პარლამენტის სხდომათა დარბაზში ხმაური იყო. დეპუტატებს შორის სიტყვიერი დაპირისპირება პაატა მანჯგალაძის განცხადებას მოჰყვა, რომელმაც სიტყვით გამოსვლისას თქვა, რომ საქართველოს ხელისუფლება ქვეყანაში ძალადობას ახალისებს.
„თქვენ ატერორებთ საქართველოს მოსახლეობას, ვითომ დიდი მშვიდობისმყოფელები ხართ და თქვენ მოუტანეთ ქვეყანას მშვიდობა - სანერვიულო გაქვთ თქვენ, ბოდიში თქვენ გაქვთ მოსახდელი, რომ ქვეყანას ისტორიული შანსი აქვს კანდიდატის სტატუსის მისაღებად და ამას აკარგვინებთ.
თქვენ ახლა ტაშს უკრავთ და ახალისებთ ძალადობას, იმ ძალადობას, რომელსაც ვხედავთ ბოლო დღეებში. ზურა ჯაფარიძეს, სტუდენტებს, მიშა მშვილდაძეს და ლევან ბერძენიშვილს მიუვარდნენ. თქვენ ახალისებთ ამ ქმედებებით პოლარიზებას, თქვენ ახალისებთ ამ ყველაფერს, საღლიცინოდ საქმე არ გვაქვს. ამასთან ერთად, ატერორებთ საქართველოს მოსახლეობას ვითომ, დიდი მშვიდობისმყოფელები ხართ და თქვენ მოუტანეთ ქვეყანას მშვიდობა. ქვეყანას მშვიდობა მოუტანა უკრაინელების თავდადებულმა ბრძოლამ, მათ შორის, იმ ქართველი ბიჭების, რომლებიც იქ იბრძვიან. პუტინმა ღიად გამოაცხადა, რომ საბჭოთა იმპერიის აღდგენა იყო ამოცანა, მაგრამ კიევთან წაიმტვრია კისერი. კიევი, რომ დაცემულიყო და არ ყოფილიყო წინააღმდეგობა, თქვენ რას აპირებდით? სერგო ორჯონიკიძესავით უომრად შემოუძღვებოდით საქართველოს? როგორ იცილებდით რუსეთთან ომს, მაინტერესებს. მაინტერესებს, როგორ იცილებდა რუსეთთან ომს ღარიბაშვილი, როდესაც პუტინმა პირდაპირ გამოაცხადა, რომ საბჭოთა ბოროტების იმპერიის აღდგენა იყო ამოცანა, წითელი დროშით მიადგნენ კიევს. რატომ ატერორებთ მოსახლეობას? რატომ უწყობთ ხელს ძალადობას?", - ასე მიმართ პაატა მანჯგალაძემ პარლამენტში პრემიერ-მინისტრს.
პაატა მანჯაგალაძესთან ერთად, ინციდენტში მონაწილეობდნენ სოზარ სუბარი, ვიქტორ ჯაფარიძე, მიხეილ ყაველაშვილი, ალუდა ღუდუშაური და ირაკლი ზარქუა.
„ქართული ოცნების" დეპუტატმა, ირაკლი ზარქუამ მანჯგალაძეს მიმართა, რომ ღირსებასა და კაცობაზე ნუ საუბრობს.
„ვაშაძემ საკუთარი ოჯახის წევრი სხვაგან გადაიყვანა და რუსებს მიაქირავა {ადგილი} და შენ მელაპარაკები ღირებულებასა და კაცობაზე?!", - აღნიშნა ზარქუამ.
ამასთანავე, „ქართული ოცნების" კიდევ ერთმა დეპუტატმა, ალუდა ღუდუშაურმა, პაატა მანჯგალაძეს „ფარჩაკი" უწოდა და შემდეგი სიტყვებით მიმართა: „ტურა ეს, ტურა ხარ-მეთქი...ფარჩაკო, შენ!".