სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    სოზარ სუბარს უფლებამოსილება ოფიციალურად ამოეწურა
    თამთა ქარჩავა
    18.09.2009

    სუბარი არ აკონკრეტებს თავის სამომავლო გეგმებს, თუმცა განმარტავს, რომ საქმიანობას პოლიტიკაში განაგრძობს. ყოფილი სახალხო დამცველი ამბობს, რომ საქართველოს ჰყავს დამნაშავე პრეზიდენტი.
    რის ახსნას ცდილობდნენ მისთვის ადეიშვილი, მერაბიშვილი და ბოკერია, რატომ უწოდებს მიხეილ სააკაშვილს დამნაშავეს და რა საქმეს უტოვებს გიორგი ტუღუშსს? ამ საკითხებთან დაკავშირებით "რეზონანსი" სოზარ სუბარს ესაუბრა.
    "რეზონანსი": როგორ შეაფასებთ თქვენი მუშაობს 5 წელიწადს?
    სოზარ სუბარი: ხუთი წლის განმავლობაში მე და ჩემი მეგობრები ვაკეთებდით ყველაფერს, რაც კი შეიძლებოდა. ვცდილობდით ვყოფილიყავით ყველგან, სადაც საჭირო ვიყავით, სადაც ადამიანებს ჩვენი თანადგომა სჭირდებოდათ და ვიყავით კიდეც ყველგან. უფლების დამცველისთვის პირველი ამოცანა ადამიანის უფლებები და მათი პრობლემები უნდა იყოს და იმედი მაქვს, რომ გიორგი ტუღუში ამ პრინციპით იმოქმედებს.
    "რ": თქვენ პრაქტიკულად სახალხო დამცველად არჩევისთანავე დაგეძაბათ ურთიერთობა ხელისუფლებასთან...
    ს.ზ: ორ კვირაში. პირველი მკაცრი შეჯახება იყო მაშინ, როდესაც, საქართველოს მოქალაქეების გასახლებას ცდილობდნენ ქვეყნიდან. ვგულისხმობ კეხვის ინციდენტს, 300 ქართველის დეპორტაციას აპირებდა მაშინ საქართველოს ხელისუფლება. მაშინ სერიოზული ჩხუბი მქონდა პრეზიდენტთან და ყოფილ შს მინისტრ ირაკლი ოქრუაშვილთან. ამის მერე იყო პოლიციის მიერ ჩადენილი მკვლელობები, პირველი მსხვერპლი იყო გოჩა კვირიკაშვილი და სხვათა შორის დღემდე მირეკავენ აშშ-ის საელჩოდან, აინტერესებთ ამ საქმის გაგრძელება, მაგრამ ახალი არაფერია.
    მიუხედავად ამისა, ძალიან დიდი ხნის განმავლობაში ურთიერთობებს მაინც ვინარჩუნებდით. მქონდა განცდა, რომ ეს ტალღა ადამიანის უფლებების დარღვევისა გადაივლიდა. მაშინ ვერ წარმომედგინა, რომ ეს ხელისუფლების პოლიტიკად და სავიზიტო ბარათად იქცეოდა. მაგრამ, რაღაცა პერიოდის მერე შეუძლებელი გახდა ამ ურთიერთობის გაგრძელება.
    "რ": როდის შემდეგ?
    ს.ს: სანდრო გირგვლიანის შემდეგ. თუმცა, მერე კიდევ ვცადეთ ურთიერთობის დალაგება. 2006 წლის 1 მაისს შეხვედრა მქონდა შს მინისტრ ვანო მერაბიშვილთან და რაღაცეებზე ვილაპარაკეთ. ზუსტად იმ დღეს მოხდა ვაზაგაშვილის და ხუბულოვის ჩაცხრილვა. ამის მერე ყველანაირი დიალოგი შეწყდა, ვინაიდან იმ დღიდანვე აშკარა იყო ამ ბიჭების არა განზრახ მკველობა, არამედ წინასწარ განზრახული მკვლელობა.
    "რ": ამ შეხვედრაზე რას გეუბნებოდათ ვანო მერაბიშვილი? თუ აღიარებდა იმას, რომ გირგვლიანის მკველობის საქმეში ფიგურირებდა მისი მეუღლე და თანამშრომლები?
    ს.ს: ამ შეხვედრაზე გირგვლიანზე არ ყოფილა საუბარი. გირგვლიანზე გაცილებით ადრე გვქონდა ძალიან სერიოზული კამათი. ჩემი განცხადების შემდეგ, როდესაც ის სამი ადამიანი იძულებული გახდა, რომ დაეტოვებინა სამსახური, ამის შემდეგ შემხვდნენ ვანო მერაბიშვილი, ზურაბ ადეიშვილი და გიგა ბოკერია.
    "რ": და რას გეუბნებოდნენ ისინი?
    ს.ს: დიდხანს ცდილობდნენ, რომ რაღაცეებზე, მათი პოზიციიდან რომ ვთქვათ, თვალი აეხილათ ჩემთვის. ცხადია, რომ ასე ვერ მოხდებოდა. იმ კონკრეტულ შემთხვევაში მერაბიშვილმა მითხრა, რომ როცა რამეს ნახავ, შეგვატყობინე, მოგვეცი ცოტა დრო, რომ ჩვენ თვითონ დავსაჯოთ დამნაშავეები; თუ არ დავსჯით მერე გააკეთე ხმამაღალი განცხადებებიო. სხვათა შორის, ეს დავიცავი ვაზაგაშვილის და ხუბულოვის საქმესთან დაკავშირებით. როცა მათ დაიწყეს მკვლელობის გამართლება, მაშინ ეკა ხოფერიასთან პირდაპირ ეთერში ვთქვი, რომ შსს ამბობს ტყუილს. სამი წლის მერე გავაკეთეთ ექსპერტიზა, რომელმაც დაადასტურა ის, რასაც მაშინ ვამბობდი. რომ ეს იყო განზრახ მკვლელობა და, რომ გამოძიება და ექსპერტიზა ცდილობდა ამ საქმის ჩაფარცხვას.
    "რ": ვაზაგაშვილის საქმეზე 127-გვერდიანი დოკუმენტი მოამზადეთ და პროკურატურას საქმის ხელახალი გამოძიების თხოვნით მიმართეთ. თუ მიიღო ეს პროკურატურამ ეს საქმე და დაიწყება თუ არა გამოძიება?
    ს.ს: გამოძიება აუცილებლად უნდა დაიწყონ. მაგრამ, როგორ დამთავრდება, ამაზე ძნელია წინასწარ რამის თქმა. ვაზაგაშვილის საქმე ნამდვილად არის საბრალდებო დასკვნა არაერთი თანამდებობის პირის მიმართ.
    გუშინ ახალი რეკომენდაცია გავაგზავნე პროკურატურაში აფრასიძეების საქმესთან დაკავშირებით, რაც ასევე არის საბრალდებო დასკვნა ბევრი მაღალი თანამდებობის პირის მიმართ. მაგრამ, ჯამში ეს დასკვნები და მოხსენებები საბრალდებო დასკვნაა რეჟიმის მიმართ, რომელიც შეიქმნა საქართველოში.
    ეს არის დანაშაულებრივი რეჟიმი. ეს არის რეჟიმი, რომელიც რეპრესიების მეშვეობით მართავს ქვეყანას. როდესაც პარლამენტი, სასამართლო, აღმასრულებელი ხელისუფლება და თვთიმმართველობა ერთ ხელშია მოქცეული და ერთ კაცს ემორჩილება.
    აფრასიძეებს რაც შეეხება, პრეზიდენტმა აღიარა, რომ მათი განადგურების ბრძანება გასცა. მან ასეთი რამ თქვა: "ჩემი ბრძანებით, ჩვენი ვერტმფრენებიდან გახსნილი იქნა ცეცხლი, მათ შორის რაკეტები. ეს კოშკები განადგურდა და მათ შორის ბანდიტებიც. ეს იყო სწორი გადაწყვეტილება. ასე ვამყარებდით საქართველოში ჩვენს წესრიგს და წესრიგის გარეშე არ არსებობს განვითარება". არის კიდევ ერთი განცხადება, სადაც ამბობს, რომ "მე გავეცი ბრძანება მესტიას დაპატრონებული ბანდიტების განადგურების შესახებო".
    ეს არის მისი აღიარებითი ჩვენება. დანაშაულია, როცა განადგურების ბრძანებას იძლევი და არა დაკავების. პოლიციას აქვს უფლება, რომ იარაღი გამოიყენოს, მაგრამ როდესაც ეს შეგნებულად და წინასწარ განზრახვით ხდება, ეს არის განზრახ მკვლელობა, რომლისთვისაც უნდა დაისაჯოს როგორც ჩამდენი, ისე ბრძანების გამცემი და უკვე გითხარით, რომ სააკაშვილმა აღიარა, რომ მან გასცა ბრძანება აფრასიძეების განადგურებასთან დაკავშირებით.
    "რ": ანუ თქვენ ამბობთ, რომ საქართველოს ჰყავს დამნაშავე პრეზიდენტი?
    ს.ს: რასაკვირველია. საქართველოს ჰყავს დამნაშავე პრეზიდენტი. აუცილებლად დადგება ყველას პასუხისმგებლობის საკითხი და ამაში დარწმუნებული ვარ. ბოლო-ბოლო პინოჩეტის სასამართლო შედგა და მოეთხოვა პასუხი იმისათვის, რაც ჩაიდინა.
    "რ": როგორ ფიქრობთ, რატომ არ ხდებოდა თქვენი რეკომენდაციების გათვალისწინება?
    ს.ს: 127-გვერდიან დასკვნას, რომელიც გაიგზანა ვაზაგაშვილის და ხუბულოვის განზრახ მკვლელობასთან დაკავშირებით, ამ რეკომენდაციის გაზიარებას მოჰყვება ის, რომ დაისჯება უამრავი მაღალი თანამდებობის პირი და თვით მინისტრამდე შეიძლება მივიდეს საქმე. იგივე გირგვლიანის მკვლელობა... ეს საქმე წესიერად რომ გამოძიებულიყო და საკადრისი სასჯელი მიეღოთ იმ პირებს, რასაც იმსახურებდნენ, ეს გამოიწვევდა იმას, რომ ამოტივტივდებოდა შემკვეთების გვარები.
    ანუ ყოველი ასეთი მნიშვნელოვანი საქმე მიდის რეჟიმის გასამართლებამდე. ეს არის დანაშაული, რომელსაც რეჟიმი სჩადის. ამიტომაც შეუძლებელი იყო, რომ ეს რეკომენდაციები ბოლომდე გათვალისწინებულიყო. ცხადია, რომ არ გაითვალისწინებდნენ, მაგრამ ჩვენ ჩვენს საქმეს ვაკეთებდით.
    "რ": თქვენ გდებდნენ ბრალს იმაში, რომ იყავით პოლიტიზირებული...
    ს.ს: თქვენ გაგიგიათ, მათ ეთქვათ, რომ ჩვენ არ ვმუშაობთ, ან ის, რომ ვართ კორუმპირებული? ერთადერთი, რასაც იძახდნენ, იყო ის, რომ ვართ პოლიტიზირებული. რაღაცა ხომ უნდა ეთქვათ.
    ძალიან კარგად ვიცი, როგორ უნდა მოვიპოვო პეტრე ცისკარიშვილის სიყვარული და პატივისცემა. ამისთვის უნდა ვთქვა, რომ მინისტრი, რომელიც ყოველგვარი საბუთის გარეშე შეიჭრება უცხო მფლობელობაში, მაგალითად "ბადაგონში" და გაანადგურებს 100 ტონა ღვინოს, ის კარგი მინისტრია და რომ მინისტრი ასე უნდა იქცეოდეს და ცისკარიშვილი იქნებოდა მადლობელი.
    150 ცემის ფაქტი გვაქვს შესწავლილი ამ პოლიტიკურ ნიადაგზე. არცერთი არაა გამოძიებული. რა უნდა გვიპასუხონ ამაზე? ხომ ვერაფერს ვერ გვიპასუხებენ? ვალერი გელაშვილზე რა უნდა თქვან? ხომ თქვა მერაბიშვილმა პირადად ჩემი და ხელისუფლების ღირსების საქმეა ამ საქმის გამოძიებაო? სად არის ეს ღირსება? არის ღირსება? რატომ არაა გამოძიებული? რა გააკეთეს იმისათვის, რომ ეს გამოძიებულიყო? არაფერი.
    "რ": რაც შეეხება გიორგი ტუღუშს, რას უტოვებთ მას?
    ს.ს: ვუტოვებ აწყობილ სტრუქტურას, მოტივირებულ და კეთილსინდისიერ თანამშრომლებს. მას ვუტოვებ უამრავ საქმეს, რომელზეც მან ისევე უნდა იბრძოლოს, როგორც აქამდე ჩვენ ვიბრძოლეთ. ვუტოვებ იმ საქმეებს, რომელიც აქამდე არაა გამოძიებული.
    "რ": როგორ ფიქრობთ, გიორგი ტუღუში შეძლება ამ საქმეების გამოძიებას? არასაპარლამენტო ოპოზიციას ამბობს, რომ ის არის ხელისუფლებო კადრი და ის ვერ იქნება რეალური სახალხო დამცველი...
    ს.ს: რამდენად შეძლებს დამოუკიდებლობას, ძნელია ამის თქმა. ეს გამოჩნდება.
    "რ": სად აპირებთ მოღვაწეობის გაგრძელებას. ამბობენ, რომ უნივერსიტეტში წაიკითხავთ ლექციებს, თუმცა ასევე ამბობენ, რომ მიდიხართ ლევან გაჩეჩილაძესთან...
    ს.ს: ლექციების წაკითხვა არის ერთ-ერთი საქმე, რაც მინდა გავაკეთო. უფრო მეტს ვფიქრობ პოლიტიკაზე, მაგრამ ჯერჯეროებით არ მაქვს გადაწყვეტილი, ვისთან ვიქნები, კონსულტაციები მიმდინარეობს.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2017 by Resonance ltd. . All rights reserved
    Site Meter