ფინანსთა სამინისტროს შემოსავლების სამსახურმა 2023 წლის ბიუჯეტის შესრულების 10 თვის ანგარიში გამოაქვეყნა. დოკუმენტიდან ირკვევა, რომ ქალაქ თბილისის ტერიტორიაზე საზოგადოებრივ ტრანსპორტში უბილეთოდ მგზავრობის გამო დაწერილი ჯარიმების რაოდენობა წინა წელთან შედარებით გაორმაგებულია.

ანგარიშის მიხედვით, 2023 წლის 10 თვეში მუნიციპალიტეტმა უბილეთო მგზავრობიდან სულ 3,087,325 ლარის შემოსავალი მიიღო, რაც წინა წელთან შედარებით 85%-ით მეტია.

უბილეთო მგზავრობისთვის ჯარიმა 20 ლარს შეადგენს, შესაბამისად ჯარიმების შესრულება ნიშნავს, რომ თბილისის სატრანსპორტო კომპანიის მუნიციპალურმა კონტროლიორებმა 154,000-მდე ჯარიმა დაწერეს.

თბილისის სატრანსპორტო კომპანიის თანახმად, ავტობუსებით ყოველდღიურად 353 ათასი ადამიანი გადაადგილდება, შესაბამისად 10 თვეში დაწერილი ჯარიმების რაოდენობა არის ერთ დღეში ავტობუსის მომხმარებელთა რაოდენობის დაახლოებით 40%.