სამგორის მეტროში გარდაცვლილი სტუდენტის, მარიამ ტყემალაძის დედა სოციალურ ქსელში ექსპერტიზის პასუხს აქვეყნებს.
დედის მიერ გამოქვეყნებულ ექსპერტიზის დასკვნაში მარიამ ტყემალაძის გარდაცვალების მიზეზად, კარდიომიოციტების მწვავე იშემიური დაზიანების შედეგად განვითარებული გულ-სისხლძარღვთა მწვავე უკმარისობა დგინდება.
"გვამის სასამართლო სამედიცინო გამოკვლევისა და დამატებითი გამოკვლევების მონაცემებზე დაყრდნობით, წარმოდგენილი სამედიცინო დოკუმენტის მონაცემების გათვალისწინებით, დადგენილებაში გამოძიების მიერ დასმული კითხვების შესაბამისად ექსპერტიზა მიდის შემდეგ შედეგებამდე - მოქალაქე მარიამ ტყემალაძის სიკვდილის მიზეზია კარდიომიოციტების მწვავე იშემიური დაზიანების შედეგად განვითარებული გულ-სისხლძარღვთა მწვავე უკმარისობა.
გვამის გამოკვლევისას ნანახი სიკვდილის შემდგომი გვამური მოვლენების მხედველობაში მიღებით: სიკვდილის დადგომიდან გვამის გამოკვლევამდე გასული უნდა იყოს დაახლოებით 4 საათი.მოქალაქე მარიამ ტყემალაძის გვამის გარეგნული გამოკვლევით აღინიშნებოდა "ვენაკათეტერიზაციის" (სამედიცო მანიპულაცია) კვალი," - ვკითხულობთ ექსპერტიზის დასკვნაში.
მარიამ ტყემალაძის დედა მადლობას უხდის იმ პირებს, რომლებმაც ექსპერტიზის დასკვნის პასუხიები დროულად მიაწოდეს.
“სამი თვეზე გვეღირსა ექსპერტიზის დასკვნა. მადლობა ვინც მიიღო მონაწილეობა ამ დასკვნის დაჩქარებაში, რომ არა ეს ადამიანები ვინ იცის როდის გვაღირსებდნენ… ინტერესიდან გამომდინარე ვაქვეყნებ…” – წერს მარიამ ტყემალაძის დედა.