ახალი სესხი არ გვჭირდება, მაგრამ საერთაშორისო სავალუტო ფონდი დაჟინებით გვთავაზობს. საქართველოს ფინანსთა მინისტრი აცხადებს, რომ ამ ეტაპზე, ქვეყანას სსფ-გან დაფინანსების მოზიდვის საჭიროება არ აქვს, მაგრამ ფონდის მისიის ხელმძღვანელი მზადაა ნებისმიერ დროსა და ფორმატში თანამშრომლობისთვის. ეკონომიკისტები ფინანსთა მინისტრის გადაწყვეტილებას მხარს უჭერენ და აცხადებენ, რომ სსფ ახალ სესხს საკუთარი ინტერესებიდან გამომდინარე გვთავაზობს. შუა დერეფანზე, რომელიც საქართველოზე გადის და ერთადერთი უსაფრთხო სავაჭრო გზაა, კონტროლის დასამყარებლად საერთაშორისო საფინანსო ორგანიზაციები ირგვლივ გვიტრიალებენ.

ვიქტორ ორბანს 12 აპრილის საპარლამენტო არჩევნებში ტრამპის ადმინისტრაციის სრული მხარდაჭერა აქვს, ამის სადემონსტრაციოდ ვიცე-პრეზიდენტი ჯეი დი ვენსი სამშაბათს ბუდაპეშტშიც კი ჩავიდა. ერთობლივ პრესკონფერენციაზე ვენსმა თქვა, რომ ბრიუსელის ბიუროკრატები „უნგრელი ხალხის დაჩაგვრას ცდილობენ". თავის მხრივ ვიზიტს ოპოზიციური ფრთა ეხმიანება და აღნიშნავს, რომ უცხო ქვეყანას არჩევნებში ჩარევის უფლება არ აქვს.

„ქართული ოცნება" აცხადებს, რომ აშშ-სთან სტრატეგიული პარტნიორობის განახლების პერსპექტივა სულ უფრო რეალური ხდება, მმართველ პარტიაში ოპტიმისტური მოლოდინი აქვთ და კვლავ აცხადებენ, რომ მზად არიან ურთიერთობები „ახალი ფურცლიდან დაიწყონ", თუმცა არა ცალმხრივი, არამედ ორივე მხარის ინტერესების გათვალისწინებით.

ამერიკის პრეზიდენტის, დონალდ ტრამპის მიერ ირანისთვის მიცემული ულტიმატუმის ვადა, რაც ყველა ხიდისა და ელექტროსადგურის განადგურებას ითვალისწინებს, იწურება, თუმცა საუბარი მიდის, რომ შესაძლოა გახანგრძლივდეს. ირანი უკან არ იხევს - ჰორმუზის სრუტე კვლავ ბლოკირებულია, რაც კიდევ უფრო სერიოზულ პრობლემებს უქმნის მსოფლიო ეკონომიკას.

პოლიტოლოგი იგორ კვესელავა ქართულ-ამერიკულ ურთიერთობებზე საუბრისას ამბობს, რომ აშშ-მ „პოლიტიკური მანდილი" შემოაგდო და მთავარია რას იზამს „ქართული ოცნება". მისი აზრით, ამერიკული დეგელაციის ვიზიტი, რომელიც მომავალ კვირას არის ჩანიშნული, პრეზიდენტ დონალდ ტრამპის სამხრეთ კავკასიით დაინტერესებას უკავშირდება. ვარაუდობს, რომ ვაშინგტონი ანაკლიის პორტითაა დაინტერესებული.

წინასააღდგომო ვაჭრობა აქტიურობით გასული წლის მაჩვენებელს საგრძნობლად ჩამორჩება. ამის მიზეზი გაზრდილი ხარჯია, რის გამოც მომხმარებელს სადღესასწაულო პროდუქტზე არჩევანი უჭირს და შედარებით იაფი პროდუქტის შეძენას ამჯობინებს. ყველაზე მეტი მოთხოვნა, რასაკვირველია, სააღდგომო პასქაზეა. სუპერმარკეტები მომხმარებელებს პროდუქციას გარკვეული ფასდაკლებით სთავაზობენ. ადგილობრივი წარმოების პასკების ფასი, საშუალოდ, 5-6 ლარიდან იწყება 35-40 ლარის ფარგლებშია, თუმცა არის გაცილებით ძვირიანი ნაწარმიც.

უახლოეს მომავალში შესაძლებელია ბავშვთა კვებაზე ზღვრული ფასი დადგინდეს. სახელმწიფოს ინიციატივას სპეციალისტები ერთხმად მიესალმებიან. დღეს ახალგაზრდა ოჯახებისთვის ეს ერთ-ერთი მთავარი ხელისშემშლელი ფაქტორია.

ახლო აღმოსავლეთში შექმნილმა მდგომარეობამ და ნავთობპროდუქტებზე გაძვირებამ მომსახურების და წარმოების  სფეროზე უარყოფითი გავლენა უკვე მოახდინა. პირველ რიგში, ეს შეეხო სატრანსპორტო სერვისს, საქალაქთაშორისო რეისები ძვირდება, ტაქსის მომსახურების ფასიც იცვლება, ხოლო დიზელის გაძვირება საგაზაფხულო სამუშაოებზე მოახდენს გავლენას და შეიძლება შემაფერხებელ ფაქტორადაც იქცეს. სერიოზულ წნეხია ელექტროენერგიის ტარიფის მატებაც, რამაც ყველა დარგში ცუდი მოლოდინი შექმნა.

6 აპრილის ღამით, უკრაინის შეიარაღებული ძალების უპილოტო სისტემების ძალებმა რუსეთის შავი ზღვის პორტში, ნოვოროსიისკი, იერიში მიიტანეს ფრეგატზე ადმირალ მაკაროვი და საბურღ პლატფორმა „სივაშზე". ოპერაციის შესახებ ინფორმაციას უპილოტო სისტემების ძალების მეთაური, რობერტ ბროვდი ავრცელებს.

„ქართული ოცნება" გრანტების შესახებ კანონში მორიგ ცვლილებას აინიცირებს და განმარტავს, რა დაფინანსება აღარ ჩაითვლება გრანტად. ცვლილება დიპლომატიური წარმომადგენლობებისა და საერთაშორისო ორგანიზაციების მიერ გაცემულ სახსრებს ეხება, თუმცა, ინიციატივა უკვე აჩენს კითხვებს - ეს არის ტექნიკური დაზუსტება თუ პოლიტიკურად მოტივირებული ნაბიჯი.

რეგიონში შექმნილი სიტუაცია და მშვიდობის მნიშვნელობა, საქართველოსა და აზერბაიჯანის როლი სამხრეთ კავკასიაში, შუა დერეფანი, ეკონომიკური ურთიერთობები, ბაქო-თბილისი-ჯეიჰანის ნავთობსადენი - ეს იმ თემების მოკლე ჩამონათვალია, რაზედაც აზერბაიჯანის პრეზიდენტის, ილჰამ ალიევის თბილისში ვიზიტისას მხარეებმა მიმოიხილეს.

ტელეკომპანია „იმედის" დარბევაზე ექსპრემიერი, ზურაბ ნოღაიდელი 6 აპრილს, სასამართლოზე მოწმის სტატუსით წარსდგა, სადაც ადგილი ჰქონდა მცირე დაპირისპირებას. სიტუაცია მას შემდეგ დაიძაბა, რაც მესამე პრეზიდენტმა მიხეილ სააკაშვილმა მას კითხვებით მიმართა და მოღალატე უწოდა. მათი გაშველება მანდატურის სამსახურის წარმომადგენლებსა და მხარეებს მოუწიათ.