მსახიობი და სპორტსმენი სოსო ჯაჭვლიანი, რომელიც მძიმე სენს ებრძვის, რამდენიმე კვირაა თურქეთში იმყოფება და მკურნალობის კურსს გადის. როგორია სოსოს ამჟამინდელი მდგომარეობა, როგორ დაეხმარა საზოგადოება, მეგობრები და ოპონენტებიც კი ფინანსურად - ამ საკითხებზე "ამბებს" მსახიობის მეუღლეს ესაუბრა:
„ისე გახდა სოსო 62 წლის, რომ არასოდეს არ ჰქონია არანაირი დაავადება, ერთადერთი სპორტსმენებს რაც ახასიათებს, მენისკები, მყესის დაჭიმვა. სიცხე და გრიპიც კი არ ჰქონია, ყოველთვის ძალიან ჯანსაღი ცხოვრებით ცხოვრობდა. სიგარეტი არასოდეს მოუწევია და ღვინოს თავად წურავს და თავის დაბადების დღეზე და ახალ წელს თუ დალევდა. ესეც ძალიან შოკი აღმოჩნდა ჩვენთვის. როგორც ჩანს, ეს დაავადება შეიძლება ნებისმიერს დაემართოს.
ჩვენ უკვე დიდი ხანია ამ დაავადებას ვებრძვით და ყველაფერი ხარჯებია, ავადმყოფს ბევრი რამე სჭირდება. ოჯახს აღარ გვქონდა რესურსი, რომ საზღვარგარეთ გაგვეყვანა. სოსო გვერდში დაუდგნენ მეგობრები, ძალიან მინდა ყველას მადლობა ვუთხრა. ასეთ დროს დაბნეული ხარ, ვის მიმართო არ იცი. ვერც მიმართავ ვერავის, ყველას თავისი პრობლემა და ოჯახი აქვს, ასეთი იოლი არ არის, ვინმეს დახმარება სთხოვო. მე სოსოს მეგობრების, ახლობლების, ნათესავების, ძალიან მადლობელი ვარ ყველასი. ბოლო დროს ტიკ ტოკზე გავრცელდა პატარა ვიდეო, დავით გიორგობიანია ის პიროვნება, რომელმაც ჩაწერა ვიდეო და სოსოს ანგარიშის ნომერი მიუთითა, ხალხს სთხოვა, თითო ლარით დაეხმარეთო. ორი დღე ისეთ მდგომარეობაში ვიყავი, რომ მეტირებოდა, ერთ ლარსაც კი როგორი დატვირთვა აქვს საქართველოში ხომ ხვდებით, არ იშოვება ასე იოლად ფული. არ არის მარტივი, რომ ვიღაცამ ფული გადმოგირიცხოს. იმხელა დახმარება აღმოგვიჩინა ხალხმა, შეიძლება ეს დიდი თანხა არ იყოს, მაგრამ მარტო ამაზე ხომ არ არის, მორალური მხარში დგომა უფრო ფასეული აღმოჩნდა ჩვენთვის. არ ვიცი, საიდან არ გვირეკავენ, ავსტრიიდან, გერმანიიდან, საფრანგეთიდან, ძალიან დიდ სიყვარულს იჩენენ. ეს არის ძალიან მნიშვნელოვანი, ნებისმიერ თანხაზე მნიშვნელოვანი. ყველას მადლობა, სამეგობროზე უკვე სიტყვები აღარ მყოფნის.
ისეთმა ხალხმა ჩაურიცხა ანგარიშზე თანხა, რომლებთანაც პოლიტიკაში ყოფნის დროს ჰქონდა დაპირისპირება, საკმაოდ მწვავე დაპირისპირება. არ მინდა, პარტიებად გამოვყო, მაგრამ რომ ვნახეთ ანგარიშზე მოსული ამ პიროვნებებისგან ჩარიცხული თანხა, შვილიშვილს გეფიცებით, მე და სოსო ორივე ვტიროდით. წარმოიდგინეთ, რამხელა კაცობაა, რომ ასეთი ნაბიჯი გადადგეს, თორემ ვინ აძალებდათ, ჩარიცხავდა თუ არა, ვინ გაიგებდა. გეფიცებით ჩემს შვილებს და შვილიშვილებს, ცრემლებამდე შემძრა ამ ამბავმა.
ემიგრანტმა ქალებმა იტალიიდან, რომლებიც მოხუცებს უვლიან და რამხელა მძიმე შრომაში არიან, მათაც ჩაგვირიცხეს ფული, რა უნდა იყოს ამაზე ძვირფასი, ჩვენ მათთვის ვინ ვართ, აბსოლუტურად უცხო ხალხი ვართ. მადლობის მეტი არაფერი მეთქმის.
ambebi.ge