ბიზნესმენ ლაშა პაპაშვილის შეფასებით, ეროვნული ვალუტის გამყარება საქართველოს პრემიერ-მინისტრის დამსახურებაა. ამის შესახებ მან დღეს საქართველოს ეროვნული ბანკისა და ბიზნესასოციაციის წევრი კომპანიების შეხვედრის შემდეგ ჟურნალისტებს განუცხადა.

„ყველამ იცის, ირაკლის (ღარიბაშვილის) დამსახურებაა, რომ ლარის კურსი (დოლართან მიმართებით) 3 ლარს ჩამოსცდა და კიდევ აგრძელებს სვლას. მან (პრემიერმა) პოლიტიკური გადაწყვეტილება მიიღო, როცა ეროვნულ ბანკს უთხრეს არა - რომ არავითარი ინტერვენცია არ გაეკეთებინა", - განაცხადა პაპაშვილმა.

კითხვაზე, არის თუ არა ეს პირდაპირი ჩარევა დამოუკიდებელი ინსტიტუტის (სებ-ის) საქმიანობაში, ლაშა პაპაშვილი ამბობს, რომ მთავრობა და ეროვნული ბანკი ერთი ორგანიზმია და ცალკეული ორგანოების ქმედება ერთიმეორეზეა დამოკიდებული.

„ის დამოუკიდებელი ინსტიტუტია თავისი გადაწყვეტილების მისაღებად. ადამიანიც ანატომიურად ერთი ორგანიზმია. ხელი - ხელია და თვალი - თვალი, თვალის საქმეში თუ ხელი ჩაერევა ეს პრობლემაა, მაგრამ ეს ხომ არ ნიშნავს, რომ დამოუკიდებელია, მაშინ ორგანიზმი ვინ არის", - განაცხადა პაპაშვილმა.