დღეს, 10 ოქტომბერს ახალციხეში N5 საჯარო სკოლაში, დაახლოებით 18:00 საათზე, პოლიცია და სასწრაფო დახმარების ჯგუფი გამოიძახეს.

ვითარების გასარკვევად ადგილზე მისული "სამხრეთის კარიბჭეს" ჟურნალისტი სკოლის ტერიტორიაზე არ შეუშვეს, კომენტარის გაკეთებაზე უარი თქვა სკოლის დირექტორმა, ინგა ვარდიძემაც. მოსწავლეების მშობლების ინფორმაციით, მანქანა სავარაუდოდ მეხუთე კლასის ერთ-ერთ მოსწავლეს დაეჯახა. არასრულწლოვანი სკოლის შენობიდან სასწრაფო სამედიცინო დახმარების ჯგუფმა ახალციხის რეფერალურ ჰოსპიტალში გადაიყვანა. იგი სასწრაფო დახმარების მანქანამდე მშობლებმა მიიყვანეს, თუმცა დირექტორის მსგავსად, კომენტარი არც მათ გააკეთეს: „ისეთი არაფერი არ სჭირს, გადაგვყავს კლინიკაში... არ ვიცით რა მოხდა კამერებს გადაახვევენ და ნახავენ",- გვითხრა მოსწავლის მამამ. ერთ-ერთი ვერსიით მოსწავლეს მანქანა დილის საათებში დაეჯახა, მაშინ რატომ გამოიძახეს საღამოს პოლიცია, ჩვენთვის უცნობია.

ინფორმაციას შინაგან საქმეთა სამინისტროს და საგანგებო სიტუაციების მართვის პრესსამსახურებიდან ველოდებით.

წყარო: სამხრეთის კარიბჭე