ექსპრემიერ გიორგი გახარიას პარტიამ „საქართველოსთვის" საბოლოოდ გადაწყვიტა, რომ შოვის ტრაგედიასთან დაკავშირებით საპარლამენტო საგამოძიებო კომისიის შექმნას მხარს არ დაუჭერს. ანალიტიკოსები მათ არგუმენტებს არადამაჯერებლად მიიჩნევენ და ფიქრობენ, რომ კომისიის შექმნა ამ საკითხის კიდევ უფრო მეტად პოლიტიზირებას არ გამოიწვევს. გახარიას ეს გადაწყვეტილება კი, შესაძლოა, მის მიერ არჩეულ სტრატეგიას უკავშირდებოდეს - იგი ემიჯნება „ქართულ ოცნებსაც" და „ნაციონალურ მოძრაობასაც" და პოზიციონირებს როგორც ყველასგან დამოუკიდებელი პოლიტიკური ძალა.

მმართველი პარტიის თავმჯდომარე ირაკლი კობახიძე კიდევ ერთხელ მოექცა საყოველთაო ყურადღების ცენტრში. საზოგადოების მნიშვნელოვან ნაწილში მკვეთრი უკმაყოფილება გამოიწვია მისმა განცხადებამ, რომ შოვში, სტიქიის დროს გადარჩენილი ერთ-ერთი მოქალაქის, დავით ჯელაძის მიერ მიერ სოციალურ ქსელში გავრცელებულ პოსტში მოყვანილი დეტალები გასარკვევი და გადასამოწმებელია.