კონკურენციის სააგენტოს თავმჯდომარის, ირაკლი ლექვინაძის განცხადებით, მოსალოდნელია, რომ საწვავის ფასების კლება ოქტომბერშიც შენარჩუნდება.

მისივე თქმით, საწვავი გაიაფების ტენდენციით აგვისტოდან ხასიათდება.

„საწვავის ფასები აგვისტოდან კლებას აჩვენებს. ჩვენი დაკვირვებით, აგვისტოში ფასზე 30-50-თეთრიანი კლება იყო ყველა ტიპის საწვავის შემთხვევაში, სექტემბერში კი - 10-30 თეთრიანი კლება. ბირჟებზე დღეს არსებული სურათი და კურსის სტაბილურობა გვაფიქრებინებს, რომ ოქტომბერიც იქნება კლების კონტექსტში. დღეს ფასი ოთხ ლარს ზემოთ მხოლოდ გარკვეული სახეობის დიზელზე რჩება. იმედია, რომ ოქტომბერში 4-იანი ტაბლოზე აღარ გვექნება", - განაცხადა ლექვინაძემ გადაცემა BMG DRIVE-ში.

ცნობისთვის, კერძო სექტორიც პოზიტიურ პროგნოზებზე საუბრობს და აცხადებს, რომ მოკლევადიან პერიოდში საწვავზე ფასების შემცირება კიდევ არის მოსალოდნელი.

საქართველოში საწვავის ფასის განმაპირობებელი ძირითადად ორი ფაქტორია: ლარის კურსი და საერთაშორისო ბირჟებზე ნავთობის ფასი. ლარი კი გამყარების ტენდენციით გამოირჩევა, თუმცა, საერთაშორისო ენერგეტიკულ ბირჟაზე ბოლო 24 საათში ბარელი Brent-ის ღირებულება 4.1%-ით, 98-დოლარიან ნიშნულამდე გაიზარდა.