7 მარტი ისტორიას დარჩება, როგორც ქუჩაში ძალადობით გამოყვანილი საზოგადოების სირცხვილი, - წერს სოციალურ ქსელში მოძრაობა „ხალხის ძალის" წევრი თამარ ჩიბურდანიძე.

მისივე თქმით, 7 მარტის მოვლენებმა გამოაფხიზლა ქართული საზოგადოება და ღიად დაანახა მოსალოდნელი საფრთხე მათი შვილებისთვის.

„2023 წლის მარტის დღეები იყო ღია სანახაობა მსოფლიოსთვის, თუ რა მდგომარეობაშია საუკუნის წინ, კაცობრიობის უკეთესი ყოფისთვის შექმნილი ნამდვილი დემოკრატიული ღირებულებები. დღეს სიტყვის თავისუფლებამ დეზინფორმაციის სახე მიიღო, სიმართლე სიყალბედ იქცა და დემოკრატია ლიბერალურ ფაშიზმად მოგვევლინა.

შარშანდელმა მარტის დღეებმა დაგვანახა ის ყალბი დემოკრატია, რომელიც მძვინვარებს დღეს მსოფლიოში. ზუსტი შეფასება მისცა მამუკა მდინარაძემ, ეს ნამდვილად იყო საუკუნის აფერა. „უცხოური დაფინანსების გამჭვირვალობის შესახებ" ოღონდ კანონი არ მიგვეღო და ისიც კი იკადრეს, რომ FARA-ს საავტორო უფლებები რუსეთს გადაულოცეს. ეშინოდათ, ეშინიათ და მომავალშიც გაჰყვებათ იმის შიში, რომ არ გამოვააშკარაოთ უცხოური დაფინანსებით საქართველოს ეროვნული ღირებულებებისადმი მიყენებული ზარალი და რაც მთავარია, არ გამოაშკარავდეს უცხოური ფული ქართულ პოლიტიკაში.

რუსთაველზე პოლიციელების ცოცხლად დაწვა, მოსწავლეების და პროფესორების ღია ბულინგი, უნივერსიტეტების, არასამთავრობო ორგანიზაციებისა და კონკრეტული პიროვნებების იძულება, გასულიყვნენ ქუჩაში და გაეპროტესტებინათ წაუკითხავი კანონი - ეს ყველაფერი იყო თანამედროვე გლობალისტების რეალური სახე. ეს იყო პროცესი, რომელმაც გამოაფხიზლა ქართული საზოგადოება და ღიად დაანახა მოსალოდნელი საფრთხე მათი შვილებისთვის.

7 მარტი, ისტორიას დარჩება, როგორც ქუჩაში ძალადობით გამოყვანილი საზოგადოების სირცხვილი. მჯერა, ამ პოლიტიკურ ავანტიურას ნეგატიურ „ქეისად" გამოიყენებენ სხვადასხვა ქვეყანაში სპეციალისტები, თუ როგორი არ უნდა იყოს დემოკრატია," - წერს თამარ ჩიბურდანიძე.