ცნობილი ტელე და მუსიკალური პროდიუსერი მამუკა ღლონტი, ხანგრძლივი პაუზის შემდეგ, მუსიკალურ ინდუსტრიაში ახალი პროექტით - „აცა-ბაცა“ დაბრუნდა. ქართულ მუსიკალურ სივრცეში ახალდაბადებული ჯგუფი ჯერჯერობით მხოლოდ ორი წევრით არის წარმოდგენილი - თავად მამუკა ღლონტი და მსახიობი, ლევან სუხიტაშვილი. სოციალურ ქსელის, სხვადასხვა პლატფორმაზე უკვე საკმაოდ დიდი ნახვა აქვს მათ ნამუშევრებს. ცნობილი პროდიუსერის არაერთი პროექტი იცის მაყურებელმა და იმედოვნებენ, რომ „აცა-ბაცაც“ მორიგი წარმატების სამიზნეა. როგორ იქმნება ამ ჯგუფის მუსიკა, რით არის ის გამორჩეული, როგორ მუშაობენ სიმღერებზე და რა გეგმები აქვთ, ამაზე თავად მამუკა ღლონტი საუბრობს.
„მე დავბრუნდი" - ცოტა ხნის წინ, ასე უთხარით, სოციალურ ქსელში თქვენს გამომწერებს. ეს რას ნიშნავს? - დაბრუნებას მუსიკალურ ინდუსტრიაში. „მაესტროს“ ცნობილი მოვლენების შემდეგ, რა თქმა უნდა, ეს გარედან არ ჩანდა, მაგრამ ისე გამოვიფიტე, რომ აზრზე მოსასვლელად (შემოქმედებით საქმიანობის მიმართულებით) 10-12 წელი დამჭირდა“, - განაცხადა მამუკა ღლონტმა.
ამბობს, რომ „აცა-ბაცა“ ხუმრობაა, თუმცა საბოლოოდ, ჯგუფად ჩამოყალიბდა: „მუსიკას ვაკეთებთ. ვწერ, ვმღერით და რაღაცებს ვმამაძაღლობთ“, - აცხადებს ღლონტი.
კითხვაზე, რას ნიშნავს სახელწოდება - „აცა-ბაცა“, მამუკა ღლონტი პასუხობს: „კოვიდის დროს, მე და ლევანი ვისხედით და იმ უსაქმურ პერიოდში დავიწყეთ ამ რაღაც ვიდეოების ჩაწერა. ერთ-ერთი ჩაწერის დროს, თვალები დავაელმეთ და მოდი, ჩვენს ამ დუეტს „აცა- ბაცა“ დავარქვათო. მუსიკის წერა კი ბოლო სამი-ოთხი თვის ამბავია“.
სოციალურ ქსელში ცხარე კამათია თემაზე, ვინ წერს „აცა-ბაცას“ მუსიკას - ნუთუ, ხელოვნური ინტელექტი? თუმცა, მამუკა ღლონტი პასუხობს, ხელოვნური ინტელექტი რომ წერდეს, ამას ხომ ყველა გააკეთებდა:
„ხელოვნური ინტელექტი, რა თქმა უნდა, წერს მუსიკას, მაგრამ ის ჯერჯერობით არაფრად ვარგა. უბრალოდ, შეიძლება „ლატარიაში“ ხანდახან რაღაც ამოგიგდოს. ჩვენი წერის პროცესი ასეთია: სიმღერას ასე ვიწყებ, ჯერ ლექსს ვწერ. უკვე თავში მთლიანად მიტრიალებს ყველაფერი, მაგრამ ჯერ მისამღერი უნდა დავწერო. მისამღერს რომ დავწერ, მელოდია მოდის. ამ მელოდიას წავუმღერებ, წაუღიღინებ და ვეუბნები, - აბა, ამ მელოდიიდან მუსიკა, ასე ვთქვათ, არანჟირება გამიკეთე-მეთქი. ხანდახან მაშინვე „გაარტყამს“, ხან - ვერა. როცა უკვე მიხვდება, რა მელოდია ვუთხარი, ლექსს ვაძლევ და, ასე ვთქვათ, პარტიტურას ვუწერ. ეს პარტიტურა შეიძლება ძალიან დიდი იყოს, ან პატარა. ვუწერ სტილს, ინსტრუმენტებს, პაუზებს, მიმართულებებს და ბევრ რამეს. იწყებს გაკეთებას...
ჰოდა, კოტე ნონიკოვი - არანჟირების სპეციალისტი, „მაესტროს“ პერიოდში დატანჯული რომ მყავდა, დღეებს და საათებს ანდომებდა, რადგან შრომატევადი სამუშაოა - ეს უცბად ქმნის. მერე მე თითო სიმღერას ორას ორმოცდაათჯერ გადავაკეთებ ხოლმე, რამდენიმეჯერ ვუსმენ, ვცვლი, ვუსმენ, ვცვლი...ზოგი შეიძლება 100-ჯერ და 1000-ჯერაც შევცვალო. დღეს დავდე ერთი სიმღერა, რომელზეც ორი თვე ვიწვალე. ერთი შეხედვით, ძალიან მარტივია, მაგრამ დრო დამჭირდა, სანამ, ჩემი აზრით, კარგ მდგომარეობამდე მივიყვანე... ახლა ერთი სიმღერა მაქვს, სადაც არის ჩელო, მაგრამ ჩელოს ხმა არ მომეწონა. ვუთხარი, შემიცვალე და შეცვალა. თუ საქსოფონი არ მომეწონა, ვეუბნები, საყვირზე გადაიყვანე ან ფლეიტაზე, დასარტყამი ინსტრუმენტი „მომეცი“ საკლუბო ხმით და გიტარა როკის ხმით. შეიძლება ვიღაცამ თქვას - ეს ხომ არ აფრენსო, მაგრამ აი, ასეა, ასე იქმნება ეს მუსიკა“, - ამბობს მამუკა ღლონტი.
კითხვაზე, პროექტში „აცა-ბაცა“, სოლისტი მხოლოდ ლევან სუხიტაშვილია, მამუკა ღლონტმა უპასუხა, რომ ასეა, რადგან ლევანი მომღერალია, თუმცა არ გამორიცხავს, რომ მომავალში კიდევ ერთი მომღერალიც აიყვანონ. რაც შეეხება ალბომს, ღლონტი ამბობს, რომ „აცა-ბაცა“ ალბომის გამოშვებას არ გეგმავს, თუმცა Spotify-ზე არის ატვირთული ვიდეოები და თუ ვინმეს სურვილი აქვს, შეუძლია, იყიდოს.
„არ ვიცი, ვინმე იყიდის თუ არა ჩვენს სიმღერას Spotify-ზე, მაგრამ იქ რომ დებ რაღაცას, საავტორო უფლებას მაშინვე იღებ. ამიტომ, ჩემს რომელიმე სიმღერას მითითების გარეშე თუ ვინმე დადებთ, მაშინვე დაგიბლოკავთ.ალბომის რა გითხრათ, მაგრამ ჩვენს გეგმაში იქნება კაფეები, რესტორნები, კორპორატიული ღონისძიებები, დარბაზები და ა.შ. ნუ, საქართველოში მეტი არც არასდროს კეთდებოდა არაფერი“, - აღნიშნა მამუკა ღლონტმა.
წყარო: „Ambebi.ge“
სტატიების ნახვა შეგიძლიათ რუბრიკაში "ყველა სტატია"
ყველა ახალი ამბის ნახვა შეგიძლიათ ამ ბმულზე
საინტერესო ვიდეოები შეგიძლიათ იხილოთ რუბრიკაში "ყველა ვიდეო"
ბოლო ამბების ნახვა შეგიძლიათ ამ ბმულზე