ევროკავშირის საბჭოს პრეზიდენტი ანტონიო კოშტა ევროკავშირში გაწევრიანების წესების გამარტივებას უჭერს მხარს. კოშტას თქმით, ბლოკმა გაფართოება უნდა დააჩქაროს, რათა დასავლეთ ბალკანეთის პარტნიორებს აჩვენოს, რომ სერიოზულად ეკიდება მათი ევროკავშირისკენ სწრაფვის რეალობად ქცევას.

მონტენეგროში, სადაც ევროკავშირისა და დასავლეთ ბალკანეთის ლიდერები დღეს მოლაპარაკებებს გამართავენ. „ევრონიუსთან" ექსკლუზიურ ინტერვიუში კოშტამ მოქმედი მეთოდოლოგიის გამარტივების გზები განიხილა, რომელიც, მისი თქმით, არის დამღლელი და რეგიონში იმედგაცრუების ხელშემწყობი.

ევროკავშირში წევრობა მოითხოვს ყველა წევრი სახელმწიფოს ერთსულოვან თანხმობას პროცესის რამდენიმე ეტაპზე, რაც ევროკავშირის მთავრობებს აძლევს ვეტოს უფლების გამოყენების შესაძლებლობას.

„ამჟამად მთელი პროცესის წარმატებით დასასრულებლად 40-ზე მეტჯერ გვჭირდება ხმის მიცემა. ევროკავშირს შეუძლია, შეამციროს ის მომენტები, როდესაც ჩვენ ვიღებთ გადაწყვეტილებებს პროცესის გამარტივებისთვის", - განაცხადა კოშტამ.

• ანტონიო კოშტა: „ამჟამად მთელი პროცესის წარმატებით დასასრულებლად 40-ზე მეტჯერ გვჭირდება ხმის მიცემა. ევროკავშირს შეუძლია, შეამციროს ის მომენტები, როდესაც ჩვენ ვიღებთ გადაწყვეტილებებს პროცესის გამარტივებისთვის"

„ევრონიუსი" იტყობინება, რომ ჩრდილოეთ მაკედონიის ევროკავშირში გაწევრიანებისკენ სწრაფვა საბერძნეთისა და ბულგარეთის მიერ კონსტიტუციურ საკითხებთან და უმცირესობების უფლებებთან დაკავშირებულ დავებთან დაკავშირებით ვეტოების გამო ჩაიშალა. უნგრეთის ყოფილი პრემიერ-მინისტრი ვიქტორ ორბანი რეგულარულად იყენებდა ვეტოს უფლებას, რათა ხელი შეეშალა უკრაინისთვის ევროკავშირში ინტეგრაციის გზაზე რაიმე პროგრესის მიღწევაში.

პრეზიდენტ კოშტას შეუერთდებიან ევროკომისიის პრეზიდენტი ურსულა ფონ დერ ლაიენი, ევროკავშირის 22 ლიდერი, მათ შორის საფრანგეთის პრეზიდენტი ემანუელ მაკრონი და გერმანიის კანცლერი ფრიდრიხ მერცი, ასევე დასავლეთ ბალკანეთის ექვსივე ლიდერი.

დასავლეთ ბალკანეთის ლიდერები წარმოადგენენ ხუთ ქვეყანას, რომლებიც ბლოკში გაწევრიანების ოფიციალურ კანდიდატებად ითვლებიან - ალბანეთი, ბოსნია და ჰერცეგოვინა, მონტენეგრო, ჩრდილოეთ მაკედონია და სერბეთი, ასევე კოსოვოს, რომელიც ამჟამად „პოტენციურ კანდიდატად" მიიჩნევა.

ანალიტიკოსების აზრით, უკრაინაში მიმდინარე ომისა და გლობალური არასტაბილურობის ფონზე, ევროკავშირის გაფართოება აღარ არის მხოლოდ ბიუროკრატიული პროცესი - ის უსაფრთხოების სტრატეგიულ საჭიროებად იქცა. თუ ბლოკი პროცესებს არ დააჩქარებს, დასავლეთ ბალკანეთის ქვეყნებში (სერბეთი, მონტენეგრო, ალბანეთი და ა.შ.) და სხვა, რეგიონებში ვაკუუმს რუსეთი და ჩინეთი შეავსებენ, რაც ევროპის უსაფრთხოებას პირდაპირ უქმნის საფრთხეს.

ანალიტიკოსები აღნიშნავენ, რომ პროცესის ასეთი გაჭიანურება იწვევს იმედგაცრუებას ამ ქვეყნების საზოგადოებებში, რაც აქარწყლებს ევროპულ ენთუზიაზმს და ხელს უწყობს პოპულისტური თუ პრორუსული ძალების გაძლიერებას. მათი აზრით, კოშტას მიზანია, პარტნიორებს რეალური, ხელშესახები პროგრესი დაანახოს, რათა მათ რეფორმების გაგრძელების მოტივაცია შეუნარჩუნდეთ.

ექსპერტები ხაზს უსვამენ, რომ წესების „გამარტივება" არ ნიშნავს კრიტერიუმების შემსუბუქებას. ანუ კოშტა კვლავ მკაცრად ითხოვს კანონის უზენაესობას, სასამართლო რეფორმებსა და კორუფციასთან ბრძოლას, თუმცა მას სურს თავად ევროკავშირის შიდა, ბიუროკრატიული მანქანა გახდეს უფრო სწრაფი და ნაკლებად დამოკიდებული ცალკეული ქვეყნების კაპრიზებზე.