საერთაშორისო ბაზარზე დოლარის დასუსტების ტენდენცია კვლავ გრძელდება. ტრამპის მიერ იმპორტირებულ საქონელზე ტარიფების გამოცხადებამ საფონდო ბირჟებზე ფასიანი ქაღალდების მკვეთრი ვარდნა გამოიწვია. შემზღუდავ განცხადებებ უკუშედეგი მოჰყვა და დოლარის ინდექსმა შემცირება დაიწყო. მასთან მიმართბით მყარდება სხვადასხვა ქვეყნის ვალუტები და ქართული ლარიც. 

ნავთობის ფასი კატასტროფულ ვარდნას განიცდის. ამის მიზეზი გლობალური პროცესები, ტრამპის სატარიფო პოლიტიკა და ეკონომიკის მიმართ ნეგატიური მოლოდინია. ბოლო სამი დღის განმავლობაში 1 ბარელი ნავთობის ღირებულება 63 დოლარამდე ჩამოვიდა და სავარაუდოდ, კიდევ დაიკლებს. ექსპერტები პროგნოზირებენ, რომ  ფასი შესაძლოა 55-დოლარიან ნიშნულს მიუახლოვდეს. 

სურსათის უვნებლობასთან დაკავშირებით კონტროლი სისტემატურად მიმდინარეობს.  რძის პროდუქტების შემთხვევაში კი, გეგმური კონტროლი, საშუალოდ, წლიურად 4-ჯერ ხორციელდება.  ამასთან, მნიშვნელოვანია მომხმარებლის აქტიურობაც, რათა ნებისმიერი დარღვევის აღმოჩენის შემთხვევაში, დროულად  ეცნობოს სურსათის ეროვნულ სააგენტოს და  მყისიერი რეაგირება დაიწყოს. ასეთ შემთხვევაში ტარდება არაგეგმური შემოწმება.

ინფლაცია იმაზე სწრაფად იზრდება, ვიდრე მოსალოდნელი იყო. მან მთავრობის მიერ დადგენილ მიზნობრივ მაჩვენებელს არათუ წლის მეორე ნახევარში, არამედ წლის პირველ კვარტალშივე გადააჭარბა. საქონლისა და მომსახურების გაძვირება მოსახლეობისთვის ისედაც თვალში საცემია. ეკონომისტები შექმნილი ვითარებიდადნ გამომდინარე, ინფლაციის ზრდა ლოგიკურად მიაჩნიათ. ქვეყანაში არსებული არასახარბიელო ფონი და მსოფილოში შექმნილი გაურკვეველი პოლიტიკური ვითარება, საერთო ჯამში, არასახარბიელო სურათს ქმნის. ამიტომაც, ვარაუდობენ, ფასების ზრდა გარკვეული პერიოდის განმავლობაში შეიძლება კვლავ გრძელდეს. 

მსოფლიოში სავაჭრო ომი მიმდინარეობს. ამერიკის შეერთებული შტატები ქვეყნებს საგადასახადო ტარიფებს უწესებს, მიდგომა ყველა ქვეყანასთან განსხვავებულია. ყველაზე დაბალი ზღვარი 10%-ია, რომელშიც ჩვენს მეზობელ ქვეყნებთან ერთად, მოჰყვა საქართველოც. გადაწყვეტილებამ მსოფლიო დღის წესრიგი შესაძლოა, საერთოდ შეცვალოს და პირველი შედეგი, როგორც ეკონომისტები ელიან, თავად აშშ-ში იქნება. 

კერძო ბიზნესს ახლა ყველაზე მეტად ფინანსებზე წვდომა უჭირს. ანალოგიური პრობლემა იყო პანდემიის პერიოდში და უკვე ახლაც, რაზეც მხოლოდ პოლიტიკური ვითარება არ მოქმედებს. მსოფლიოში რეცესიის ნიშნებია, ბიზნესს შეიძლება პრობლემა შეექმნას. მოთხოვნის თვალსაზრისით პრობლემაა ყველა დარგში, რომლის საქმიანობაც პირდაპირ თუ ირიბად სამშენებლო ბიზნესს უკავშირდება. ასევე ტურიზმის ინდუსტრიაში და წარმოების სხვადასხვა სფეროში.

საქართველოში კერძო სამედიცინო დაზღვევა დიდი პოპულარობით ვერ სარგებლობს, მას მოსახლეობის მხოლოდ 20% იყენებს, რასაც თავისი ახსნა აქვს. სხვადასხვა გარემოებებთან ერთად, ყველაზე მნივნელოვანი მიზეზი დაზღვევის დაბალი კულტურა და მისი სიძვირეა. თანაც, საქართველოში საყოველთაო დაზღვევა საკმაოდ კარგად მუშაობს, რაც ასევე ერთ-ერთი მნიშვნელოვანი ფაქტორია. 

თბილისში მშენებლობის ბუმია. დედაქალაქში თითქმის არ მოიძებნება ისეთი ადგილი, სადაც მშენებლობა არ მიმდინარეობს და ახალი კორპუსის ჩადგმა არ ხდება. ეს კი პრობლემაა როგორც ურბანული, ისე ეკოლოგიური თვალსაზრისით. საინტერესოა, რამდენად არის შესაძლებელი ახალი პროექტების მშენებლობამ ქალაქგარეთ ტერიტორიებზე გადაინაცვლოს. 

თბილისში მეტროს დაგრძელება და ახალი სადგურების მშენებლობა იგეგმება, საუბარია ვარკეთილის და გლდანის მიმართულებაზე. ცნობილია, რომ მეტროს პირველი ხაზი 5 კილომეტრით დაგრძელდება და ზემოხსენელებულ მიმართულებებს ახალი 2.2 და 3-კილომეტრიანი სადგურები დაემატება. ჯერჯერობით უცნობია, ვარკეთილიდან და გლდანიდან გაგრძელება კონკრეტულად რა მიმართულებით მოხდება, მაგრამ სპეციალისტების განცხადებით, დედაქალაქისთვის ძალიან მნიშვნელოვანია მისი განხორციელება. 

კომპანია ,,ბრიტიშ ეარვეისი" ქართულ ავაიბაზარზე შემოვიდა. საქართველოსა და დიდ ბრიტანეთს შორის პირდაპირი საჰაერო მიმოსვლის დაწყება ჩვენი ქვეყნის ტურიზმისა და ავიაციის განვითარებისთვის მნიშვნელოვანია. პროცესს მიესალმებიან და დადებითად აფასებენ დარგის სპეციალისტები. ისინი მიჩნევენ, რომ საქართველოს ავაიხაზების განვითარებისთვის ეს ერთ-ერთი წინგადადგმული ნაბიჯია. 

ღია ბანკინგის სისტემის დანერგვა თანამედროვე საგადამხდელო ურთიერთობებს უფრო სწრაფსა და მოქნილს ხდის, თუმცა ადგილობრივი პლასტიკური ბარათებისთვის საფრთხეა, რადგან მას უცხოეთში მუშაობის შესაძლებლობას უსპობს. არსებობს მოსაზრება, რომ სებ-ის ასეთი გადაწყვეტილება სპეციალურად გამიზნულია სანქცირებული ადამიანებისთვის და მათთვის ალტერნატივის შექმნის მცდელობაა. არ არის გამორიცხული, რომ ამით ადგილობრივი პლასტიკური ბარათები სრულად ჩანაცვლდეს.

საქართველოში მძიმე დემოგრაფიული სურათია, რასაც წინა წლების მსგავსად შარშანდელი სტატისტიკაც მოწმობს. მიზეზი ბევრნაირია, მაგრამ გამოსავალი ჯერჯერობით არ ჩანს. ითქვა, რომ დემოგრაფიული მდგომარეობის გამოსწორებას მთავრობა შეეცდება, მაგრამ ამ ეტაპზე კონკრეტული გეგმა არ არსებობს. ამასობაში, სანამ რაიმე გაირკვევა, საქართველოში ქორწინება იკლებს, განქორწინება მატულობს, ქვეყანაში ნაკლები ბავშვი იბადება და ბევრი ადამიანი იღუპება, რაც დემოგრაფიულთან ერთად, ეკონომიკაში პრობლემებს ქმნის.