„ოცნების" ყოფლი დეპუტატ კახი კახიშვილის განცხადებას როგორც ოპოზიციაში, ისე სახელისუფლებო და ანალიტიკურ წრეებში, დიდი გამოხმაურება მოჰყვა. როგორც კახიშვილმა თქვა, შესაძლოა, კრიზისის განმუხტვის მიზნით, 2026 წელს რიგგარეშე საპარლამენტო არჩევნები ჩატარდეს. ანალიტიკოსები ფიქრობენ, რომ ეს შესაძლოა იყოს პირადი მოსაზრება, თუმცა არც იმას გამორიცხავენ, რომ „ოცნება" კახიშვილის პირით აჟღერებდეს ინიციატივას და უბრალოდ სცდიან ხალხის რეაქციას.

უკრაინის ომთან დაკავშირებით მოლაპარაკების მორიგი რაუნდი ხუთშაბათს, 10 აპრილს შედგება. აშშ-ისა და რუსეთის დელეგაციები ამჯერად სტამბულში შეხვდებიან ერთმანეთს. ამის პარალელურად კი უკრაინის დელეგაცია ვაშინგტონში მიემგზავრება, სადაც 10-11 აპრილს გამართვას შეხვედრებს. მსოფლიოს წამყვანი ეკონომისტები კი, საკუთარი ანალიზის საფუძველზე, ამ მოლაპარაკების პერსპექტივას აფასებენ და ზავის დადების ალბათობაზე საუბრობენ.

ამერიკულ სატარიფო ნუსხაში საქართველო ყველაზე დაბალ პროცენტულ განაკვეთში მოჰყვა. ეს გარემოება კი, ბიზესის ერთი ნაწილის განცხადებით, ქართულ პროდუქციას აშშ-ში კონკურენტუნარიანს გახდის. მათი მოსაზრება ასეთია - სატარიფო პირობებში გაძვირდება ყველა ქვეყნის პროდუქცია, თუმცა საქართველოში წარმოებული ყველაზე ნაკლებად, სწორედ დაბალი პროცენტული გადასახადის გათვალიწინებით. ასე რომ, ტრამპის გადაწყვეტილება ქართველი მწარმოებლებისთვის შეიძლება სასსრგებლოც აღმოჩნდეს.

ხელისუფლების ოპონენტები კიდევ ერთ სიმბოლურ დღეს, 9 აპრილს მორიგი აქციისთვის ემზადებიან. ამჯერად ორგანიზატორთა შორის ოფიციალურად არ იქნებიან ოპოზიციური პარტიები. ამავე პერიოდში პარლამენტის წინ სასულიერო პირები ჩაატარებენ პარაკლისს 9 აპრილს დაღუპულთა სულებისათვის და ქაშუეთის ეკლესიაში კი ზარები დაირეკება. აქციის ორგანიზატორები აცხადებენ, რომ ეს მათსა და საპატრიარქოს შორის შეთანხმების საფუძელზე ხდება, თუმცა, საპატრიარქო ამას არ ადასტურებს.

უცხოური გრანტების მისაღებად მთავრობის ან მთავრობის მიერ განსაზღვრული უფლებამოსილი პირის თანხმობა იქნება საჭირო. „გრანტების შესახებ" კანონში ცვლილებები 7 აპრილს ფრაქცია „ქართულმა ოცნებამ" წარადგინა. სამოქალაქო სექტორის წარმომადგენლები აცხადებენ, რომ მიზანი არასამთავრობო ორგანიზაციებზე სრული კონტროლის მოპოვებაა. მმართველ პარტიაში კი ხაზგასმით ამბობენ, რომ კანონი არა გრანტის მიღებას, არამედ გაცემას ეხება.

საერთაშორისო ბაზარზე დოლარის დასუსტების ტენდენცია კვლავ გრძელდება. ტრამპის მიერ იმპორტირებულ საქონელზე ტარიფების გამოცხადებამ საფონდო ბირჟებზე ფასიანი ქაღალდების მკვეთრი ვარდნა გამოიწვია. შემზღუდავ განცხადებებ უკუშედეგი მოჰყვა და დოლარის ინდექსმა შემცირება დაიწყო. მასთან მიმართბით მყარდება სხვადასხვა ქვეყნის ვალუტები და ქართული ლარიც. 

ნავთობის ფასი კატასტროფულ ვარდნას განიცდის. ამის მიზეზი გლობალური პროცესები, ტრამპის სატარიფო პოლიტიკა და ეკონომიკის მიმართ ნეგატიური მოლოდინია. ბოლო სამი დღის განმავლობაში 1 ბარელი ნავთობის ღირებულება 63 დოლარამდე ჩამოვიდა და სავარაუდოდ, კიდევ დაიკლებს. ექსპერტები პროგნოზირებენ, რომ  ფასი შესაძლოა 55-დოლარიან ნიშნულს მიუახლოვდეს. 

პრემიერ ირაკლი კობახიძის განცხადებას, რომ შესაძლებელია საქართველოს ტერიტორიული მთლიანობის აღდგენა, ოკუპირებული აფხაზეთისა და ცხინვალის ე.წ. საგარეო უწყებები გამოეხმაურა.

დამატებითი შეზღუდვები პარტიებისთვის - პარლამენტს განსახილველად დაჩქარებული წესით "მოქალაქეთა პოლიტიკური გაერთიანებების შესახებ" კანონში ცვლილება წარედგინა, სადაც აღნიშნულია, რომ ცვლილების ამოქმედების მერე, პარტიები და გაცხადებული საარჩევნო მიზნის მქონე პირები უცხოური ორგანიზაციების მხარდაჭერით ლექციის, სემინარის, ან სხვა მსგავსი საჯარო ღონისძიების მოწყობას ვეღარ შეძლებენ.

აშშ-ში მთელი ქვეყნის მასშტაბით გამართული მოძრაობის - „ხელები შორს!" ფარგლებში დემონსტრანტები აპროტესტებდნენ ტრამპის ადმინისტრაციისა და აშშ-ს მთავრობის ეფექტურობის დეპარტამენტის ხელმძღვანელის ილონ მაკსის მიერ მიღებულ გადაწყვეტილებებს.

ურსულა ფონ დერ ლაიენი აცხადებს, რომ ევროკავშირი საჭიროების შემთხვევაში, ტრამპის მიერ დაწესებულ ტარიფებზე საპასუხო ზომებისთვის მზადაა. მისივე ინფორმაციით, ასევე, განიხილეს უსაფრთხოებისა და თავდაცვის საკითხები და ევროკავშირი-დიდი ბრიტანეთის მომავალი სამიტი.

"ქართული ოცნება" აცხადებს, რომ მზადაა აშშ-სთან ურთიერთობა "ახალი ფურცლიდან დაიწყოს", თუმცა, მთავარ გამოწვევად "დიფ სთეითის" დამარცხება-არდამარცხების" საკითხს ასახელებენ. თავად ვაშინგტონის მხრიდან საქართველოს მისამართით ვრცელი ოფიციალური განცხადება არ გავრცელებულა, თუმცა იყო გარკვეული სიგნალები, რაც ანალიტიკოსებს აფიქრებინებს, რომ მიუხედავად წინა პლანზე არსებული სხვა აქტიური საკითხებისა, საქართველო და სამხრეთ კავკასიის რეგიონი აშშ-სთვის ინტერესის სფეროა.