოს ხელმძღვანელსა და კამერებს თავის ბირთვულ ობიექტებზე ამიერიდან აღარ დაუშვებს.

ოპოზიციაში ისევ ქაოსია - კოალიცია „ცვლილებებისთვის" წევრი ელენე ხოშტარია შიმშილობას აგრძელებს. მისი მოთხოვნაა ოპოზიციის მიერ თვითმმართველობის არჩევნების სრული ბოიკოტი. მეორე მხარეს „ლელო" და გახარიას „საქართველოსთვის" არჩევნებისთვის მზადებას განაგრძობენ. მმართველ გუნდში ამბობენ, რომ ოპოზიციონერები ერთმანეთს ულტიმატუმების ენით ესაუბრებიან.

აქციაზე ყოფილმა პრეზიდენტმა სიტყვით გამოსვლისას ისევ ერთობაზე ისაუბრა და პოლიტიკურ პარტიებს გაერთიანებისკენ მოუწოდა. ამან ოპოზიციონერების გარკვეული ნაწილის უკმაყოფილება გამოიწვია და განაცხადეს, რომ „რეჟიმის წინააღმდეგ ბრძოლაში სადღეგრძელოები საჭირო არაა". ანალიტიკოსები ზურაბიშვილის იდეას არარეალურად უყურებენ.

30 ივნისს პარლამენტის საპროცედურო საკითხთა და წესების კომიტეტი პარტიის „გახარია საქართველოსთვის" წევრი 12 დეპუტატებისთვის უფლებამოსილების ვადამდე შეწყვეტის საკითხზე იმსჯელებს და შესაბამის დასკვნას მოამზადებს. ყოფილი პრემიერი გიორგი გახარიაც ჯერჯერობით ფორმალურად დეპუტატად ითვლება და შესაბამისად, მასზე იმუნიტეტიც ვრცელდება, თუმცა, მანდატის გაუქმების შემდეგ, საკანონმდებლო ორგანოს წევრის ხელშეუხებლობით ვეღარ ისარგებლებს. ანალიტიკოსთა აზრით, ამით, სავარაუდოდ, მზადდება საფუძველი გახარიას დასაპატიმრებლად, ან მისთვის დაუსწრებლად ბრალის წასაყენებლად.

აზერბაიჯანსა და რუსეთს შორის ახალი დიდი სკანდალი ღვივდება. საქმე ეხება ქალაქ ეკატერინბურგში რუსეთის სამართალდამცავების მიერ მოწყობილ რეიდს, რასაც 50-მდე აზერბაიჯანელის დაკავება და ორი მათგანის გაურკვეველ ვითარებაში გარდაცვალება მოყვა. რუსული მედია სამთავრობო წყაროებზე დაყრდნობით აცხადებს, რომ გარდაცვალების მიზეზი დაპატიმრების დროს მიღებული სტრესი გახდა. დაღუპულთა ახლობლები კი აზერბაიჯანულ მედიასთან ამბობენ, რომ ისინი რუს ძალოვნებს ცემისა და წამების დროს შემოაკვდათ.

იმ ფონზე, როდესაც „კოალიცია ცვლილებისთვის“ სამი ლიდერი ლიდერმა (ნიკა მელია, ნიკა გვარამია და ზურა (გირჩი) ჯაფარიძე) პატიმრობაშია, გაერთიანების მეოთხე ლიდერმა, ელენე ხოშტარიამ პარლამენტის წინ შიმშილობა დაიწყო. ამ აქციის მთავარი მიზანი რეჟიმის შეცვლის მოწოდების გარშემო საზოგადოების კონსოლიდაციაა. ანალიტიკოსების ნაწილი კონკრეტული მოთხოვნების გარეშე შიმშილობას პოლიტიკურ პერფორმანსად აფასებს, ნაწილი კი მიიჩნევს, რომ ეს პროტესტი დაპატიმრებული აქტივისტებისა და ოპოზიციონერების მიმართ სოლიდარობის გამოხატვაა და შესაძლოა, საპროტესტო მუხტის გაძლიერებასაც შეუწყოს ხელი.

იმ დროს, როდესაც ოპოზიციის ერთ ნაწილს „ოცნების" ხელისუფლების დელეგიტიმაცია და 4 ოქტომბრის ადგილობრივი არჩევნების ჩაშლა აქვს მიზნად დასახული, მეორე ნაწილი არჩევნებისთვის ექსპრეზიდენტ სალომე ზურაბიშვილის გარშემო დარაზმვას და თბილისის მერობის ერთიან ოპოზიციურ კანდიდატად მის წარდგენას ფიქრობს. ანალიტიკოსთა შეფასებით, იმის შანსი, რომ ზურაბიშვილი არჩევნებში მონაწილეობას დათანხმდეს, 50/50-ზეა. რაც შეეხება მის შანსებს მმართველი პარტიის სავარაუდო კანდიდატის, მოქმედი მერის, კახა კალაძის წინააღმდეგ, მათივე შეფასებით, ის არც ისე მაღალია.

აშშ-ის პრეზიდენტი დონალდ ტრამპი ფიქრობს, რომ რუსეთ-უკრაინის ომში, შესაძლოა, რაღაც მოხდეს, რაც მას „მოაგვარებს". ამის შესახებ ტრამპმა თეთრ სახლში ჟურნალისტებთან შეხვედრისას განაცხადა. სამხედრო ექსპერტები ფრონტზე არსებულ ვითარებას აფასებენ და ვარაუდობენ, რომ ტრამპის ადმინისტრაცია სერიოზული ნაბიჯების გადასადგმელად ემზადება.

ინფორმაცია ევროკავშირში მოლდოვას გაწვერიანებაზე მოლაპარაკების უკვე მომავალ კვირაში დაწყების შესახებ არაზუსტი აღმოჩნდა. თუმცა, მოვლენების განვითარებიდან გამომდინარე, მოლაპარაკებები, შესაძლოა, წელსვე გაიხსნას. ამან კი საქართველოზეც შეიძლება მოახდინოს გავლენა, რადგან ეს ეჭვქვეშ დააყენებს „ქართული ოცნების" წარმომადგენელთა მტკიცებას, რომ ევროკავშირის ყველა მოთხოვნის შესრულების შემთხვევაშიც კი, საქართველოსთან მოლაპარაკების გახსნა არ იგეგმებოდა და ევროკავშირი გაწევრიანების პერსპექტივას მხოლოდ საქართველოს ხელისუფლების შანტაჟისთვის იყენებდა.

საქართველოს მთავრობა კვლავ მზაობას გამოთქვამს აღადგინოს აშშ-სთან სტრატეგიული პარტნიორობა, თუმცა „კონკრეტული გზამკვლევით", სადაც ასახული იქნება „სარგებელი ორივე ქვეყნისთვის". ამავდროულად ღიადაა გაცხადებული და არაერთხელ ითქვა კიდეც, რომ ჩინეთთან ურთიერთობა ერთ-ერთი უმნიშვნელოვანესი პრიორიტეტია საქართველოს ხელისუფლებისთვის.

პრემიერი ირაკლი კობახიძე პარლამენტში 27 ივნისს ყოველწლიური მოხსენებით წარდგა, სადაც ყურადღება ქვეყნის უსაფრთხოებაზე, ეკონომიკურ ზრდაზე, სტრატეგიულ პარტნიორებზე, ანაკლიის პორტის პროექტზე, უმუშევრობის შემცირებასა და ნარკოპოლიტიკის გამკაცრებაზე გაამახვილა. კობახიძემ აშშ-სთან და ჩინეთთან ურთიერთობების გაღრმავების საჭიროებაზე ისაუბრა და აღნიშნა, რომ ხელისუფლება მზად არის, პარტნიორობა კონკრეტული შედეგებით გააძლიეროს.

სომხეთში ვითარება კიდევ უფრო რთულდება. სიტუაცია მას შემდეგ დაიძაბა, რაც ეროვნული უსაფრთხოების სამსახურის თანამშრომლები სრულიად სომეხთა კათოლიკოსის, გარეგინ II-ის რეზიდენციაში შირაკის ეპარქიის წინამძღვრის, მთავარეპისკოპოს მიქაელ აჯაფახიანის დასაკავებლად მივიდნენ, სადაც მათ მრევლმა წინააღმდეგობა გაუწია და მთავარეპისკოპოსის დაკავების საშუალება არ მისცა.