ვიქტორიას ტბაში ტანზანიის სამგზავრო თვითმფრინავი ჩამოვარდა. შემთხვევა მაშინ მოხდა, როცა თვითმფრინავი ტბისპირა ქალაქ ბუკობას აეროპორტში დაშვებას ცდილობდა.
BBC წერს, რომ ბორტზე 43 ადამიანი იმყოფებოდა. ამ დროისთვის, თვითმფრინავიდან 26-ის გამოყვანა მოხერხდა, ისინი კლინიკაში არიან გადაყვანილი.
ადგილზე სამძებრო-სამუშაოები მიმდინარეობს.
თვითმფრინავი თითქმის მთლიანად ჩაძირულია, გადაუდებელი დახმარების თანამშრომლები მდინარიდან მის ამოყვანას თოკებით ცდილობენ.
პრეზიდენტმა სამია სულუჰუ ჰასანმა დაზარალებულებს სიმშვიდისკენ მოუწოდა, რადგან სამაშველო ოპერაცია გრძელდება.
თვითმფრინავი ტანზანიის უდიდესი ქალაქიდან, დარ-ეს სალამიდან ბუკობამდე მიფრინავდა. გავრცელებული ინფორმაციით, შემთხვევა ქარიშხალმა და ძლიერმა წვიმამ გამოიწვია.