ამჟამად კამერები მუშაობს და პატიმრის [სოსო გოგაშვილის] ფიზიკურ უსაფრთხოებაზე პასუხისმგებელია პენიტენციური სამსახური, - ამის შესახებ იუსტიციის მინისტრმა რატი ბრეგაძემ ჟურნალისტებს განუცხადა, რითაც უპასუხა კითხვას, რატომ იყო მე-12 პენიტენციურ დაწესებულებაში კამერები გათიშული ზუსტად იმ დროს, რა პერიოდშიც გოგაშვილი „დანაშაულებრივ ქმედებებზე" მიუთითებს.
როგორც ბრეგაძემ ვიდეო-ჩანაწერებზე საუბრისას განაცხადა, „არსებობს გარკვეული ხარვეზი და ამის შესახებ სახალხო დამცველს და სპეციალურ საგამოძიებო სამსახურს შეტყობინება გაეგზავნა".
რაც შეეხება გოგაშვილის მოსანახულებლად მისი ოჯახის წევრების პენიტენციურ სამსახურში შაბათს, არასამუშაო საათებში შესვლას, მინისტრი კიდევ ერთხელ განმარტავს, რომ ეს „ერთგვარი წახალისების ფორმაც" იყო. მისი შეფასებით, ბრალდება, რომ პენიტენციური სამსახურის მხრიდან ეს ფაქტი დარღვევა იყო, „უსამართლობაა" და კანონმდებლობის არცერთი მუხლი არ დარღვეულა.
„როდესაც მისი თხოვნა დაკმაყოფილდა, არასამუშაო დღეს, არასამუშაო საათებში შეშვება, ეს მისდამი კეთილგანწყობას გამოხატავდა. არ იყო ოფიციალური წერილი მოწერილი. როდესაც საუბარია, რომ კანონდარღვევაა ის, რომ მასთან მისი ოჯახის წევრები იყვნენ შესულები, ეს არ არის კანონდარღვევა. არცერთი კანონდარღვევა არ ყოფილა, როდესაც მას მისი ოჯახის წევრები ესტუმრნენ",- განაცხადა რატი ბრეგაძემ.