ჩინეთი ჩვენთვის ერთ-ერთი ახალი ბაზარია, სადაც ჩვენ დავიწყეთ აქტიური მუშაობა, რათა მეტი ჩინელი ტურისტი ჩამოვიყვანოთ საქართველოში, - ამის შესახებ „ქრონიკის" ეთერში ტურიზმის ეროვნული ადმინისტრაციის ხელმძღვანელმა მაია ომიაძემ განაცხადა.
„მაისში გავემგზავრებით შანხაიში, ერთ-ერთ ძალიან დიდ გამოფენაზე, სადაც მათ შორის კერძო სექტორი მიგვყავს იმისთვის, რომ ჩინურ ბიზნესსექტორთან დავაახლოოთ. ჩინეთი ძალიან დიდი ბაზარია, შესაბამისად, საფეხურებრივად, სწორი სტრატეგიით, სწორი აქცენტებით უნდა ვეცადოთ, გავაცნოთ ჩვენი ქვეყანა ჩინელ ტურისტებს. ჩვენ შევხვდით ბერლინში ერთ-ერთ მსხვილ კომპანიას, რომელიც ეხმარება ქართულ ბიზნესს, მზად იყვნენ ჩინელი ტურისტების დასახვედრად. ვფიქრობთ, რომ საქართველოს ცნობადობა ჩინეთში საფეხურებრივად გაიზრდება. ჩინელი ტურისტი მსოფლიოსთვის ერთ-ერთი ყველაზე სასურველია, იმიტომ, რომ საკმაოდ ბევრ ფულს ხარჯავენ და ხანგრძლივი მოგზაურობა ახასიათებთ. მიგვაჩნია, რომ საქართველო ჩინელებისთვის შეიძლება ერთ-ერთ საყვარელ ადგილად გადაიქცეს", - აღნიშნა ომიაძემ.