აფხაზური მედიის ინფორმაციით, სოხუმში, ნარკოტიკული საშუალების უკანონო შეძენა-შენახვის ბრალდებით, საქართველოს მოქალაქე ა.თ. დააკავეს.
მათივე ცნობით, 29 წლის გოგოს საცხოვრებელ სახლში „სახელმწიფო უსაფრთხოების სამსახურის" თანამშრომლებმა „მეფედრონის" ორი შეკვრა აღმოაჩინეს, რომლის საერთო წონა 10 გრამზე მეტი იყო.
მას ასევე აღმოუჩინეს ქართული პასპორტი და დროშა. აფხაზური მედია წერს, რომ გოგო, რომელსაც ასევე აქვს „აფხაზეთის მოქალაქეობა", დააკავეს და გამოძიება მიმდინარეობს. დაკავების კადრები რუსულმა პროპაგანდისტულმა მედიამ გაავრცელა. ვიდეოშუ ჩანს დაკავებულიც.
სამოქალაქო აქტივისტები მოუწოდებენ ხელისუფლებას, გააქტიურონ ყველა შესაბამისი ხაზი, მიმართონ საერთაშორისო მისიებსა და თანამეგობრობას, რომ საქართველოს მოქალაქე მალე დაუბრუნდეს ოჯახს.
„ის ცხოვრობდა სამტრედიაში და ხშირად გადადიოდა აფხაზეთში. მას თან ჰქოდნა საქართველოს დროშა, თუმცა ბრალი დაუმძიმეს და ჩაუდეს ნარკოტიკი. ეს არ არის პირველი ამბავი, ჩვენ გვახსოვს ირაკლი ვეკუას ამბავი, რომელმაც ე.წ. აფხაზური დროშა დაწვა, შემდეგ კი მას ბრალის დამძიმების მიზნით ჩაუდეს იარაღი. ეს აფხაზეთში მიღებული ამბავია. ადვოკატის აყვანის უფლებას მას, რა თქმა უნდა, არ მისცემენ. მას ეყოლება იქაური ადვოკატი. ამიტომაც, შანსი იმისა, რომ იმ ადვოკატმა რამე მის სასარგებლოდ გააკეთოს, არის ძალიან მცირე". - ამბობს სამოქალაქო აქტივისტი „ტვ პირველთან" საუბარში.
შეგახსენებთ, რომ აღნიშნულთან დაკავშირებით გუშინ ინფორმაცია გაავრცელა სუს-მა. მათი ინფორმაციით, ოკუპირებული აფხაზეთის საოკუპაციო რეჟიმის წარმომადგენლებმა საქართველოს მოქალაქე, გალის მცხოვრები ა.თ. უკანონოდ დააკავეს.
„სახელმწიფო უსაფრთხოების სამსახურის მიერ დაუყოვნებლივ გააქტიურდა ცხელი ხაზი და ინფორმაცია ა.თ-ის უკანონოდ დაკავების შესახებ ეცნობა ევროკავშირის სადამკვირვებლო მისიას და ჟენევის საერთაშორისო დისკუსიების თანათავმჯდომარეებს.
ამოქმედებულია ყველა არსებული მექანიზმი და მიმდინარეობს მუშაობა საქართველოს მოქალაქის უკანონო პატიმრობიდან გასათავისუფლებლად.
საოკუპაციო ძალის მიერ უკანონო დაკავებების უკიდურესად დესტრუქციული პრაქტიკა, რომელსაც ახორციელებს საოკუპაციო რეჟიმი, ართულებს ადგილობრივი მოსახლეობის ყოველდღიურ ცხოვრებას და მნიშვნელოვან ზიანს აყენებს უსაფრთხოების გარემოს. საოკუპაციო ძალის მიერ განხორციელებული ყველა დაკავება უკანონოა და აღნიშნულზე სრული პასუხისმგებლობა ეკისრება საოკუპაციო ძალას",- ნათქვამი ინფორმაციაში.