ქარელის მუნიციპალიტეტში მომხდარ ავტოსაგზაო შემთხვევას ერთი ადამიანი ემსხვერპლა, რამდენიმე კი დაშავდა.
შემთხვევა სოფელ ბრეთის შესასვლელთან მოხდა. ერთმანეთს საპირისპიროდ მოძრავი ორი ავტომობილი შეეჯახა. ავარიის შედეგად, შემთხვევის ადგილზე დაიღუპა 40 წლამდე ასაკის მამაკაცი, დაშავებულები კი ქარელის საავადმყოფოებში გადაიყვანეს. ექიმების ინფორმაციით, დაშავებული პირების სიცოცხლეს ამ ეტაპზე საფრთხე არ ემუქრება.
ერთ-ერთი მათგანი “გორმედის” ქსელის, ქარელის საავადმყოფოშია მოთავსებული:
“რამდენადაც გვაქვს ინფორმაცია ერთი ადამიანია გარდაცვლილი შემთხვევის ადგილზე, რაც შეეხება დაშავებულს, 31 წლის მამაკაცია ჩვენთან შემოყვანილი, რომლის ჯანმრთელობის მდგომარეობაც სტაბილურია, მიმდინარეობს დაკვირვება და ვარაუდობთ, რომ ხვალ გავწერთ. მას სიცოცხლესთან შეუთავსებელი დაზიანებები არ მიუღია“ – ამბობენ “გორმედში”.