ერთი კვირის ვადაში „სტრატეგია აღმაშენებელი" პრეზიდენტს წარვუდგენთ გეგმას, როგორ ვხედავთ ცხრა პუნქტის შესრულებას, - ამის შესახებ „სტრატეგია აღმაშენებლის" ლიდერმა, გიორგი ვაშაძემ სალომე ზურაბიშვილთან შეხვედრის შემდეგ ჟურნალისტებს განუცხადა.
გიორგი ვაშაძის თქმით, ფართო ჯგუფი ჰყავთ, რომელიც თითოეული რეკომენდაციის შესრულებაზე მუშაობს.
„აუცილებელია ცხრა პუნქტის შესრულება. სწორედ ამას ეხება პრეზიდენტის ინიციატივა. ერთი კვირის ვადაში „სტრატეგია აღმაშენებელი" „ნაციონალურ მოძრაობასთან" ერთად, წარვუდგენთ პრეზიდენტს, როგორ ვხედავთ ცხრა პუნქტის შესრულებას. ფართო ჯგუფი გვყავს, რომელიც მუშაობს თითოეული რეკომენდაციის შესრულებაზე. ხალხის გამარჯვების შემდეგ, პირველი ამ ყველაფრის შესრულება იქნება საჭირო, რათა 15 დეკემბრისთვის გახსნას მოლაპარაკებები საქართველომ. პრეზიდენტის ინიციატივა ხელს უწყობს, შეთანხმებული იყოს ფართო სპექტრი, რას ვაკეთებთ ევროინტეგრაციის გზაზე პირველივე დღიდან", - განაცხადა გიორგი ვაშაძემ.
ამასთან, როგორც ვაშაძემ აღნიშნა, სალომე ზურაბიშვილთან შეხვედრაზე მიხეილ სააკაშვილთან დაკავშირებითაც ისაუბრეს.
„ჩვენ დეტალურად ვისაუბრეთ ამ საკითხზე. ღიად ვიტყვი, უფრო კმაყოფილი ვიქნებოდი, კონკრეტული პასუხით გამოვსულიყავი, თუმცა საკმაოდ საინტერესო საუბარი იყო. დანარჩენს დრო გვიჩვენებს. ამ შეხვედრაზე არ ველოდებოდი „კი" თუ „არაზე" საუბარს და არც იყო მიზანი. ნუ ჩავთვლით, რომ ერთი შეხვედრის დროს მყისიერად ყველაფერი უნდა იყოს წარმოჩენილი. ჩემი განწყობაა, რომ საქართველო გახდება ევროკავშირის წევრი და დარწმუნებული ვარ, მიშაც იქნება თავისუფალი", - აღნიშნა გიორგი ვასაძემ.