სოზარ სუბარი, დიმიტრი ხუნდაძე და მიხეილ ყაველაშვილი „ქართული ოცნებისა" და საპარლამენტო თანამდებობების დატოვების ერთ-ერთ ძირითად მიზეზად ასახელებენ იმას, რომ ახლა მეტი საშუალება მიეცემათ ხალხს უფრო მეტი სიმართლე უნდა უთხრან, რაზედაც მათ ერთობლივი განცხადებაც გაავრცელეს. მათი ყოფილი თანაგუნდელები ამბობენ, სამი დეპუტატის სათქმელი, რის გამოც მათ „ქართული ოცნება" დატოვეს, ძირითადად საგარეო პოლიტიკას უკავშირდება. ოპოზიცია კი მიიჩნევს, რომ „ოცნება" კრიზისშია.

ანალიტიკოსთა ნაწილი კი აცხადებს, რომ ეს შესაძლოა ახალი პოლიტიკური ძალის ჩამოყალიბების ნიშანიც იყოს.

საქართველოს პარლამენტის წევრები სოზარ სუბარი, დიმიტრი ხუნდაძე და მიხეილ ყაველაშვილი ერთობლივ ხმაურიან განცხადებას ავრცელებენ, სადაც ამბობენ, რომ „საქართველო მხოლოდ საომრად სჭირდებათ და ქართველ ხალხს საზარბაზნე ხორცად განიხილავენ... კანდიდატის სტატუსს არც 6 თვის თავზე არავინ მოგვანიჭებს".

სოზარ სუბარი ნამდვილად ვერ წარმომიდგენია ანტიდასავლური განწყობის მატარებელ პიროვნებად და განსხვავებული შეხედულებები რიტორიკის ფორმატთან დაკავშირებით არ მგონია აიხსნებოდეს იმით, რომ თითქოს ვინმემ ანტიდასავლური კამპანიის გაჩაღებას აპირებს ქვეყანაში - ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც უპასუხა კითხვას, რამდენად შეიძლება ელოდოს საზოგადოება, რომ „ქართული ოცნებიდან" წასული სამი დეპუტატი ანტიდასავლურ რიტორიკას გააძლიერებენ.

„მოქალაქეთა უფრო მეტად ინფორმირება, უფრო გახსნილი დისკუსია შეიძლება იყოს დილემატური, როგორც ჩანს, ამ შემთხვევაში, ამ ხაზის და მიმართულების არჩევანთან გვაქვს საქმე სამი ჩემი კოლეგის მხრიდან და შესაბამისად, კარგად უნდა გვესმოდეს, რომ ასეთ გადაწყვეტილებას პატივისცემითა და გაგებით უნდა შევეგებოთ.

„ალბათ, ჩვენ ვიხილავთ ოდნავ განსხვავებულ რიტორიკას სამომავლოდ, ეს არ იქნა "ქართული ოცნების" მხრიდან მხარდაჭერილი, რადგან ვფიქრობთ, გაცილებით თავშეკავებულები უნდა ვიყოთ რიტორიკაში,"- განაცხადა სარჯველაძემ.

სამი დეპუტატის მიერ "ქართული ოცნების" დატოვებაზე "ლელოს" დეპუტატი სალომე სამადაშვილი ამბობს, რომ ეს აჩვენებს უმძიმეს კრიზისს, რომელშიც "ქართული ოცნებაა" შესული.

„მგონი არავის სჯერა, რომ ბატონი ხუნდაძე, რომელმაც გამოაცხადა, რომ ქვეყანამ ევროკავშირიდან უნდა გამოიტანოს საერთოდ განაცხადი, რაიმეს აკეთებს ივანიშვილთან შეთანხმების გარეშე. ივანიშვილს თუ სურს, რომ დააჩქაროს ისედაც მძიმე დამოკიდებულება, რაც არის დღეს დასავლეთში მის მიმართ, რა თქმა უნდა, შეუძლია გააძლიეროს ანტიდასავლური პროპაგანდა მის დაქვემდებარებაში მყოფი ადამიანების მხრიდან.

„ეს ყველაფერი აჩვენებს იმას, რომ „ქართული ოცნება" არის უმძიმეს კრიზისში. მას ძალიან სწრაფად ტოვებენ მხარდამჭერები და სწრაფად იბანენ ხელს "ქართული ოცნების" მომხრეები ამ პოლიტიკური ძალისგან, რადგან ყველა ხედავს, რომ მათ არანაირი პოზიტიური შედეგის მოტანა ქვეყნისთვის არ შეუძლიათ,"- განაცხადა სამადაშვილმა.

ანალიტიკოსი გია აბაშიძე „რეზონანსთან" ამბოიბს, რომ შესაძლოა სამი დეპუტატის პარტიიდან გამოყოფა იყოს პოლიტიკური ძალის შექმნის ნიშანი და არა ნიშანი იმისა, რომ „ოცნებაში" რღვევაა.

„არ მიმაჩნია, რომ ეს დეპუტატები ისევე მოიქცევიან, როგორც „ოცნების" ზოგიერთი ყოფილი წევრი, რომლებმაც პოლიტიკურად კარი გაიჯახუნა და ის უკადრებელი იკადრა, რაც თანმიმდევრულ პოლიტიკოსს არ შეეფერება. ასეთები არ არიან არც სუბარი, არც ყაველაშვილი და არც ხუდაძე.

„ფრთხილი პროგნოზით რომ ვისაუბროთ, შესაძლოა ეს იყოს ერთგვარი იმ პოლიტიკური ძალების შექმნის პატარა ჩანასახოვანი ნიშნები, რასაც კონსტრუქციული ოპოზიცია ჰქვია. დესტრუქციული ოპოზიციის წარმომადგენლების სპეკულაციებს ვერ დავეთანხმები, მათი ნათქვამი ყოველთვის პირიქითაა ხოლმე. უნდა დაველოდოთ თუ უახლოეს მომავალში კიდევ რა თემებზე გააკეთებენ განცხადებებს.

"ქართულ ოცნებას" პარლამენტში მაინც მყარი უმრავლესობა აქვს, 81 დეპუტატის სახით. მმართველ გუნდს ახლა საკონსტიტუციო უმრავლესობა აღარ სჭირდება, მით უმეტეს საკონსტიტუციო ცვლილებები, ნებისმიერი გადაწყვეტილება უბრალო უმრავლესობიოთ მიიღება. ეს პარტიის არანაირი რღვევის ნიშანი არაა, ამას ოპოზიცია ათი წლის განმავლობაში ამბობს,. მაგრამ ქართული ოცნება ისევ მყარად დგას.

„ქართულ ოცნებაში" რღვევა კი არაა, პარტიაში კადრებისა და პოლიტიკოსების როტაცია მიმდინარეობს, რაც ყველა ჯანსაღ პოლიტიკურ ძალაში უნდა მოხდეს, თუნდაც საქართველოში და თუნდაც ცივილიზებულ დასავლეთში, კადრების როტაცია პარტიის რღვევას არ ნიშნავს, ამაზე აპელირება კი უპასუხისმგებლო საქციელია",- განაცხადა აბაშიძემ.

დიმიტრი ხუნდაძის, სოზარ სუბარისა და მიხეილ ყაველაშვილის განცხადებაში კი ნათქვამია: „გასული დღეების განმავლობაში, პარტიის ლიდერებთან და საპარლამენტო უმრავლესობის წევრებთან გვქონდა სერიოზული დისკუსია მიმდინარე პოლიტიკურ პროცესებთან დაკავშირებით. მოვლენების შესახებ ჩვენი და გუნდის სხვა ლიდერებისა და წევრების შეფასებები სრულად ემთხვევა ერთმანეთს. თუმცა, ვერ ვთანხმდებით მხოლოდ ერთზე - რა დოზით უნდა ვუთხრათ სიმართლე საზოგადოებას.

„რა თქმა უნდა, დიდწილად გვესმის კოლეგების, რომლებიც ამბობენ, რომ პოლიტიკური პროცესების შესახებ ინფორმაციის გასაჯაროებისას თავშეკავებაა საჭირო. თუმცა, დღეს დადგა მომენტი, როდესაც საზოგადოებას უნდა მივაწოდოთ ბევრად მეტი ინფორმაცია იმის შესახებ, თუ რა ხდება ქართული პოლიტიკის კულისებში. აქ სასწორზე დგას არა ხელისუფლების ან რომელიმე კონკრეტული ჩვენგანის, არამედ სახელმწიფოს და ხალხის ბედი. შესაბამისად, დროა, საკუთარი თავის და ქვეყნის დაცვა უშუალოდ ხალხს უფრო მეტად მივანდოთ.

„არიან დიდი ძალები, რომლებსაც საქართველოში სურთ რევოლუცია, ხალხის მიერ არჩეული ხელისუფლების შეცვლა და მისი ჩანაცვლება ადამიანებით, რომლებიც უშუალოდ არიან პასუხისმგებელი 2004-12 წლებში ჩადენილ უამრავ დანაშაულზე.

„ამისათვის შედგა ნაციონალური მოძრაობისა და მისი მედია და ენჯეოსატელიტების შეკრება ბაკურიანში, სადაც ამერიკიდან საგანგებოდ ჩამოიყვანეს რევოლუციების ცნობილი სპეციალისტი, პიტერ აკერმანი.

„ამისათვის შემოიტანეს ევროკავშირის წევრობის კანდიდატის თემაც. ცხადია, უკრაინისთვის ევროკავშირის წევრობის კანდიდატობა დღეს სრულიად არარელევანტურია. რუსული სამხედრო აგრესიის გამო, ქვეყანა ცეცხლის ალშია გახვეული, ქვეყანა ნადგურდება, ყოველდღიურად ასეულობით ადამიანი იღუპება და ასეთ დროს, კანდიდატის სტატუსი ამ ქვეყნისთვის, ბუნებრივია, მცირე ნუგეშადაც კი არ გამოდგება.

„იგივე ეხება მოლდოვას, რომელიც უშუალოდ ესაზღვრება კონფლიქტის ზონას, ასეულობით ათას უკრაინელ ლტოლვილს იფარებს და უმძიმეს ეკონომიკურ პრობლემებს განიცდის. ერთადერთი, რისთვისაც კანდიდატის თემა დასჭირდათ, საქართველოს ხელისუფლებისთვის პოლიტიკური ფონის დამძიმება და რევოლუციური მუხტის ხელოვნურად შექმნა იყო.

„კანდიდატის თემა იყო ერთგვარი „სათაგური", რომელშიც საქართველოს ხელისუფლებას თავი შეაყოფინეს. ამ საქმეში თავდაპირველად სალომე ზურაბიშვილი ჩართეს, რომელიც ბრიუსელიდან ამ თემით დასაჩუქრებული გამოუშვეს. პირველადი გათვლით, საქართველოს მიერ განაცხადის შეტანის შესახებ განცხადება პარლამენტში სწორედ ზურაბიშვილს უნდა გაეკეთებინა.

„ამის გამო, მან კონსტიტუციის დარღვევით პარლამენტის სხდომის დაანონსებაც კი იკადრა. თუმცა, გუნდმა სწორად იმოქმედა და ეს სცენარი ჩაშალა. ამის შემდეგ, ნაციონალური მოძრაობა და მისი სატელიტები აამუშავეს და განაცხადის შესახებ კამპანია მათ ააწევინეს, რის შემდეგაც ხელისუფლებამ განაცხადის შეტანის შესახებ გადაწყვეტილება აბსოლუტურად რაციონალურად მიიღო.

„ბაკურიანის შეკრების მონაწილეებმა წინასწარ იცოდნენ და საქმეში ჩახედული კაცისთვისაც არ უნდა ყოფილიყო რთული გამოსაცნობი, რომ კანდიდატის სტატუსს მისცემდნენ უკრაინასა და მოლდოვას, საქართველოს კი სტატუსის გარეშე დატოვებდნენ და ეს მოლოდინი სრულად გამართლდა.

„ევროკავშირის გადაწყვეტილების შემდეგ, მოვლენებიც ზუსტად ისე წარიმართა, როგორც ამას წინასწარ პროგნოზირებდნენ გუნდის წევრები. ბაკურიანის შეკრების მონაწილეები მყისიერად გამოვიდნენ და მთავრობის გადადგომა მოითხოვეს.

„ნაცმოძრაობის რევკომს ორი ტერმინი აკერია პირზე: დეოლიგარქიზაცია და დეპოლარიზაცია. შეგახსენებთ, რომ ეს ორი ტერმინი ჯერ ევროპარლამენტის რეზოლუციაში ჩაიწერა, ხოლო მოგვიანებით ევროპული კომისიის დასკვნაშიც გადაიტანეს.

„ეს ტერმინები მათ მიერ მარტივად ითარგმნება: დეოლიგარქიზაცია ნიშნავს ბიძინა ივანიშვილის საქართველოდან წასვლას, ხოლო დეპოლარიზაცია - სააკაშვილისა და გვარამიას ციხიდან გამოშვებას.

„რევოლუციისთვის ორი ალტერნატიული სცენარი იყო შემუშავებული: ერთი მოკლევადიანი და მეორე შედარებით გრძელვადიანი.

„მოკლევადიანი სცენარი ევროპარლამენტის რეზოლუციაზე იყო გათვლილი. ცნობილი რეზოლუციით და ევროპარლამენტარების განცხადებებით საქართველოს ხელისუფლებას უმძიმესი შეურაცხყოფა მიაყენეს და ხალხში ემოციური ფონის შექმნას ამით შეეცადნენ. თუმცა, მოკლევადიანი სცენარი ჩავარდა და პირველ ცდაზე რევოლუცია არ შედგა.

„მეორე სცენარი კანდიდატის სტატუსის შესახებ ევროკავშირის გადაწყვეტილებაზე არის გათვლილი. კანდიდატობაზე უარის თქმით, შექმნეს გარკვეული ემოციური ფონი, რასაც, მათი გათვლით, უნდა მოყვეს იმ ე.წ. რეფორმების თავს მოხვევა, რომელთა ერთადერთი მიზანი ხელისუფლების ცვლილება და ქართული სასამართლოს მისაკუთრებაა.

„ერთ-ერთ ევროპარლამენტარს, მიხაელ გალერს ათქმევინეს კიდეც, პარტიები ახალი პოლიტიკური შეთანხმებისთვის უნდა მოემზადონო. ანუ კიდევ ერთხელ უნდა გაგვიყვანონ კონსტიტუციური ჩარჩოდან და ხელი მოგვაწერინონ პოლიტიკურ შეთანხმებაზე, რომლის საფუძველზეც ორი დამნაშავე ციხიდან უნდა გამოვიდეს და ბიძინა ივანიშვილი ქვეყნიდან უნდა წავიდეს. ამით უნდათ კონსტიტუციური წესრიგი მოგვიშალონ და სახელმწიფოებრიობა დაგვაკარგვინონ, რისი დაშვებაც არაფრის ფასად არ შეიძლება. დაუშვებელია იმ ადამიანებთან ერთად მოლაპარაკების მაგიდასთან დაჯდომა, რომლებიც სახელმწიფოს, ხელისუფლებას, არცერთ სახელმწიფო ინსტიტუტს არ ცნობენ.

„იმავე გალერს ისიც ათქმევინეს, ივანიშვილი თუ პატრიოტია, ქვეყნიდან უნდა წავიდესო. გალერის ამ ფრაზიდან ნათლად იკითხება მათი სულისკვეთება და მთავარი მიზანი: პატრიოტები, ადამიანები, რომლებსაც საქართველო უყვართ, ქვეყანას უნდა მოშორდნენ და ქვეყნის სადავეები არაპატრიოტებს, უსამშობლო და უღმერთო ხალხს უნდა დარჩეს.

„უსამშობლო და უღმერთო ადამიანები კი იმიტომ უნდათ, რომ ისინი ნებისმიერ დავალებაზე მოაწერენ ხელს. რაც მთავარია, თვალდახუჭული დაიწყებენ ომს, რაც მთელი ამ სცენარის მთავარი მიზანია. სწორედ ამის გამო იყვნენ ზელენსკი და არახამია რევოლუციური მიტინგის პერსონაჟები, რაც, ასევე, აკერმანის სცენარის ნაწილი იყო.

„ფაქტია, რომ საქართველო მხოლოდ საომრად ჭირდებათ და ქართველ ხალხს საზარბაზნე ხორცად განიხილავენ. კარგად ესმით, რომ არც ირაკლი ღარიბაშვილი გაიმეტებს ქვეყანას და ხალხს საბედისწერო ომისთვის და არც ბიძინა ივანიშვილი მოსთხოვს მას ამის გაკეთებას. სწორედ ამიტომ, ხელისუფლებაში ჭირდებათ ადამიანები, რომლებიც ქვეყანას განადგურებისთვის უპრობლემოდ გაიმეტებენ. სწორედ ასეთები არიან ნაციონალური მოძრაობისა და მასთან დაკავშირებული ენჯეოების ლიდერები თუ სატელევიზიო სახეები.

„ვხედავთ, რომ კანდიდატის არაფრისმომცემი სტატუსის მინიჭებისთანავე, მოლდოვამ რუსეთისთვის სანქციების დაწესების შესახებ გააკეთა განცხადება. როგორც ჩანს, მოლდოვას ეს პირობა წინასწარ დაუყენეს და ქვეყანა, პრაქტიკულად, არაფრის სანაცვლოდ, სულ მცირე, უმძიმესი ეკონომიკური პრობლემებისთვის გაწირეს.

„როდესაც 300 ევროპარლამენტარი აბსურდულ რეზოლუციას აწერს ხელს, საერთო სურათი და მიზანი დღესავით ნათელია. საქართველოს კანდიდატის სტატუსს არც 6 თვის თავზე არავინ მიანიჭებს, თუ მანამდე ომში არ ჩაერთო ან რუსეთს სანქციები არ დაუწესა, რაც ასევე ომისკენ მიმავალი პირდაპირი გზაა. სრულიად უპრეცედენტო 6-თვიანი ვადაც იმისათვის არის მოგონილი, რომ ქვეყანაში საზოგადოების ნაწილის მღელვარება არ განელდეს. უკრაინა და მოლდოვა, როგორც ვიოლა ფონ კრამონი და ლატვიის საგარეო საქმეთა მინისტრი ამბობენ, 30-წლიან მოსაცდელში თუ შეუშვეს, ჩვენ არც ამ მოსაცდელში შეგვიშვებენ, რათა გრძელვადიან რევოლუციურ სცენარს აქტუალობა შეუნარჩუნონ.

„მიგვაჩნია, რომ ყველაფერს უნდა დაერქვას თავისი სახელი. ამისათვის, საზოგადოებას თანდათანობით მივაწვდით ინფორმაციას იმ მოვლენების შესახებ, რომლებიც ქართული პოლიტიკის კულისებში ვითარდება. რა თქმა უნდა, გარკვეულ დონზე რაღაცეებს ჩვენც გავუფრთხილდებით და ამ ინფორმაციას დოზირებულად გავასაჯაროებთ.

„ჩვენი მთავარი მიზანი იმ სცენარის პრევენციაა, რომელმაც საქართველო არეულობამდე, ომამდე და რუსულ სამხედრო ოკუპაციამდე უნდა მიიყვანოს. საქართველო ახალ არეულობასა და ომს ვერ გადაიტანს. აქედან გამომდინარე, ჩვენ უნდა ვიმოქმედოთ მაღალი პასუხისმგებლობით, რომელიც ჩვენი ქვეყნისა და ხალხის წინაშე გვაკისრია.

„გარდა ამისა, ჩვენი მთავარი მიზანი იმ გეგმის აღსრულების პრევენციაა, რომელიც საქართველოს ევროპული ინტეგრაციის გზაზე ხელოვნური დაბრკოლებების შექმნას ისახავს მიზნად. თუ საზოგადოება არ აღიჭურვება საჭირო სიმართლით, ის თავად გახდება არეულობისა და ომის სცენარის ნაწილი, რაც ევროკავშირში საქართველოს ინტეგრაციას სამუდამოდ შეუძლებელს გახდის. ჩვენ უნდა აღვჭურვოთ საზოგადოება სიმართლით, რათა ის თავად გახდეს საქართველოს ევროპული მომავლის გარანტი.

„გვესმის, რომ ჩვენი მხრიდან გარკვეულ თემებზე საჯაროდ საუბარი მმართველ გუნდს უხერხულობას შეუქმნის. ამიტომ, გვიწევს პარტიის, ფრაქციისა და საპარლამენტო თანამდებობების დატოვება და დამოუკიდებლად მოქმედება. თუმცა, ვრჩებით „ქართული ოცნების" მხარდამჭერებად და გუნდს ყველანაირად დავეხმარებით ყველა საქმეში, რომელიც ქვეყნის და ხალხის სასიკეთოდ არის გასაკეთებელი", - ნათქვამია ერთობლივ განცხადებაში.