უძრავი ქონების ბაზარზე ფასები კვლავ რყევას განიცდის, მაგრამ ამჯერად გაიაფების კუთხით. საიჯარო ტარიფის კლების ტენდენცია ისევ თვალში საცემია. დარგის სპეციალისტები ერთხმად აცხადებენ, რომ უძრავ ქონებაზე მოთხოვნამ საგრძნობლად იკლო, ხოლო მიწოდება მზარდია. ამიტომაც, შესაძლოა, ქირის ფასი კვლავ ძველ ნიშნულს დაუახლოვდეს.

გაიაფება განსაკუთრებით საშუალო კლასის ბინებს შეეხო. პრემიუმ ბინების ღირებულება კი ადრეც და ახლაც კვლავ ძვირია, თუმცა პროცენტულად კლება ამ სეგმენტშიც შეინიშნება. როგორც  ბროკერები ამბობენ, ბაზარზე მოთხოვნა შემცირდა, ხოლო მიწოდება გაიზარდა.

ამას თან ერთვის ქვეყანაში შექმნილი არამდგრადი ეკონომიკური და სოციალური სურათიც. მიგრანტთა რაოდენობა დღითი დღე მცირდება, სოციალური ფონი კი არასახარბიელოა, რაც საერთო ჯამში სწორედ ამ სეგმენტზე აისახება. ამიტომაც, ბაზარზე უძრავი სექტორის გაქირავების კუთხით შექმნილი სურათი არასახარბიელოა. არსებული მდგომარეობა უძრავი ქონების აგენტებისთვის დამაიმედებელ პროგნოზს არ იძლევა.

მიმდინარე ტენდენციებზე ამახვილებს ყურადღებას „თიბისი კაპიტალის“ უფროსი ასოცირებული მკვლევარი სალომე დეისაძე  და აღნიშნავს, რომ მიმდინარე წელს, მოსალოდნელია უძრავი ქონების ქირის ფასის კლების ტენდენციის კვლავ შენარჩუნება. შემცირება ჯერ კიდევ 2023 წლის მაისიდან დაიწყო, რაც მიგრანტების ეფექტის მოხსნით იყო განპირობებული.

„მიგრანტების გამოისობით სწორედ ქირაზე იყო პროცენტულად გაზრდილი ფასები, რაც მომატებული მოთხოვნით იყო განპირობებული. უკვე 2023 წლის მაისიდან უკვე ქირაზე კლება დაიწყო, რაც ისედაც მოსალოდნელი იყო. ახლა მიგრანტების ეფექტი მოხსნილია და ველოდებით ფასის კვლავ შემცირდებას. სავარაუდოა, რომ ტენდენცია 2024 წელსაც შენარჩუნდება.

თებერვლის მონაცემებს რომ გადავხედოთ, ქირის ტარიფმა 1 კვ/მ-ზე  12 დოლარი შეადგინა, რაც წინა წლის შესაბამის მაჩვენებელთან 5%-იანი კლების ტოლფასი. ველოდებით, რომ წლის ბოლომდე კლების ტენდენცია გაგრძელდება და 2024 წელს 2023 წლის საშუალო მაჩვენებელთან შედარებით, კლება დაახლოებით 10-12%-ის ფარგლებში იქნება,“ - განაცხადა მკვლევარმა.

მისი ინფორმაციით, მიუხედავად თანდათანობით გაიაფებისა, უძრავი ქონება საინვესტიციო თვალსაზრისით კვლავ დარჩება მიმზიდველ აქტივად. მკვლევრების ვარაუდით, წელს იჯარიდან ამონაგები დაახლოებით, 10,5%-ის ფარგლებში იქნება.

მიგრანტებს, რომ ქირის ფასებზე მნიშვნელოვანი გავლენა ჰქონდათ, ამაზე ცალსახად საუბრობენ უძრავი ქონების აგენტებიც. ბროკერმა ნოდარ ნანოშვილმა ,,რეზონანსთან" აღნიშნა, რომ ბინის მეპატრონეებს ქირაზე ფასების დაკლება ძალაუნებურად უწევთ, რაც ნაკლებმა მოთხოვნამ განაპირობა.

,,უძრავი ქონების ფასებზე მიგრაცია დიდი გავლენას ახდენს. როდესაც დამქირავებელი ხედავს, რომ ბაზარზე ჭარბი რაოდენობით შემოდის უცხო ქვეყნის მოქალაქე, ძალაუნებურად ცდილობს გააძვიროს. ამ ეტაპზე, არამდგრადი ვითარებაა. ვისაც სურს ფართის დროული გაქირავება, ის ცდილობს ხელსაყრელ ფასად შესთავაზოს მომხმარებელს.

საერთო ჯამში, ბაზარზე სურათი მრავალფეროვანია. ბევრია, როგორც დაბალბიუჯეტური, ასევე პრემიუმ კლასის ბინებიც. მოთხოვნა კი ადრინდელთან შედარებით, დაბალია. საშუალო დონის 2-ოთახიანი ბინის ფასი 700-800-ლარამდე მერყეობს. არის ისეთი დეტალებიც, რამაც შესაძლოა, ბინას ფასიც დაუგდოს. რაც არ უნდა იყოს, ფაქტია, მიგრანტთა შემოსევამ სერიოზული გავლენა იქონია. ახლა ბაზარი სტაბილურობისკენ მიდის.

ახლა ბინები საკმაოდ ბევრია, მაგრამ მოთხოვნა ნაკლებია. ფასზე მოქმედებს ნებისმიერი დეტალი - მომხმარებლის აქტიურობა, ლოკაცია და ა.შ. საერთო სურათი კი, მაინც კლებისკენაა", - განაცხადა ნონიაშვილმა.

ბაზარზე არსებულ არამდგრად მდგომარეობაზე საუბრობს უძრავი ქონების სააგენტო ,,საუკეთესო ბინების" დამფუძნებელი ლალი გელაშვილიც. ის ადასტურებს, რომ მიგრანტთა გადინებამ ქირის გაიაფება გამოიწვია და ტენდენცია ახლაც გრძელდება. ფასი ნელ-ნელა ძველ ნიშნულს უბრუნდება.

,,ჩემი სააგენტოს მუშაობიდან გამომდინარე, დანამდვილებით შემიძლია განვაცხადო, რომ დაქირავებაზე ფასი მკვეთრად ეცემა. ამ ეტაპისთვის, მოთხოვნა ნაკლებია, ვიდრე მიწოდება. როდემდე გაგრძელდება ეს ტენდენცია, ძნელი სათქმელია. ამის ზუსტი პროგნიზირება შეუძლებელია.

საიჯარო გადასახადი ხელოვნურად გაიზარდა. ბუმმა კარგა ხანია გადაიარა. ქვეყნიდან გავიდნენ მიგრანტები და სიტუაციაც ჩაცხრა. დამქირავებელი ნაკლებადააა. მოთხოვნა თანაბრადააა, როგორც პრემიუმ კლასზე, ასევე დაბალბიუჯეტურ ბინებზეც. ადრე თუ ყოველდღიურად ვაქირავებდით ბინებს, ახლა კვირაში ერთი ან ორი ბინის გაქირავებაც კი გვიჭირს. მფლობელებიც იძულებული არიან ფასები დაწიონ. მაგალითისთვის, თუ ადრე, საშუალო დონის ერთოთახიან ბინას 800ლარად ვაქირავებდით, ახლა ეს 600 ლარამდე დავიდა“, - განაცხადა გელაშვილმა.

ბოლო პერიოდში, უძრავ ქონებეზე ფასის კლების ტენდენცია ყველა მიმართულებით გამოიკვეთა. ეს ეხება როგორც საშუალო ბიუჯეტურ, ასევე პრემიუმკლასის ბინებსაც, ოღონდ განსხვავებული პროცენტული მაჩვენებლით. ,,ჯეორეალითის" დამფუძნებელი მაია გამზარდია ადასტურებს, რომ მოთხოვნა ქირაზე შემცირებულია და ტენდენცია კვლავ კლებისკენაა.

"ეს ეხება, როგორც პრემიუმ კლასის ასევე საშუალო სეგმენტის ბინებს. ვარდნა ყველა მიმართულებითაა, მაგრამ ზოგან 5%-იანია, ზოგან 10%-იანი და ა.შ. მოთხოვნა ძალიან შემცირებულია.

რაც შეეხება გაყიდვის მაჩვენებელს, აქაც ნათელია, რომ კლების ტენდენციაა. შემცირებულია ფასები ნებისმიერ ბინებზე. განსაკუთრებით რთულია მეორადი ბინების გაყიდვა. ახალაშენებული და მიმდინარე კარკასები შედარებით მაღალ ფასს ინარჩუნებენ. მოგეხსენებათ, მშენებლები  განვადებით ყიდიან, გადასახადი კი გრძელვადიანია. ეს კი ხელს უწყობს ასე თუ ისე ფასის შენარჩუნებას, მაგრამ ღირებულება იქაც შემცირებულია.

ცალსახაა, რეალიზაციის კლება, მოთხოვნის შემცირებამ გამოიწვია. ზოგადი ფორმულირებით, მყიდველი აღარ აქტიურობს ამიტომ, ფასიც კლებას განიცდის", - განაცხადა ,,რეზონანსთან" მაია გამზარდიამ.

როდემდე გაგრძელდება ფასების ვარდნის ტენდენცია, ამაზე საუბარი უჭირს ,,ჯეორეალთის" დამფუძნებელს, თუმცა საუბრისას ცალსახად ამბობს, რომ ქვეყანაში არსებული ნებისმიერი არასტაბილური სურათი და არამდგრადი ეკონომიკური მდგომარეობა, პირველ რიგში, სწორედ, უძრავ ქონებაზე აისახება.