არალეგიტიმური, არალეგალური და ხალხის ნების გარეშე მიღებული გადაწყვეტილება - ასე აფასებს საქართველოს პრეზიდენტი  მარიონეტული რეჟიმის მიერ რუსეთისთვის ბიჭვინთის აგარაკის შესაძლო გადაცემას. 

ეს ჩვენი მიწებია, რომელიც ჩვენი დასაცავია - თქვა პრეზიდენტმა ზუგდიდში: 

"ეს გადაწყვეტილება, როგორც ყველა სხვა გადაწყვეტილება, რომელიც ეხება აეროპორტს, რომელიც ეხება ოჩამჩირეს, არის არალეგიტიმური, არალეგალური და ხალხის ნების გარეშე მიღებული გადაწყვეტილება. ეს არის ჩვენი მიწები, ჩვენი აეროპორტი, ჩვენი პორტი, ყველასი ერთად და ამიტომ ეს არის ჩვენი დასაცავი. ჩვენი დაცვა არის საერთაშორისო არენაზე, რომ იქ ყოველდღიურად, ყოველთვის გავაპროტესტოთ, რომ ეს არალეგიტიმური ნაბიჯები არ გახდეს რაღაცა დე-ფაქტო ნაბიჯები," - განაცხადა ზურაბიშვილმა.

 ოკუპირებული აფხაზეთის ე.წ. პარლამენტმა რუსეთისთვის ბიჭვინთის აგარაკის გადაცემის საკითხს სავარაუდოდ, 28 დეკემბერს განიხილავს.