გერმანიის საგარეო საქმეთა მინისტრი იოჰან ვადეფული უკრაინის მხარდამჭერი ქვეყნების შესახებ რუსეთის საგარეო საქმეთა მინისტრის, სერგეი ლავროვის განცხადებას „სულ უფრო სასოწარკვეთილი რუსეთის ხელმძღვანელობის მხრიდან აბსურდულ პროპაგანდად" აფასებს.
„უკრაინის წინააღმდეგ წარმოებული წარუმატებელი დამპყრობლური ომის გამო რუსეთში სულ უფრო მძაფრი ეკონომიკური და სოციალური შედეგების ფონზე, კრემლი სასოწარკვეთილად ცდილობს, მუქარებისა და დეზინფორმაციის გზით ზეწოლა მოახდინოს უკრაინის საერთაშორისო მხარდამჭერებზე", - აღნიშნა ვადეფულმა.
მისი თქმით, რუსეთის არცერთი აქტივობა არ იქნება წარმატებული. „რუსეთის არცერთი აქტივობა არ იქნება წარმატებული. ყოველთვის ვიპოვით სწორ პასუხებს. ჩვენ ევროპული ერთიანობის დემონსტრირებას ვახდენთ", - აღნიშნა გერმანიის საგარეო უწყების ხელმძღვანელმა.
ცნობისთვის, რუსეთის საგარეო საქმეთა მინისტრმა, სერგეი ლავროვმა რამდენიმე დღის წინ განაცხადა, რომ მოსკოვი გაამკაცრებდა მეთოდებს, „რათა გაანადგუროს ყველაფერი, რაც კიევის სამხედრო მანქანას დასავლეთიდან კვებავს".
„მნიშვნელოვნად გავაძლიერებთ ჩვენს მეთოდებს ყველაფრის განადგურების მიზნით, რაც კიევის საომარ მანქანას დასავლეთიდან კვებავს და ჩვენ ამას უკვე ვაკეთებთ", - აღნიშნა ლავროვმა.
საერთაშორისო უსაფრთხოების, სამხედრო და დიპლომატიის ანალიტიკოსები ამ პროცესებს კომპლექსურად უყურებენ და მიიჩნევენ, რომ ეს მხარეებს შორის საინფორმაციო, ფსიქოლოგიური და სტრატეგიული დაპირისპირების მორიგი ესკალაციაა.
ექსპერტთა შეფასებით, რუსეთის მხრიდან მეთოდების „გამკაცრებისა" და დასავლური მიწოდების ჯაჭვების განადგურების მუქარა მიმართულია ევროპულ საზოგადოებასა და პოლიტიკურ წრეებში შიშის დათესვაზე, რათა ომის პირდაპირი გაფართოების შიშით უკრაინისთვის იარაღის მიწოდება შეფერხდეს ან შემცირდეს.
პრაქტიკულ ნაწილში ანალიტიკოსები ელოდებიან, რომ კრემლი გაზრდის იერიშებს უკრაინის სატრანსპორტო-ლოგისტიკურ ინფრასტრუქტურაზე (რკინიგზა, ხიდები), საზღვრისპირა ზონებზე და შესაძლოა გაააქტიუროს ჰიბრიდული თუ დივერსიული ოპერაციები ევროპის ტერიტორიაზეც.
მეორე მხრივ, გერმანიის საგარეო უწყების მკვეთრი რეაქცია აჩვენებს, რომ დასავლელი მოკავშირეები შეგნებულად უარყოფენ კრემლის შანტაჟს.
ანალიტიკოსები იზიარებენ მოსაზრებას, რომ ხანგრძლივი ომისა და სანქციების ფონზე რუსეთი მართლაც განიცდის სერიოზულ ეკონომიკურ წნეხს, რის გამოც მოსკოვს მსგავსი აგრესიული რიტორიკა შიდა აუდიტორიის მობილიზაციისა და „ძალის ილუზიის" შესაქმნელად სჭირდება. საბოლოო ჯამში, ექსპერტები ამბობენ, რომ კრემლის ეს მუქარები ვერ აღწევს მთავარ მიზანს - გახლიჩოს დასავლური კოალიცია, ხოლო გერმანიის პოზიცია ადასტურებს, რომ ევროპული მხარდაჭერა უცვლელი და მტკიცე რჩება.