ქვეყანაში უძრავი ქონების რეალიზაცია შემცირდა. ბინები იმ სიხშირით აღარ იყიდება, როგორც წინა პერიოდში. ბოლო დროს რეალიზაციის კლების მიზეზი ქვეყნიდან მიგრანტების გადინებაა, ეს გარემოება კი, საბოლოო ჯამში, ასახვას მოახდეს საბაზრო კონიუნქტურაზე. ამიტომ ბინების გაყიდვის ტემპი თუ კიდევ შემცირდება, დაიკლებს მისი ფასიც, თუმცა ამ ეტაპისთვის მშენებლები და ბინის მეპატრონეები მაინც ცდილობენ მაღალი თამასა შეინარჩუნებს, რადგან თითქმის ყველა ცდილობს, მაქსიმუმალური მოგება ნახოს. 

„ქოლიერსის“ კვლევაშია აღნიშნულია, რომ 2023 წლის ოქტომბერში თბილისში საცხოვრებელი ბინების ტრანზაქციების რაოდენობამ 3387 ერთეული შეადგინა და წინა წლის ოქტომბერთან შედარებით, 20%-იანი კლებაა. ბაზრის ზომა კი - 10%-ით, 216 მილიონ აშშ დოლარამდეა შემცირებული.

„2023 წლის ოქტომბერში თბილისში ახალ პროექტებში ტრანზაქციების 19%-იანი კლება შეინიშნება. ძველ პროექტებში კი, 2022 წლის ოქტომბერთან შედარებით, მაჩვენებელი 22%-ით შემცირდა.

2023 წლის იანვარ-ოქტომბრის პერიოდში, თბილისში ახალაშენებული ბინების საშუალო შეწონილი გასაყიდი ფასი 2022 წლის იმავე პერიოდთან შედარებით 17%-ით გაიზარდა გარეუბნებში, ფართო ცენტრსა და ქალაქის ცენტრში კი 13% და 15%-იანი ზრდა დაფიქსირდა.

2023 წლის იანვარ-ოქტომბრის პერიოდში, თბილისში ძველი ბინების საშუალო შეწონილი გასაყიდი ფასი 2022 წლის იმავე პერიოდთან შედარებით 24%-ით გაიზარდა გარეუბნებში, ფართო ცენტრსა და ქალაქის ცენტრში კი 17% და 16%-იანი ზრდა დაფიქსირდა”, - ნათქვამია მათ კვლევაში.

მიგრანტების ქვეყნიდან გადინებას, უძრავი ქონების რეალიზაციის კლება მოჰყვა. ფასები ისეთი ტემპით არ შემცირებულა, როგორც რეალიზაცია. ღირებულების ნაწილში ცვლილება მხოლოდ მცირედია და დღეისათვისაც კი უძრავ ქონებაზე მაღალი ფასი ნარჩუნდება.

კომპანია "ბერუკას” ხელმძღვანელი ავთანდილ გუგეშაშვილმა ბინების გაყიდვის მაჩვენებლის კლება დაადასტურა და ასევე აღნიშნა, რომ ღირებულებამ წესით უნდა იკლოს, მაგრამ ფასები ჯერ თითქმის ურყევია, რადგან თითქმის ყველა მშენებელი ცდილობს, მაქსიმალური მოგება ნახოს

"ბინების გაყიდვა ნამდვილად შემცირებულია წინა თვეებთან შედარებით, რადგან კონკურენცია გაიზარდა, ძალიან ბევრი მშენებლობაა და მყიდველს მეტი არჩევანის საშუალება მიეცა. ასე რომ, ამ ეტაპზე, მიწოდება უფრო მეტია, ვიდრე მოთხოვნა.

რაც შეეხება მომავლის ამბავს, გაყიდვების შემცირებამ ფასის კლებაზეც უნდა იმოქმედოს, მაგრამ ჯერჯერობით ამის ნიშანები არ იკვეთება. თითქმის ყველა მშენებელი ცდილობს, მოგების მაქსიმუმზე გავიდეს, მაგრამ ასე არ შეიძლება. ეს საკმაოდ ართულებს ფასების კლების პროცესს”, - განუცხადა "რეზონანს” ავთანდილ გუგეშაშვილმა.

ამასობაში სიტუაცია შეცვლილია მოთხოვნა-მიწოდების კუთხით. თუკი რუსი და უკრაინელი მიგრანტების საქართველოში ყოფნის პერიოდში მოთხოვნა გაცილებით მეტი იყო, ვიდრე მიწოდება, ახლა პირიქითაა – მიწოდება აჭარბებს მოთხოვნას.

სწორედ ამაზე საუბრობს სამშენებლო კომპანია "სიგმას” დირექტორი ზურაბ ლაჩაშვილი და აცხადებს, რომ ქვეყანაში იმაზე მეტი ბინა შენდება, ვიდრე მოთხოვნაა.

"ბოლო პერიოდში ბაზარზე ბინების შესყიდვის შემცირება თვალში საცემია, რაც მოწოდების ზრდამ განაპირობა. საბაზრო ფასი დგინდება მოთხოვნა-მოწოდების საფუძველზე. თუ მიწოდება მეტია, ვიდრე მოთხოვნა, ფასები მცირდება კიდეც, მაგრამ ამ ეტაპზე ღირებულება საკმაოდ მაღალია. მიმდინარე ეტაპზე მიწოდება გაზრდილია. იმაზე მეტი ბინა შენდება, ვიდრე მოთხოვნაა.

რეალიზაციას რაც შეეხება, ამას ერთი კომპანიის მონაცემების მიხედვით ვერ განვსაზღვრავთ. მხოლოდ ჩვენს მაგალითზე ანალიზის გაკეთება რთულია, მაშინ როდესაც დაახლოებით 150 სამშენებლო კომპანიაა. ერთის თქმა კი დანამდვილებით ეიძლება, ბაზარზე იმაზე მეტი უძრავი ქონება შემოდის, ვიდრე მოთხოვნაა. შესაძლებელია მომავალში ფასების დარეგულირება მოხდეს კლების მიმართულეით”, - განუცხადა "რეზონანსს” ზურაბ ლაჩაშვილმა.