ეროვნული ვალუტა დიდი ხანია, მყარდება და დადებითი ტენდენცია კიდევ გასტანს. ასეთ პროგნოზს აკეთებს ფინანსისტთა ერთი ნაწილი, ხოლო მეორე ნაწილი შემოდგომიდან შედარებით გაუფასურებას ვარაუდობს, იქამდე კი, ზაფხულის პერიოდში, კურსის სტაბილიზაცია და გამყარებაა მოსალოდნელი. ეკონომისტები ამბობენ, რომ ლარი ჯერ კიდევ ახალი წონასწორული ნიშნულის ძიებაშია და არ არის გამორიცხული, რომ 2.80-ს ჩასცდეს და 2.75-იანი ნიშნულისკენ დაიძრას. ბლუმბერგის სავაჭრო პლატფორმაზე ერთი ამერიკული დოლარი 2.81 ლარი ღირს, ოფიციალური მონაცემებით კი, საქართველოში 1 დოლარის შეძენა 2.82 ლარად არის შესაძლებელი.

მომდევნო 5 წელიწადში საქართველოს ტრანზიტად გატარებული გაზიდან 1,5 მლრდ კუბმეტრი დარჩება, რაც ენერგეტიკის სფეროსა და ზოგადად, ქვეყნის ეკონომიკისთვის ძალიან დიდი შეღავათია. საქართველოზე გამავალი „სამხრეთის გაზის დერეფნის" გამტარუნარიანობა ორმაგდება და ევროკავშირისთვის 2027 წლამდე ყოველწლიურად არანაკლებ 20 მლრდ კუბმეტრი გაზის მიწოდება იქნება შესაძლებელი. მართალია, გლობალური გაძვირების ფონზე, ჩვენთან ბუნებრივი აირის ტარიფის გაიაფება რეალურად ვერ მოხერხდება, მაგრამ შესაძლებელი გახდება, რომ არსებული ტარიფი დიდხანს შენარჩუნდეს.

საქართველოს საბანკო სისტემაში მალე ახალი ცვლილება შევა ძალაში. კერძოდ, 1-ლი სექტემბრიდან 200 000 ლარამდე სესხის აღება უცხოურ ვალუტაში კვლავ შესაძლებელი იქნება. საქართველოს ეროვნული ბანკის ახალი განკარგულება შეეხებათ როგორც ფიზიკურ, ისე იურიდიულ პირებს. საბანკო სფეროს სპეციალისტების აზრით, ახალი გადაწყვეტილება სექტორს მნიშვნელოვან ცვლილებებს ვერ მოუტანს. ახალი ბრძანების თანახმად, კომერციული ბანკები უფლებამოსილნი არიან, 200 000 ლარამდე სესხები/საბანკო კრედიტები გასცენ უცხოური ვალუტით, თუ სესხი/საბანკო კრედიტი სრულადაა უზრუნველყოფილი ფულადი სახსრებით იმავე ვალუტაში.

განსაკუთრებული გაძვირების შემდეგ, მზესუმზირის ზეთი მალე გაიაფდება. ასეთი მოლოდინი პროდუქციაზე რუსეთში საექსპორტო მცურავი გადასახდის კლებამ შექმნა. იმპორტიორები ვადად 2-3 კვირას ასახელებენ და ამბობენ, რომ აგვისტოს თვის დასაწყისში მზესუმზირის ზეთის ღირებულება, მინიმუმ, 10%-ით დაიკლებს. 1-ლი ივნისიდან რუსეთმა მზესუმზირის ზეთზე საექსპორტო გადასახადი ტონაზე 372,3-დან 525 დოლარამდე გაზარდა, ივლისიდან კი 10%-ით შეამცირდა და 472 დოლარამდე ჩამოვიდა. რადგანაც რუსეთი მთავარი ქვეყანაა, საიდანაც საქართველო ზეთს ყიდულობს, ეს გარემოება ქმნის იმის საფუძველს, რომ მზესუმზირის ზეთი გაიაფდება.

მაღალი ინფლაციის ფონზე, საქართველოში ხელფასების საკითხი გააქტიურდა. გარკვეულ გადახედვას მოითხოვს ანაზღაურების მოცულობა როგორც საჯარო, ასევე კერძო სექტორში. მთავრობა აპირებს, რომ 2023-2025 წლებში საჯარო სექტორში დასაქმებულების შრომის ანაზრაურება ყოველწლიურად 10%-ით გაზარდოს, რასაც სპეციალისტების ნაწილი მიესალმება და ფიქრობს, რომ ხელფასი უნდა მატულობდეს ყოველწლიურად არანაკლებ 3%-ით, თუმცა არის განსხვავებული მოსაზრებაც. იურისტებისა და ეკონომისტების მეორე ნაწილს მიაჩნია, რომ სერიოზული მუშაობა უნდა გატარდეს ბიუროკრატიული ხარჯის შესამცირებლად და ხელფასის ზრდა უნდა მოხდეს მხოლოდ კადრების შემცირების ხარჯზე, რომელიც ხელოვნურად არის გაბერილი. არსებული სახელფასო პოლიტიკა კერძო სექტორის მაჩვენებლებს საგრძნობლად ჩამორჩება და ეს სხვაობა 2026 წლამდე აღმოფხვრილი უნდა იყოს.

გლობალურ ბაზრებზე ფასების კლების ტენდენციაა, საქართველოში კი სიტუაცია უცვლელია და ფასები უსაფუძვლოდ მატულობს. იმის გამო, რომ ბაზარი არაკეთილსინდისიერი იმპორტიორებისა და ბიზნესმენების ხელშია, დადებითი პროცესების გავლენა მინიმალურ დონეზეც არ იგრძნობა და ამასობაში, გაზრდილი ფასების პირობებში, მოსახლეობის მდგომარეობა გაუსაძლისია. ეს ხდება მაშინ, როცა მსოფლიოში ფასების პიკი დაძლეულია და რიგი მიმართულებით გაიაფების აშკარა ნიშნებია, მათ შორის _ სტრატეგიულ საკვებ პროდუქტებზეც.

საქართველოში საწვავის იმპორტი და მოხმარება შემცირდა. ცვლილება, ძირითადად, ბენზინსა და დიზელის საწვავს შეეხო. როგორც ნავთობპროდუქტების იმპორტიორთა კავშირის მიერ გავრცელებული სტატისტიკური მონაცემიდან ირკვევა, იმპორტმა ორივე მიმართულებით (ბენზინი და დიზელი) კლება განიცადა, რასაც ორგანიზაციის ხელმძღვანელი ვანო მთვრალაშვილი რეგიონში მიმდინარე ომს უკავშირებს, რამაც სავაჭრო ურთიერთობებში დიდი გარდატეხა მოახდინა და ეს აისახა საწვავის ბიზნესზეც, რომლის იმპორტიც ბოლო პერიოდის განმავლობაში მცირდება.

საქართველოში ზაფხულის ტურისტული სეზონი სულ ცოტა ხანის წინ გაიხსნა. კურორტები როგორც ადგილობრივი, ასევე უცხოელი ტურისტებით არის სავსე და უკვე შეიძლება იმის თქმა, რომ სეზონს ჩავარდნა არ ემუქრება, თუმცა იკვეთება არასასიამოვნო რეალობა დამსვენებლებისათვის _ აბსოლუტურად ყველგან გასაქირავებელი ბინები შესამჩნევად გაძვირებულია და შიდა ტურისტების საკმაო ნაწილისთვის -  მიუწვდომელიც კი

სასურსათო უსაფრთხოების გამოწვევების საპასუხოდ საქართველოს მთავრობა გადამწყვეტი ზომების მიღებას იწყებს. პრიორიტეტებს შორისაა მეხორბლეობის განვითარება, რათა ქვეყანამ თვითუზრუნველყოფის მაღალ დონეს მიაღწიოს და მაქსიმალურად გაუმჯობესდეს როგორც მოსავლიანობა, ასევე ხორბლის ხარისხი. საქართველოს რეალურად აქვს რესურსი, ხორბლის თვითუზრუნველყოფის მაჩვენებელი 50%-მდე გაზარდოს, რაც ქვეყანას გარე რისკების განდაიცავს.

გლობალურ ბაზრებზე საწვავი მკვეთრად იაფდება. მიუხედავად იმისა, რომ ბოლო დრომდე ანალიტიკოსები საწვავის მასშტაბურ გაძვირებას პროგნოზირებდნენ, სიტუაცია მოულოდნელად შეიცვალა. ამ დროისთვის 1 ბარელი "ბრენტის" ტიპის ნავთობის ფასი 97 დოლარია, ხოლო ამერიკული ნავთობის ღირებულება 93 დოლარამდე ჩამოვიდა. ამგვარ ვარდნას, ძირითადად, გლობალურ ეკონომიკაში რეცესიული პროცესების დაწყებას უკავშირებენ,  რა პირობებშიც ომის გამო მსოფლიოს წამყვანი ქვეყნები აღმოჩნდნენ.

თურქეთში ადგილობრივი ბაზრისთვის განკუთვნილი მედიკამენტების ფასი იზრდება. ასეთია მეზობელი ქვეყნის პრეზიდენტის გადაწყვეტილება, რომელიც გავლენას საქართველოზეც მოახდენს და ქვეყანაში თურქეთიდან შემოტანილ მედიცამენტს გააძვირებს. წინასწარი ინფორმაციით, მატება დაახლოებით 30%-ის ფარგლებში იქნება, თუმცა თურქული მედიკამენტები ევროპულთან შედარებით მაინც იაფი ეღირება.

საქართველოს საბანკო სექტორისთვის ახალი რეგულაციების ამოქმედება იგეგმება. ქვეყნის ცენტრალურმა ბანკმა ორი მოსალოდნელი ცვლილება მიმდინარე წლის მარტში წარადგინა, რაც სავალუტო დაკრედიტების ზღვრის აწევასა და სარეზერვო მოთხოვნის ზრდას ითვალისწინებს. რას მოიტანს და რას შეცვლის საბანკო სფეროში ცვლილებების შეტანა?