ხუთშაბათს, 25 მაისს რუსეთმა და ბელორუსმა ხელი მოაწერეს შეთანხმებას, მოსკოვის ტაქტიკური ბირთვული იარაღის მისი მოკავშირის ბელარუსის ტერიტორიაზე განლაგებაზე, თუმცა იარაღზე კონტროლს ისევ კრემლი ინარჩუნებს. ტაქტიკური ბირთვული იარაღის განლაგების გეგმის გადაწყვეტილება, როგორც ევროკავშირში, ასევე ამერიკის შეერთებულ შტატებში დაგმეს. ანალიტიკოსები „რეზონანსთან" აცხადებენ რომ რუსეთი ამ ქმედებას ახორციელებს მხოლოდ ნატოსა და უკრაინის დასაშანტაჟებლად. ის არღვევს იარაღის გაუვრცელებლობის შესახებ 1994 წლის 5 დეკემბრის ბუდაპეშტის მემორანდუმს, რომელიც ბელორუსის ტერიტორიიდან ბირთვული იარაღის გაყვანას და ბელარუსის უსაფრთხოების გარანტიებს ითვალისწინებს.

რუსეთმა უკრაიანა მასირებულად ისევ დაბომბა, კიევზე შთევა თითქმის სამ საათს გაგრძელდა, რაც შეეხება უშუალოდ ფრონტს, აქ ჯერჯერობით მნიშვნელოვანი ცვლილებები არაა, თუმცა უკრაინის ხელისუფლება ამბობს, რომ კონტრშეტევა დაწყებულია და უკვე რამდენიმე დღეა გრძელდება.

კერძო სამხედრო კომპანია „ვაგნერის" დამფუძნებელი ევგენი პრიგოჟინი აცხადებს, რომ ბახმუტიდან ძალების გაყვანას გეგმავს და პოზიციების რუსეთის არმიისთვის გადაცემას აპირებს. სამხედრო ექსპერტები „რეზონანსთან" პრიგოჟინის ამ გადაწყვეტილებას აფასებენ, როგორც ახალი ძალების მოკრებისა და საკუთარი ინტერესებიდან გამომდინარე საკუთარი სამხედრო პოტენციალის შენარჩუნებას.

კვამლი ყირიმის (ქერჩის) ხიდის მიმდებარე ტერიტორიაზე 24 მაისს, დილით გამოჩნდა, რუსები ამტკიცებენ, რომ ეს წვრთნების გამო იყო. სამხედრო ექსპერტი ვახტანგ მაისაია, „რეზონანსთან" აცხადებს, რომ მოსალონელია უკრაინის მხრიდან მორიგი თავდასხმა ხიდზე, თუმცა, როდის, ეს უცნობია და კატეგორიულად გამორიცხავს წვრთნების ჩატარებას.

რუსეთი იზიარებს მოსაზრებას, რომ უკრაინის კონფლიქტი არ უნდა გაიყინოს და უკრაინაში თავისი მიზნების განხორციელებას სამხედრო ოპერაციებით აგრძელებს. დასავლელი ლიდერებიც მოუწოდებენ კიევს, რომ უკრაინამ არ უნდა დათმოს თავისი სახელმწიფო სუვერენიტეტი. სამხედრო-ანალიტიკური ჟურნალი „არსენალის" მთავარი რედაქტორი ირაკლი ალადაშვილი „რეზონანსთან" ამბობს, რომ უკრაინამ არ უნდა დაუშვას ომის გაყინვა საკუთარი ტერიტორიების დაკარგვის სანაცვლოდ.

უკრაინის საზღვართან მდებარე რუსეთის ბელგოროდის ოლქი ორი დღეა მსოფლიოს ყურადღების ცენტრშია. უკრაინის მხრიდან 22 მაისს მოულოდნელად დაწყებულმა სახმელეთო რეიდმა ბახმუტის ამბები გადაფარა. უკრაინის სარდლობა ამ მოვლენებთან კავშირს უარყოფს და აცხადებს, რომ თავდასხმა რუსმა მოხალისეებმა განახორციელეს, რომლებიც პუტინის რეჟიმს ებრძვიან. მოსკოვში კი კიევს ადანაშაულებენ და აცხადებენ, რომ შემოჭრილი დივერსანტები გაანადგურეს და განდევნეს.

სომხეთის პრემიერ-მინისტრი ნიკოლ ფაშინიანი დასაშვებად მიიჩნევს აზერბაიჯანის ტერიტორიული მლიანობის აღიარებას ყარაბაღის ჩათვლით. ორშაბათს ერევანში გამართულ პრესკონფერენციაზე გაკეთებულმა ამ განცხადებამ ოპოზიციაში, თავად ყარაბაღელ სომხებსა და სომხური ეკლესიის უმაღლეს იერარქებს შორისაც კი უკიდურესი აღშფოთება გამოიწვია. ანალიტიკოსი პაატა ზაქარეიშვილი „რეზონანსთან" აცხადებს, რომ ფაშინიანი რეალისტი პოლიტიკოსია, ხოლო მისი მოქმედებები არ გამოიწვევს სომხეთში შეუქცევად არეულობებს.

დიდი ბრიტანეთის თავდაცვის სამინისტრომ 22 მაისს გამოაქვეყნა ანგარიში, რომლის თანახმად, რუსეთი სავარაუდოდ ახალ „ელიტარულ" საავიაციო ჯგუფს ქმნის, უკრაინაში ოპერაციებისთვის.

კვირას 21 მაისს, აშშ-ის პრეზიდენტმა ჯო ბაიდენმა უკრაინის პრეზიდენტ ვოლოდიმირ ზელენსკისთან შეხვედრის შემდეგ, გამოაცხადა ახალი სამხედრო დახმარების 375 მილიონი დოლარის (347 მილიონი ევრო) პაკეტი უკრაინისთვის და თქვა რომ ვაშინგტონი გააგრძელებს ქვეყნის მხარდაჭერას რუსეთის უკრაინაში არალეგიტიმური შეჭრის წინააღმდეგ.

რუსები ბახმუტის აღებას ზეიმობენ. „ვაგნერის" ხელმძღვანელის ევგენი პრიგოჟინის განცხადება ქალაქზე სრული კონტროლის დამყარების შესახებ ოფიციალურად დაადასტურა რუსეთის თავდაცვის სამინისტრომ, ხოლო პრეზიდენტმა ვალდიმირ პუტინმა „ვაგნერელებსა" და არმიას ბახმუტის აღება მიულოცა. თუმცა, უკრაინა ქალაქის დაცემას უარყოფს და აცხადებს, რომ ბრძოლა კვლავ გრძელდება. ამას გარდა, რუსებს ზეიმისთვის კიდევ ერთი საბაბი აქვთ - კვირაზე მეტია მედიაში არ გამოჩენილა უკრაინის შეიარაღებული ძალების ხელმძღვანელი ვალერი ჟალუზნი და რუსული მედია საკუთარ წყაროებზე დაყრდნობით ამტკიცებს, რომ ერთ-ერთი დაბომბვისას ის ან მძიმედ დაიჭრა, ან დაიღუპა. კიევში ამასაც უარყოფენ.

თურქეთში საპრეზიდენტო არჩევნების მეორე ტურამდე ერთი კვირა რჩება, რომელშიც მოქმედი პრეზიდენტი რეჯეფ ტაიპ ერდოღანი და ოპოზიციის ერთიანი კანდიდატი ქემალ ქილიჩდაროღლუ დაუპირისპირდებიან ერთმანეთს. პირველი ტურის შედეგებიდან გამომდინარე, ანალიტიკოსთა უმრავლესობა ერდოგანის გამარჯვებას პროგნოზირებს, თუმცა, ძნელი სათქმელია როგორ განაწილდება არჩევნებიდან გამოთიშლი სხვა 2 კანდიდატის ხმები.

ჰიროსიმაში „დიდი შვიდეულის" ლიდერები შეთანხმდნენ რუსეთის წინააღმდეგ სანქციების გამკაცრებაზე. ანალიტიკოსები „რეზონანსთან" სანქციების მოსალოდნელ შედეგებზე საუბრობენ, თუმცა ვარაუდობენ, რომ ის არ იქნება იმდენად ეფექტური.