„ოცნება" ენჯეოებს კვლავ მწვავედ აკრიტიკებს - მმართველი პარტია წინააღმდეგია ვეტინგის სისტემის დანერგვის, რომელიც მოსამართლეთა კეთილსინდისიერების შემოწმებას გულისხმობს და აცხადებს, რომ ეს „რამდენიმე არასამთავრობო ორგანიზაციამ გაააქტიურა". მათი შეფასებით, „მდიდარი არასამთავრობო ორგანიზაციები დიდ ფსონს დებდნენ" იმ მოსამართლეებზე, ვინც ამ იდეას ემხრობა.

ქედაში 53 წლის კაცს 15 წლის დისშვილზე სექსუალური ხასიათის დანაშაულს და ასევე გოგონას შეყვარებულის დაჭრას ედავებიან. მას თუ ბრალი დაუმტკიცდა, 15 წლამდე პატიმრობა ემუქრება. როგორც „რეზონანსს“ ადგილობრივები უყვებინ, პოლიციამ ბიძასთან ერთად გოგონას დეიდაც დააკავა. ცოლ-ქმარი მაშინ აიყვანეს, როდესაც გოგონამ პოლიციაში დარეკა და განაცხადა, რომ დეიდამ სიმართლის გაგების შემდეგ მასზე ფიზიკურად იძალადა. გოგონამ დახმარებისთვის ასევე 15 წლის შეყვარებულს მიმართა, რომელმაც კაცთან დალაპარაკება სცადა, მან კი მოზარდი ცივი იარაღით დაჭრა. 

ლაგოდეხის მუნიციპალიტეტის ერთ-ერთ სოფელში ნათესავი ქალის გაუპატიურების მცდელობის ბრალდებით 30 წლამდე კაცი დააკავეს. საქმე 2023 წლის ოქტომბერში მომხდარ დანაშაულს ეხება. როგორც ადგილობრივები „რეზონანსთან“ ყვებიან, კაცს მაშინ ნათესავები თავად გაუსწორდნენ - ქალის ტანსაცმლის ჩაცმა აიძულეს და სოფელში ასე ჩამოატარეს. ამის გამო იგი პოლიციამ იგი დაზარალებულადაც სცნო და ამ საქმეზე 3 პირიც დააკავა. თუმცა მოგვიანებით დადგინდა, რომ 30 წლის მამაკაცმა ნათესავ ქალზე ძალადობა მართლაც სცადა და პოლიციამ შესაბამისი მუხლით ისიც დააკავა.

ნარკოტიკებთან ბრძოლას შინაგან საქმეთა სამინისტრო და სამართალდამცველები აგრძელებენ. კიდევ ერთი ხმაურიანი დაკავება თბილისში, დადიანის ქუჩაზე ნაქირავებ საცხოვრებელ სახლში მოხდა. სამართალდამცველებმა ახალგაზრდა ქალი და მამაკაცი დააკავეს. მეზობლები ადასტურებენ, რომ ამ მისამართზე პოლიცია ნამდვილად იყო მობილიზებული. გამოძიების ინფორმაციით, ადგილზე აღმოჩენილია დიდი ოდენობით სარეალიზაციოდ გამზადებული ნარკოტიკი. სამართალდამცველებმა ამოიღეს სპეციალური ხელსაწყოებიც, რითაც წყვილი ნარკოტიკულ საშუალებებს გასაყიდად ამზადებდა.

რუსთავში, თორდიას ქუჩაზე, ახალგაზრდა კაცი ყოფილ ცოლს მიუვარდა და სიცოცხლის მოსპობით ემუქრებოდა. როგორც ადგილობრივები ყვებიან, ახალგაზრდა ქალი მეგობრებთან ერთად იმყოფებოდა, როდესაც მისი ყოფილი ქმარი გამოჩნდა, მასთან დალაპარაკებას ითხოვდა და წინააღმდეგ შემთხვევაში მოკვლით ემუქრებოდა.

ავსტრიის პოლიციამ ქართველების დაჯგუფება დააკავა, რომელმაც, გამოძიების მიხედვით, ავსტრიის ქალაქ კრემსის სხვადასხვა რაიონში ათამდე მდიდრული სახლი გაძარცვა. ჯამში კი ნაქურდალმა  107 000 ევროს ჯამური ზარალი შეადგინა.  მედიის ცნობით, საქართველოს ოთხმა მოქალაქემ  2023 წლის ნოემბრიდან 2024 წლის იანვრის ჩათვლით, სახლები კარგად ორგანიზებული სქემით გაქურდა. 

მუქარა და სიცოცხლის მოსპობის საფრთხე - როგორც თვითმხილველები ჰყვებიან, რუსთავში, მესხიშვილის ქუჩაზე კაცი მეუღლეს დაემუქრა. ფაქტის შემსწრენი ამბობენ, რომ კავი ქალს მოკვლით ემუქრებოდა და სიტყვიერ შეურაცხყოფას აყენებდა. არსებობდა საფრთხე, რომ ქალს ფიზიკურად გაუსწორდებოდა ან მუქარას სისრულეში მოიყვანდა. ამიტომ მარკეტში მყოფმა ხალხმა პოლიციაში დარეკვა გადაწყვიტა. ადგილზე  მისულმა სამართალდამცველებმა კაცი დააკავეს.    

უმრავლესობაში არასამთავრობო ორგანიზაციების თემა კვლავ გააქტიურდა - მმართველი პარტია მოითხოვს, დონორებმა იმ არასამთავრობო ორგანიზაციების დაფინასება შეწყვიტონ, რომელთა სახსრები „პარტიულ ჯიბეებში მიდის". ამ თემის წამოწევას წინ უძღვოდა ამერიკის დემოკრატიის ეროვნული ფონდის (NED) ხელმძღვანელის კენ ვოლაკის განცხადება, სადაც ამბობს, რომ თუ სამოქალაქო საზოგადოების ჯგუფები პოლიტიკური პარტიის წევრები არიან, ან პოლიტიკური ძალაუფლებისთვის იბრძვიან, „ეს უკვე სამოქალაქო საზოგადოების ორგანიზაციები არ არის".

აჭარის განათლებისა და მეცნიერების მინისტრის მოადგილის შვილის დაკავების შესახებ ახალი დეტალები ხდება ცნობილი. თამარ გუდავამ , რომლის 20 წლის შვილსაც გამოძიება ნარკოტიკული საშუალების რეალიზაციას ედავება, თანამდებობა 5 მარტს დატოვა. გამოძიების ინფორმაციით კი, ამოღებულია აკრძალული ნივთიერებების განსაკუთრებით დიდი რაოდენობა. პროკურატურის ინფორმაციით, ბრალდებულმა მეგობართან ერთად ნარკოტიკები თერჯოლის ერთ-ერთ სოფელში ე.წ. ლოკაციაზე დადო, ფოტოები მყიდველს გადაუგზავნა, რის შემდეგაც მოვლენები დრამატულად განვითარდა.

თვითმკვლელობა თუ მკვლელობა - რა  გახდა 19 წლის ბიჭის გარდაცვალების მიზეზი, ჯერჯერობით უცნობია. რუსთავში, თორდიას ქუჩაზე მე-8 სართულის ფანჯრიდან ახალგაზრდა ბიჭი გადმოვარდა თუ გადმოაგდეს, ჯერჯერობით უცნობია. ცნობილია ის, რომ სიმაღლიდან ვარდნის შედეგად ახალგაზრდა გარდაიცვალა.

ლილოში მომხდარი უმძიმესი დანაშაულის ახალი დეტალები ხდება ცნობილი. 22 წლის ქეთი ჯავახიშვილის მკვლელობაში ბრალდებული სამართალდამცველებმა ზუგდიდში დააკავეს - ხელბორკილები 21 წლის ოთარ ცინდელიანს მაშინ დაადეს, როცა ის სვანეთში წასვლას აპირებდა. პოლიცია ცინდელიანის კვალზე ქეთი ჯავახიშვილის მობილური ტელეფონის გაშიფვრის შემდეგ გავიდა. გოგონას ახლობლები და მეზობლები ამბობენ, რომ ახალგაზრდა კაცი, რომელიც ასევე ოჯახის ახლობელი იყო, მას ფულის გამოძალვის მიზნით აშატაჟებდა.