სისხლიანი დაპირისპირება თბილიში, სადაც 10-ზე მეტი ადამიანი მონაწილეობდა. ჩხუბის და სროლის ხმა გუშინ გვიან ღამით ნაძალაევის რაიონში მაცხოვრებლებმა გაიგეს. მათი ინფორმაციით, დადიანის ქუჩაზე ორმხივი სროლა იყო, რა დროსაც ჩხუბში მონაწილე რამდენიმე პირი დაიჭრა და ასევე შემთხვევით გამვლელი. არსებული ინფორმაციით, დაპირისპირების მიზეზი წარსულში მომხდარი კონფლიქტი გახდა. ხოლო ე.წ. ქუჩური გარჩევის დროს, სიტუაცია კიდევ უფრო დაიძაბა, რაც სისხლიან ანგარიშსწორებაში გადაიზარდა.   

ადგილობრივები ამბობენ, რომ მათ ხუთიდან ათამდე გასროლის ხმა გაიგეს და ვარაუდობენ, რომ ორმხრივი სროლა იყო. ცნობილია მხოლოდ ის, რომ დაჭრილებიდან ერთმა პირმა საავადმყოფოს საკუთარი ფეხით მიაკითხა და მას ოპერაცია ჩაუტარდა. ხოლო დანარჩენების შესახებ ინფორმაცია არ ვრცელდება. ასევე, ჯერჯერობით პოლიციას არ ჰყავს დაკავებულები და ფაქტზე საგამოძიებო მოქმედებები მიდის.  

„სისხლიანი გარჩევა ცოტნე დადიანის 20 ნომერში ღამის ორ საათზე მოხდა. ერთმანეთს 12-მდე პირი დაუპირისპირდა. როგორც გავიგეთ, ორი ჯგუფი იყო და 10-მდე კაცი 2 კაცს გაუსწორდა. არსებულ დაპირისპირებას წინ წარსულში მომხდარი კონფლიქტი უძღოდა. როგორც გავიგე, ამ 10 პირიდან რამდენიმე არის დაჭრილი და ასევე იმ ორი ადამიანიდან ერთ-ერთი დაჭრეს. ჯერ დანით დაუჭრიათ ერთმანეთი და მერე სროლა დაიწყეს. ჩვეულებრივი განგსტერული გარჩევა იყო, სადაც ორივე მხრიდან ისროდნენ. ერთი ბიჭი იყო დანით ბარძაყის  არეში დაჭრილიო  და დანარჩენს, როგორც ვიცი,  ცეცხლსასროლი იარაღიდან ჰქონდათ ჭრილობები მიღებული. დაიჭრა ასევე, სრულიად შემთხვევით გამვლელი“,-ამბობს ადგილობრივი „რეზონანსთან“.