ამიერიდან „ოცნება" სალომე ზურაბიშვილს მხოლოდ სახელით და გვარით მოიხსენიებს და არა პრეზიდენტად. მმართველ პარტიაში მიზეზად იმას ასახელებენ, რომ ზურაბიშვილის საჯარო განცხადებებზე, რომელიც პრეზიდენტის სახელით აკეთებს, საქართველოს მეგობრებთან და პარტნიორებთან „ბოდიშების მოხდა უწევთ". მაგალითად მოჰყავთ ჩინეთის პრეზიდენტ სი ძინ პინის გასამართლებასთან დაკავშირებული ზურაბიშვილის განცხადება, რომლის გამო, პრემიერ ირაკლი ღარიბაშვილს თბილისში ჩინეთის ელჩ ჭოუ ციენთან შეხვედრისას განმარტების გაკეთება მოუწია. სამშაბათს კი პრეზიდენტის ადმინისტრაციამ განაცხადა, რომ სალომე ზურაბიშვილის ეს განცხადება მხოლოდ რუსეთის პრეზიდენტს შეეხებოდა.

რუსეთის სამთავრობო მედია თავდაცვის სამინისტროზე დაყრდნობით იუწყება, რომ მათმა დანაყოფმა დონეცკის ოლქში უკრაინის მხარეს მებრძოლი ორი ქართველი სამხედრო ტყვედ აიყვანეს. გავრცელდა მათი დაკითხვის ჩანაწერიც. ქართველი ანალიტიკოსები მიჩნევენ, რომ ეს ფსიქოლოგიური ომის ნაწილია, რომელიც საქართველოს მოქალაქეებზეცაა გათვლილი.

მმართველ პარტიაში ეჭვობენ, რომ პრეზიდენტი სალომე ზურაბიშვილი პატიმრობაშ მყოფ ექსპრეზიდენტ მიხეილ სააკაშვილს შეიწყალებს. როგორც „ოცნებაში" აცხადებენ, ამაზე მინიშნება პრეზიდენტის ძმამ გააკეთა. ანალიტიკოსთა მოსაზრება ამასთან დაკავშირებით არაერთგვაროვანია. ნაწილის აზრით, პრეზიდენტმა შესაძლოა ეს გადაწყვეტილება მართლაც მიიღოს, რითაც „ოცნებას" სერიოზულ თავსატეხს გაუჩენს. მეორე ნაწილი კი ფიქრობს, რომ ზურაბიშვილი სააკაშვილის შეწყალებასთან დაკავშირებით თავისი ცნობილი განცხადების - „არა და არასდროს" - ერთულია და უბრალოდ, „ოცნება" კიდევ ერთხელ ცდილობს მის დისკრედიტირებას.

მმართველმა პარტიამ საარჩევნო ბარიერის შესაძლო დაწევაზე საუბარი ფაქტიურად დასრულებულად გამოაცხადა. პარლამენტის თავმჯდომარე შალვა პაპუაშვილის თქმით, „5% ადეკვატური ბარიერია" და ბარიერის დაწევაზე ოპოზიციის „მათხოვრობა" შეუსაბამოა. ანალიტიკოსები მიიჩნევენ, რომ მომავალი საპარლამენტო არჩევნების წინ ეს წვრილ პარტიებს გაერთიანებისაკენ უბიძგებს, თუმცა, მათივე შეფასებით, გადაჭრით არც იმის თქმა შეიძლება, რომ ბარიერთან დაკავშირებით „ოცნების" გადაწყვეტილება საბოლოოა.

მმართველი პარტია ამბობს, რომ კანდიდატის სტატუსზე ევროკომისიის დადებითმა დასკვნამ ოპოზიციას პროტესტის საყრდენი თემა გამოაცალა და რევოლუციური სცენარი ჩაუგდო. მანამდე, სუს-მა გაავრცელა ინფორმაცია, რომ იგეგმება დესტაბილიზაცია და არეულობები ხელისუფლების ძალადობრივი გზით შეცვლის მიზნით. ამასთან კავშირი კი ოპოზიციამ უარყო.

პრეზიდენტ სალომე ზურაბიშვილის მიერ ჩინელ კოლეგაზე გაკეთებული განცხადება „ოცნების" მხრიდან კრიტიკის საფუძველი გახდა, პრემიერ ირაკლი ღარიბაშვილს კი ჩინეთის ელჩთან შეხედრისას განმარტების გაკეთებაც კი მოუწია. იგი შემაშფოთებელს უწოდებს სი ძინ პინის გასამართლებასთან დაკავშირებულ კომენტარს და იმედს გამოთქვამს, რომ საქართველოს პრეზიდენტის პოზიცია პეკინთან იურთიერთობას არ დაძაბავს, რადგან, მისი თქმით, ეს გზავნილი, „ფორმალურადაც კი არ გამოხატავს საქართველოს ხელისუფლების დამოკიდებულებას ჩინეთის სახელმწიფოს და მისი ლიდერის მიმართ".

კანდიდატის სტატუსის მიღების შემდეგ, პოლიტიკურ დისკურსში მთავარი თემა საარჩევნო ბარიერი ხდება, რადგან ყველასთვის ცხადია, რომ ბევრი პარტია, რომელიც აქტიურად არის ჩაბმული პოლიტიკურ პროცესებში 5%-იან ბარიერს ვერ გადალახავს ან ძალიან გაუჭირდება ამის გაკეთება. ცხადია, ამის გამო „ოცნება" მტკიცედ ეწინააღმდეგება ბარიერის დაწევას, რაც ოპოზიციის შეიძლება ითქვას რომ შეჯერებული მოთხოვნაა.

შესაძლოა კეზერაშვილს მიაჩნია, რომ სააკაშვილი პარტიის საქმიანობაში ცუდად ერევა და ამიტომაც გააფრთხილა, რომ შეიძლება დაფინანსება შეწყვიტოს, რაც ფაქტიურად იგრძნობა „პროექტის დახურვის" უკან, შეიძლება ეს სიგნალი იყოს, რომ ენმ ძალიან სერიოზული ფინანსური რესურსების გარეშე რჩება - ამის შესახებ „რეზონანსთან" ანალიტიკოსმა ზაალ ანჯაფრიძემ განაცხადა წერილთან დაკავშირებით, რომელიც, „რუსთავი 2"-ის ინფორმაციით, ყოფილმა თავდავის მინისტრმა დავით კეზერაშვილმა პატიმრობაში მყოფ ექსპრეზიდენტ მიხეილ სააკაშვილს მისწერა.

საქართველოსათვის ევროკავშირის კანდიდიდატის სტატუსის მინიჭების შესახებ ევროკომისიის რეკომენდაციის გამოქვეყნების შემდეგ, საქართველის პრემიერ-მინისტმა ირაკლი ღარიბაშვილმა „პარიზის მშვიდობის ფორუმში" მიიღო მონაწილეობა, სადაც ქვეყანაში მშვიდობის შენარჩუნების საქმეში მთავრობის მიღწევების თაობაზე ისაუბრა. 

საქართველოს კანდიდატის სტატუსზე ევროკომისიის გადაწყვეტილების მერე, გარკვეული თვალსაზრისით მიძინებული შიდა პოლიტიკური პროცესები თანდათან აქტიურდება. პოლიტიკური პარტიები უკვე ღიად იწყენებ რებრენდინგს, ასევე კეთდება მინიშნებები ახალი პოლიტიკური ძალების გაჩენაზე. ანალიტიკოსი რამაზ საყვარელიძე „რეზონანსთან" აცხადებს, რომ წინასაარჩევნო კამპანიის დაწყება ჯერ ადრეა, თუმცა ტენდენცია კარგია და შესაძლოა გადაჯგუფებები და ალიანსები კიდევაც ვიხილოთ.

„ნაციონალურ მოძრაობაში" არსებული მწვავე კრიზისის მოგვარება პრექტიკულად შეუძლებელია და ოპტიმალური გამოსავალი პარტიის გაყოფა იქნება. ამის შესახებ „რეზონანსთან" ანალიტიკოსი ვახტანგ ძაბირაძე საუბრობს, რომელიც მიიჩნევს, რომ პარტიას ერთიანობას ვერც მიხეილ სააკაშვილის მიერ შეთავაზებული ერთობლივი დეკლარაცია გადაარჩენს და ვერც ნიკა მელიას იდეა ნდობის უფლებამოსილი საბჭოს შექმნის შესახებ.

8 ნოემბერს ევროკომისიამ საქართველოსათვის კანდიდატის სტატუსის მინიჭების რეკომენდაცია გასცა. რა შეიცვალა ამით ოპოზიციისათვის და უნდა ველოდოთ თუ არა მათგან პოლიტიკური ბრძოლის სტრატეგიის შეცლას? ევროკომისიის დასკვნის გამოქვეყნებამდე ანალიტიკოსთა დიდი უმრავლესობა შეცდომად მიიჩნევდა ოპოზიციის სტრატეგიას, რომელიც ხელისუფლების პრორუსულობაზე იყო დამყარებული. მათი შეფასებით, კანდიდატის სტატუსის საკითხის დადებითად გადაწყვეტის შემთხვევაში ეს სტრატეგიული ხაზი ჩამოიშლებოდა და ოპოზიცია რთულ ვითარებაში აღმოჩნდებოდა.