ეკონომიკისა და მდგრადი განვითარების სამინისტროს ინფორმაციით, 2026 წლის პირველი კვარტლის მაღალი ეკონომიკური აქტივობა საშუალო ხელფასების მაჩვენებელზეც აისახა და წინასწარი მონაცემებით, მიმდინარე წლის იანვარ-მარტის პერიოდში დაქირავებით დასაქმებულთა საშუალო თვიური ნომინალური ხელფასი 8.9%-ით, 193.7 ლარით გაიზარდა და 2,363.8 ლარი შეადგინა.

მთავრობის მიერ ეკონომიკის მხარდაჭერის მიზნით განხორციელებული ღონისძიებები ხელს უწყობს ეკონომიკური აქტივობის ზრდას და შრომის ბაზრის გაუმჯობესებას და შესაბამისად, პოზიტიურად აისახება დაქირავებით დასაქმებულთა ხელფასებზეც.

საანგარიშო პერიოდში ხელფასების ზრდა დაფიქსირდა ეკონომიკის ყველა სექტორში. მნიშვნელოვნად გაიზარდა ხელფასები შემდეგ სფეროებში: საფინანსო და სადაზღვევო საქმიანობები (7.9%), სამთო-მოპოვებითი მრეწველობა (11.8%), მშენებლობა (8.8%), წყალმომარაგება, ნარჩენების მართვა, დაბინძურებისგან დასუფთავების საქმიანობები (18.5%), ტრანსპორტი და დასაწყობება (9.2%), პროფესიული, სამეცნიერო და ტექნიკური საქმიანობები (7.1%).

პირველ კვარტალში ხელფასების ზრდა დაფიქსირდა, როგორც ბიზნესის, ასევე არასამეწარმეო და საფინანსო სფეროში. 2026 წლის იანვარ-მარტში, ბიზნესსექტორში დასაქმებულების ხელფასი, წინა წლის შესაბამის პერიოდთან შედარებით 7.7%-ით გაიზარდა და 2,335.9 ლარი შეადგინა, ხოლო არასამეწარმეო და საფინანსო სფეროში დასაქმებულების ხელფასი 11.2%-ით გაიზარდა და 2,413.7 ლარი შეადგინა.