საერთაშორისო ბაზარზე ნავთობის ფასი იზრდება. ერთი ბარელის ღირებულებამ თითქმის 90 დოლარს მიაღწია. ეს ერთ თვეში ღირებულების დაახლოებით 16-17%-იან მატებას ნიშნავს. მსოფლიოში დაძაბული პოლიტიკური გარემო, პირველ რიგში, სწორედ შავი ოქროს ფასზე ახდენს გავლენას, ამიტომ ახლო მომავალში დამაიმედებელი არაფერი იკვეთება. საინტერესოა, გლობალურ ტენდენციას ექნება თუ არა გავლენა საქართველოზე მით უმეტეს მაშინ, როდესაც ქვეყანას, რუსეთის გადაწყვეტილების გამო, ბენზინის ექსპორტი შეეზღუდა.

ბელაურსმა პოლონეთის, ლიეტუვისა და უკრაინის მოსაზღვრე ოლქებში სამხედრო წვრთნები დაიწყო. სახელმწიფო სააგენტო „ბელტას" ინფორმაციით, გომელის ოლქის ტერიტორიული თავდაცვის ყოვლისმომცველი შემოწმების ფარგლებში 2-4 აპრილს, გომელის ოლქის სამხედრო კომისრის ხელმძღვანელობით, როგაჩოვისა და კორმიანსკის რაიონების ტერიტორიული თავდაცვის ძალებთან ერთად სამხედრო სწავლება გაიმართება.

სომხეთის თავდაცვის სამინისტრო აცხადებს, რომ აზერბაიჯანელმა სამხედროებმა საზღვარზე მისი პოზიციები დაბომბეს. აზერბაიჯანული მხარის თქმით კი, აზერბაიჯანის არმია სომხეთის შეიარაღებული ძალების მხრიდან მტკიცედ აღკვეთს აზერბაიჯანის წინააღმდეგ სამხედრო პროვოკაციის ნებისმიერ მცდელობას.

„ოცნება" შეერთებულ შტატებს მოუწოდებს ქართველ მოსამართლეებს სანქციები მოუხსნან, მიაჩნიათ, რომ შეზღუდვები არის „უსამართლო" და რომ ამერიკულ მხარეს მტკიცებულებები არ წარმოუდგენია. ანალიტიკოსთა ნაწილი მიიჩნევს, რომ ვაშინგტონმა საკითხს მართლაც უნდა გადახედოს. ნაწილი კი არ გამორიცხავს, რომ სია აშშ-სგან საერთოდაც გაფართოვდეს და საკითხი მოსამართლეებს გასცდეს, „ოცნების" მხრიდან კი ეს ნიადაგის მომზადება იყოს.

დმანისის მუნიციპალიტეტის სოფელ ჰამამლოში ფიზიკური დაპირისპირება სისხლიან ანგარიშსწორებაში გადაიზარდა. როგორც ადგილობრივები ყვებიან, დაპირისპირება დაჭრით დასრულდა. დანით, სხვადასხვა სახის დაზიანებები ორ ადამიანს აქვს მიღებული. ისინი კლინიკაში გადაიყვანეს. შემთხვევა კი სოფელში დაკრძალვაზე მოხდა. 

სამედიცინო დაწესებულებებში დიდი კორუფციაა. ფაქტობრივად, ყველა რგოლში სერიოზული დარღვევებია, რაც სახელმწიფოს მხრიდან უმკაცრესი ზომების გატარებას მოითხოვს. არის არაერთი დარღვევა, რაც პირდაპირ უკავშირდება პაციენტების ჯანმრთელობას და მატერიალურ ყოფას, ვინაიდან უკვე ფართომასშტაბიანი სახე მიიღო. გარდაცვლილი პაციენტები პირდაპირ ადანაშაულებენ მედპეროსნალს ფატალური შედეგების გამო, რაც დადასტურდა კიდეც, მაგრამ გამოსწორების პერსპექტივა ჯერჯერობით არ ჩანს.

განახლებადი ელექტროენერგიის განვითარების კუთხით საქართველო მნიშვნელოვან ნაბიჯებს დგამს. სპეციალისტების შეფასებით, ხელშესახები შედეგი საქართველოს ენერგეტიკულ სისტემაში უახლოეს 2-3 წელიწადში ექნება, თუმცა მდგომარეობის არსებით გაუმჯობესებას გაცილებით ხანგრძლივი პერიოდი სჭირდება, მით უმეტეს, რომ მსხვილი ენერგეტიკული პროექტების განხორციელება მხოლოდ გრძელვადიან პერსპექტივაშია ნავარაუდევი.

რუსეთი უკრაინის ქალაქების და სამოქალაქო ობიექტების დაბომბვას აგრძელებს. უკრაინაში, საჰაერო იერიშის გამო რამდენიმე ოლქში მოსახლეობას თავშესაფრებში მოუწია გადასვლა.მძიმე არტილერიითა და დრონებით დაბომბეს რუსულმა ძალებმა დნიპროპეტროვსკის ოლქში ნიკოპოლის რეგიონი. შეტევა იყო დონეცკზეც - დაშავდა 5 ადამიანი, მათ შორის ერთი მოზარდი. აფეთქებები ისმოდა ქალაქ ხარკოვში. დაზიანდა სამოქალაქო შენობები, მსხვერპლის შესახებ ინფორმაცია არ ვრცელდება.

The insider-ის, ამერიკული ტელეარხ CBSNews-ის გადაცემა „60 წუთის" და გერმანული ყოველ კვირეული გაზეთის, Der Spiegel- ის ჟურნალისტების დაახლოებით ერთი წლიანი გამოძიების თანახმად, ამერიკელ დიპლომატებზე ულტრაბგერითი იარაღით ზემოქმედების უკან რუსი აგენტი ალბერტ ავერიანი დგას.

31 მარტს, თურქეთში მუნიციპალური არჩევნები ჩატარდა, სადაც ოპოზიციურმა „სახალხო რესპუბიკურმა პარტიამ" ქვეყნის დიდ ქალაქებში გამარჯვება მოიპოვა. ეს მმართველმა პარტიამაც აღიარა. არჩევნებში მონაწილეობის უფლება დაახლოებით 61 მილიონ თურქს ჰქონდა. ქვეყნის 81 პროვინციაში ამომრჩეველთა აქტივობამ 77% გადააჭარბა. 81 პროვინციიდან 36-ში მთავარმა ოპოზიციურმა პარტიამ გაიმარჯვა.

სომხეთის დასავლეთთან ურთიერთობის გაღმავებისკენ სწრაფვით რუსეთი შეშფოთებულია, ერევანი კი უკვე ღიად აცხადებს, რომ დემოკრატიის გაძლიერების მიზნით, ევროკავშირსა და აშშ-სთან ურთიერთობა რეგიონსა და ქვეყანაში მშვიდობის დამყარებას ხელს უწყობს. ანალიტიკოსები არ გამორიცხავენ, რომ 5 აპრილის დაგეგმილი სამმხრივი სამიტის შემდეგ კრემლმა სომხეთის ხელისუფლების მისამართით უკვე კონკრეტული გამაფრთხილებელი განცხადება გააკეთოს.

პარლამენტი დაჩქარებული წესით განიხილავს „გირჩის" ინიციატივას, რომელიც საპარლამენტო საარჩევნო სიის ფორმირებისას გენდერული კვოტირების გაუქმების ითვალისწინებს, დღეს მოქმედი კანონით, ყოველ ოთხეულში ერთი ქალი მაინც უნდა იყოს. „გირჩმა" უმრავლესობასთან შეათანხმა, რომ ინიციატივას მხარს დაუჭერენ, სანაცვლოდ კი „ოცნება" „გირჩის" დეპუტატებისგან ცესკო-ს თავმჯდომარის პოზიციაზე წარდგენილ კანდიდატის მხარდაჭერას ითხოვს.