რამდენიმე რუსული საინფორმაციო სააგენტოს ცნობით, მახაჩყალის აეროპორტში მომხდარი არეულობის შემდეგ 60 ადამიანი დააკავეს.
სამთავრობო მედია "რია" შინაგან საქმეთა სამინისტროზე დაყრდნობით ავრცელებს ინფორმაციას, რომ დაშავებულია 9 პოლიციელი, მათ შორის ორი საავადმყოფოშია.
იდენტიფიცირებულია 150-ზე მეტი მომიტინგე. სააგენტოს ცნობით, პოლიცია სამძებრო სამუშაოებს ატარებს ინციდენტში მონაწილე სხვა პირების დასადგენად.
დაღესტნის ჯანდაცვის სამინისტროს ცნობით, არეულობისას 20-ზე მეტი ადამიანი დაშავდა, მათგან ათმა მიიღო მსუბუქი დაზიანებები, კიდევ ათი გადაიყვანეს საავადმყოფოებში, ორი უკიდურესად მძიმე მდგომარეობაშია.
29 ოქტომბერს თელ-ავივიდან სამგზავრო თვითმფრინავის დაშვების წინ, მახაჩყალის აეროპორტში ასეულობით ადამიანი შეიკრიბა ანტისემიტურ აქციაზე. სიტუაცია უკონტროლო გახდა. ისმოდა ანტისემიტური ლოზუნგები, აფრიალებდნენ პალესტინის დროშებს, გავრცელდა კადრები, რომელთა მიხედვითაც მომიტინგეები ისროდნენ ქვებს.