"ნაციონალური მოძრაობის“ თავმჯდომარის განცხადებით, რუსეთის მოქალაქე, რომელიც თბილისში ქართველებს შეურაცხყოფას აყენებდა, ვლადიმერ პუტინის გარემოცვის ოლიგარქის, ალექსანდრ კოპილკოვის შვილი, პაველ კოპილკოვია.
როგორც ნიკა მელიამ ბრიფინგზე აღნიშნა, პაველ კოპილკოვის ოლიგარქი მამა პირდაპირ კავშირშია რუსულ სამხედრო ინდუსტრიასთან, ასევე კავშირშია რუსულ სამხედრო დაფინანსებასთან სირიაში, ყირიმსა და ახლა უკრაინაში.
ოპოზიციონერი პოლიტიკოსის განცხადებით, პირი პოლიციამ წვრილმანი ხულიგნობისთვის დააკავა და მალევე გაათავისუფლა. ნიკა მელია ხელისუფლებას და შინაგან საქმეთა მინისტრ მოუწოდებს, დღის ბოლომდე გააკეთონ განმარტება თუ რატომ ცხოვრობს რუსი ოლიგარქის ოჯახი თბილისში.
"პაველ კოპილკოვის ოლიგარქი მამა პირდაპირ კავშირშია რუსულ სამხედრო ინდუსტრიასთან, კავშირშია რუსულ სამხედრო დაფინანსებასთან სირიაში, ყირიმსა და ახლა უკრაინაში. მის ოჯახს მოხვეჭილი აქვს უზარმაზარი ქონება რუსეთის არმიასთან გაფორმებული კონტრაქტებით და დღეს ეს ოჯახი ცხოვრობს თბილისში.
მოვუწოდებ ხელისუფლებას, განსაკუთრებით გომელაურს, დღის ბოლომდე გააკეთონ განმარტებითი განცხადება," - განაცხადა მელიამ.
"ქართული ოცნების" წევრი, პარლამენტის თავმდჯომარის პირველი მოადგილე გიორგი ვოლსკი აცხადებს, რომ კოპილკოვის ამბავი შესაძლოა პროვოკაცია იყოს.
"მე არ ვიცი პუტინის გარემოცვის წევრის შვილია თუ ვინ არის მაგრამ ყოველ შემთხვევაში უნდა დაისაჯოს, მაგრამ არც მთლად იმაზე მეტად, რაც ჩაიდინა, ჩვენ არა ვართ რუსეთი. გამორიცხული არ არის, რომ ეს იყო პროვოკაცია და ეს რადიკალური ოპოზიციის წისქვილზე ასხამს წყალს,"- აცხადებს ვოლსკი.