ელჩებისა და დიპლომატების საქმიანობა არის საერთაშორისო კანონით განსაზღვრული და მათ პატივი უნდა სცენ სხვა ქვეყნის სუვერენიტეტსა და მის საშინაო საქმეებში არ უნდა ჩაერიონ, - ასე შეაფასა საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა დანიურ მედიაში გამოქვეყნებული პუბლიკაცია, სადაც დანიის ელჩმა ბიძინა ივანიშვილი ოლიგარქად მოიხსენია.
„ეს ჩარევა არის ყოვლად დაუსაბუთებელი, ბრალდებები არის პირდაპირ პოლიტიკური, გარკვეული ჯგუფების ნარატივიდან გამომდინარე და ემსახურება ქვეყანაში პოლიტიკური რადიკალიზაციის გაზრდას. საქართველოს, როგორც სუვერენული სახელმწიფოს პატივისცემა უნდა ისწავლოს ყველამ: ჩრდილოეთში, აღმოსავლეთში, დასავლეთსა და სამხრეთშიც", - აღნიშნა ირაკლი ქადაგიშვილმა.
დანიურ მედიაში გამოქვეყნდა პუბლიკაცია, სადაც დანიის ელჩმა ბიძინა ივანიშვილი ოლიგარქად მოიხსენია და აღნიშნა, რომ მან ქონება 90-იან წლებში რუსეთში დააგროვა. ანე ტოფტ სორენსენმა საქართველოში განვითარებულ ბოლოდროინდელ მოვლენებსა და ევროკავშირის წევრობის კანდიდატი ქვეყნის სტატუსის მინიჭებაზეც ისაუბრა.
ამასთან დაკავშირებით დღეს საქართველოში დანიის საელჩომ განცხადება გაავრცელა, რომელშიც ნათქვამია, რომ „დანიური სტატიიდან ამოღებულია ამონარიდი, რომელიც ქართულ დებატებში კონტექსტის გარეშე გამოიყენება". „საელჩოს არ აქვს სურვილი, წვლილი შეიტანოს აღნიშნულში და დამატებითი კომენტარისგან თავს იკავებს", - წერია საელჩოს განცხადებაში.