"ჯორჯიან მანგანეზის" სპეციალური მმართველი, ნიკოლოზ ჩიქოვანი, ჭიათურის მოსახლეობას შეხვდა და მასშტაბური გარემოსდაცვითი პროექტი, კერძოდ, მდინარე ყვირილას შლამისაგან გაწმენდის პირველი ეტაპი შეაჯამა. 

ნიკოლოზ ჩიქოვანმა ქალაქში არსებულ ეკოლოგიურ გამოწვევებსა და ამ მიმართულებით მიმდინარე სამუშაოებზე გაამახვილა ყურადღება. ასევე, ისაუბრა გარემოს დაცვის მიზნით დაგეგმილ პროექტებზე და უპასუხა დასმულ შეკითხვებს.

შეხვედრას სამოქალაქო საზოგადოებასთან ერთად, ადგილობრივი ხელისუფლების წარმომადგენლები, ჭიათურის მერი გივი მოდებაძე და საჩხერე-ჭიათურა-ხარაგაულის მაჟორიტარი დეპუტატი პაატა კვიჟინაძე ესწრებოდნენ.

პროექტის პირველი ეტაპის ფარგლებში, მდინარის კალაპოტიდან დაახლოებით 60 000 მ³ შლამია ამოღებული, რომელიც სპეციალურ, დაცულ ტერიტორიაზე დასაწყობდა. აღნიშნულ ტერიტორიაზე მდინარიდან ამოღებული შლამები პროექტის დასრულებამდე, შესაბამისი წესის დაცვით შეინახება. სამომავლოდ კი მისი გამოყენება რეკურტივირებულ ტერიტორიებზე, ნიადაგის გასამდიდრებლად იქნება შესაძლებელი.

სამუშაოების მიმდინარეობისას კალაპოტიდან ამოღებული შლამების გადაზიდვასთან დაკავშირებული დაბინძურების თავიდან ასაცილებლად, უწყვეტ რეჟიმში მუშაობდა ჭიათურა სერვისის დასუფთავების სამსახური.

მდინარის შლამებისაგან გაწმენდის პროექტი მაღალკვალიფიციურმა, უცხოელმა სპეციალისტებმა შეიმუშავეს, რომელიც მძიმე ტექნიკისა და ცოცხალი ძალის დახმარებით ხორციელდება. სამუშაოების მეორე, ფინალური ეტაპი ზაფხულში დაიწყება.

პროექტი სახელმწიფოს სპეციალური მმართველის, ნიკოლოზ ჩიქოვანის გადაწყვეტილებით, "ჯორჯიან მანგანეზის" გარემოს დაცვის პოლიტიკის ფარგლებში ხორციელდება.