საქართველო ყოველთვის მკაფიოდ უჭერდა მხარს უკრაინულ სახელმწიფოს და საზოგადოებას, - განაცხადა პარტია „ხალხის ძალის“ წევრმა, დეპუტატმა ზურაბ ქადაგიძემ გაეროს რეზოლუციაზე საუბრისას.
მისივე თქმით, საქართველო ახლაც არის იმ ვალდებულებების შემსრულებელი, რადგან უკრაინელი ლტოლვილები მიიღო.
„საქართველო ახორციელებს ლტოლვილების სრულად სოციალურ უზრუნველყოფას და ბოლომდე არის იმ მეგობრობის და იმ სტრატეგიული ურთიერთობის მხარდამჭერი, რასაც ყოველთვის აცხადებდა. სამწუხაროდ ჩვენ უკრაინული ოფიციოზის და არა მხოლოდ უკრაინული ოფიციოზის, მათი პატრონების, დასავლეთში სხვადასხვა აქტორების, სხვადასხვა ომის წამქეზებლების მხრიდან ვხედავთ ხოლმე ინსინუაციურ კამპანიებს, ეს კამპანიები ადრე თუ გვიან დასრულდება და ჩაჯდება კალაპოტში, გამომდინარე იქიდან თუ როგორ დასრულდება ახლა მოლაპარაკება“, აღნიშნა ზურაბ ქადაგიძემ.
გაეროს გენერალურმა ასამბლეამ რეზოლუცია მიიღო, რომელიც რუსეთისგან უკანონოდ დეპორტირებული უკრაინელი ბავშვების სამშობლოში დაბრუნებას მოითხოვს. დოკუმენტს მხარი 91-მა ქვეყანამ დაუჭირა, მათ შორის არის საქართველოც. 12 სახელმწიფო წინააღმდეგი იყო, 57-მა კი თავი შეიკავა.